കര്ണാടക നിയമസഭാ തിരഞ്ഞെടുപ്പിന് ഇനിയും ഒരു വര്ഷം ശേഷിക്കേ തന്ത്രങ്ങള് മെനയുന്നതിന് തുടക്കമിട്ട് കോണ്ഗ്രസ്. ഇതിന്റെ ഭാഗമായി പ്രശസ്ത തെരഞ്ഞെടുപ്പ് തന്ത്രജ്ഞന് സുനില് കനുഗോലുവിനെ പ്രചാരണത്തിന്റെ ചുമതല ഏല്പിക്കാന് കോണ്ഗ്രസ് തീരുമാനിച്ചതായാണ്റി പുറത്തുവരുന്ന പ്പോര്ട്ട്.
നേരത്തെ 2014ല് പ്രധാനമന്ത്രി നരേന്ദ്ര മോഡിയുടെ പാര്ലമെന്റ് തിരഞ്ഞെടുപ്പ് പ്രചാരണ പ്രവര്ത്തനങ്ങളില് പ്രശാന്ത് കിഷോറിനൊപ്പം നേതൃസ്ഥാനത്തുണ്ടായിരുന്ന ആളാണ് സുനില് കനുഗോലു. പിന്നാലെ പഞ്ചാബ് നിയമസഭാ തിരഞ്ഞെടുപ്പില് ശിരോമണി അകാലിദളിനു വേണ്ടി തിരഞ്ഞെടുപ്പ് തന്ത്രങ്ങള് മെനഞ്ഞത് സുനില് കനുഗോലു ആയിരുന്നു.
ഇപ്പോൾ കര്ണാടകത്തില് കോണ്ഗ്രസിനു വേണ്ടി ബിജെപിക്കെതിരേ പ്രചാരണ പ്രവര്ത്തനങ്ങള് ആസൂത്രണം ചെയ്യുക എന്നതാണ് അദ്ദേഹത്തിന്റെ അടുത്ത ഊഴമെന്നാണ് പുറത്തു വരുന്ന റിപ്പോര്ട്ട്. കഴിഞ്ഞ ദിവസം പ്രതിപക്ഷ നേതാവ് സിദ്ധരാമയ്യ, കെ.പി.സി.സി. പ്രസിഡന്റ് ഡി.കെ ശിവകുമാര് ഉള്പ്പെടെയുള്ള മുതിര്ന്ന നേതാക്കള് ഡല്ഹിയിലെത്തി കോണ്ഗ്രസ് ഉപാധ്യക്ഷന് രാഹുല് ഗാന്ധിയുമായി ചര്ച്ച നടത്തിയിരുന്നു. തിരഞ്ഞെടുപ്പില് വിജയമുറപ്പാക്കാന് ഐക്യത്തോടെ പ്രവര്ത്തനരംഗത്തിറങ്ങാന് രാഹുല് ഗാന്ധി നേതാക്കളോട് നിര്ദേശിച്ചു.
തിരഞ്ഞെടുപ്പ് മുന്നില് കണ്ട് നടത്തേണ്ട പ്രവര്ത്തനങ്ങളെപ്പറ്റി ചര്ച്ച ചെയ്തു. ഹിജാബ് വിവാദത്തില് ഹൈക്കോടതിയുടെ അന്തിമ ഉത്തരവ് വരും വരെ ജാഗ്രത പാലിക്കണമെന്ന് രാഹുല്ഗാന്ധി നേതാക്കളോട് നിര്ദേശിച്ചതായും സൂചനയുണ്ട്.
