ലോകത്ത് ആര്ട്ടിഫിഷല് ഇന്റലിജന്സിന്റെ സാധ്യതകള് സകല മേഖലയിലും പരീക്ഷിക്കുകയാണ്. ഇന്ത്യന് വിദ്യാഭ്യാസ മേഖലയില് ഇതിനോടകം തന്നെ എഐ സാങ്കേതിക വിദ്യ സുപരിചിതമായി കഴിഞ്ഞു. ഇന്ത്യയിലെ വലിയൊരു വിഭാഗം അധ്യാപകര് നിര്മിത ബുദ്ധിയുടെ സഹായം കൈക്കൊള്ളുന്നുണ്ടെന്നാണ് പുറത്തുവരുന്ന പുതിയ റിപ്പോര്ട്ടുകള് പറയുന്നത്. 63.61% അധ്യാപകര് എഐ സാങ്കേതിക വിദ്യ ഉപയോഗിക്കുന്നുണ്ടെന്ന് ടീംലീസ് എഡ്ടെക് പുറത്തുവിട്ട റിപ്പോര്ട്ടില് പറയുന്നു. കുട്ടികളെ പുതിയ കാലത്തിനൊപ്പം വളര്ത്തിയെടുക്കാന് എഐ വിദ്യാഭ്യാസം നിര്ണായകമാണെന്ന് ഇവര് വിശ്വസിക്കുന്നതായും റിപ്പോര്ട്ടില് ചൂണ്ടിക്കാണിക്കുന്നുണ്ട്. എന്നാല്, 9.49% അധ്യാപകര് ഇതൊരു ശരിയായ രീതിയല്ലെന്നും വിശ്വസിക്കുന്നുണ്ട്. അധ്യാപനത്തില് മനുഷ്യരുടെ ഇടപെടലുകള് കുറയാനുള്ള സാധ്യത, സാങ്കേതിക വിദ്യയെ അമിതമായി ആശ്രയിക്കല്, ഡാറ്റയുടെ സ്വകാര്യതയേയും വിവരങ്ങളുടെ കൃത്യതയേയും കുറിച്ചുള്ള ആശങ്കകള് എന്നിവ ചൂണ്ടിക്കാട്ടിയാണ് ഇവര് എഐ ഉപയോഗിച്ചുകൊണ്ടുള്ള അധ്യാപനരീതിയെ വിമര്ശിക്കുന്നത്.
66.7% അധ്യാപകരും എഐ സംവിധാനത്തെ അധിക വിദ്യാഭ്യാസത്തിനും പരിശീലനത്തിനും ഉപയോഗിക്കാന് സാധിക്കുമെന്ന് വിശ്വസിക്കുന്നു. സ്മാര്ട്ട് ഫോണ് വിപ്ലവത്തെക്കാള് ശക്തമായ സ്വാധീനം വിദ്യാര്ഥികള്ക്കിടയില് എഐയ്ക്ക് ഉണ്ടെന്നാണ് 70.85 % അധ്യാപകര് കരുതുന്നത്. വളര്ന്നുവരുന്ന സാങ്കേതിക വിദ്യ എന്നതിന് ഉപരി ഇന്ത്യയിലുടനീളമുള്ള ക്ലാസ്മുറികളെ എഐ മാറ്റിക്കൊണ്ടിരിക്കുകയാണ്. രാജ്യത്തുടനീളമുള്ള 6,000 അധ്യാപകരുമായി ആശയവിനിമയം നടത്തിയതിന് ശേഷമാണ് റിപ്പോര്ട്ട് തയാറാക്കിയിരിക്കുന്നത്.
ക്ലാസ് തയാറെടുപ്പുകളിലേക്കുള്ള തങ്ങളുടെ സമയം ലാഭിക്കുന്നതിനായി എഐ ട്രെയിനിങ് നല്ലതാണെന്ന് 50% അധ്യാപകര് വിലയിരുത്തുന്നുണ്ട്. അതോടൊപ്പം തന്നെ, 80% പേര് എഐ സാങ്കേതികവിദ്യയുടെ വളര്ച്ചയില് ആശങ്ക രേഖപ്പെടുത്തിയിട്ടുമുണ്ട്. ചാറ്റ്ജിപിടി പോലുള്ള എഐ ടൂളുകള് പഠനാനുഭവം മെച്ചപ്പെടുത്തുന്നതിനുള്ള അവസരമാണ്. ഇതുവഴി വിദ്യാര്ഥികള്ക്ക് അധിക വിവരങ്ങള് ശേഖരിക്കാന് സാധിക്കും. ക്ലാസ് റുമുകളില് എഐ സാങ്കേതിക വിദ്യകള് നിയന്ത്രിത തോതില് ഉപയോഗിക്കാമെന്നാണ് 62.88% അധ്യാപകര് അഭിപ്രായപ്പെടുന്നത്. 17.05% അധ്യാപകര് നിയന്ത്രണം ആവശ്യമില്ലെന്നും അഭിപ്രായപ്പെടുന്നു.
