| നോയൽ ജോർജ്
ചെറുതാണേലും വലുതാണെങ്കിലും വാഹന അപകടം സംഭവിക്കണമെങ്കിൽ രണ്ടേ രണ്ട് കാരണങ്ങൾ മാത്രമേ ഉണ്ടാവുള്ളൂ. ഒന്ന്, നിയമലംഘനം, രണ്ട്, ആക്ട് ഓഫ് ഗോഡ്. ഇതിൽ ആദ്യത്തേത് പൂർണ്ണമായും മനുഷ്യന് ഒഴിവാക്കാൻ കഴിയുന്നതും രണ്ടാമത്തേത് മനുഷ്യ നിയന്ത്രണത്തിന് വിധേയമല്ലാത്തതുമാണ്. ഓവർ സ്പീഡും ഓവർ ലോഡും ഓവർടേക്കിങ്ങും തുടങ്ങി എല്ലാ അപകടങ്ങൾക്കും പിന്നിൽ മനുഷ്യസഹജമായ എന്തേലും ഒക്കെ കാരണങ്ങൾ നിർബന്ധമായും ഉണ്ടായിരിക്കും എന്നതുകൊണ്ടാണ് അവയൊക്കെ നിയന്ത്രിക്കാൻ നിയമങ്ങൾ കൊണ്ടുവരുന്നത്.
എല്ലാവരും അവരുടെ ഇഷ്ടത്തിനനുസരിച്ച് തോന്നിയത് പോലെ വാഹനം ഓടിക്കുകയും പാർക്ക് ചെയ്യുകയും മോഡിഫിക്കേഷൻ നടത്തുകയും ചെയ്താൽ കയ്യൂക്കുള്ളവന് മാത്രം കാര്യം സാധിക്കുന്ന സ്ഥിതിവിശേഷവും സമ്പൂർണ്ണ അരാജകത്വവും ആയിരിക്കും ഫലം.
എ ഐ ക്യാമറകൾ വാഹനം സംബന്ധിച്ച നിയമലംഘനങ്ങൾ കണ്ടുപിടിക്കാൻ വേണ്ടി മാത്രം ഉള്ളതാണ്. ഒരുതരത്തിൽ സകല മനുഷ്യരുടെയും ജീവിത സുരക്ഷ ഉറപ്പുവരുത്തുക എന്ന ഭരണകൂടത്തിന്റെ ബാധ്യത നിറവേറ്റുന്ന ആധുനികമായ ഒരു ഉപാധിയാണ് ഇത്തരം ക്യാമറകൾ. അഴിമതിയും പക്ഷപാതവും തെറ്റായ ഇടപെടലുകളും ഒഴിവാക്കും എന്ന നിലയിലും നല്ലൊരു ഗതാഗത അന്തരീക്ഷം സൃഷ്ടിക്കുമെന്ന് പ്രതീക്ഷയും ഉള്ളതുകൊണ്ട് സാധാരണ യുക്തിപൂർവ്വമായി ചിന്തിക്കുന്ന മനുഷ്യരൊക്കെ ഈ നൂതന സംവിധാനത്തെ പിന്തുണയ്ക്കുകയാണ് വേണ്ടത്.
എന്നാൽ നമ്മുടെ മാധ്യമങ്ങൾ ഒരു ഹിസ്റ്റീരിയ ആകെ മൊത്തം പ്രചരിപ്പിക്കാൻ വേണ്ടി വളരെ ബോധപൂർവ്വം ശ്രമം നടത്തിക്കൊണ്ടിരിക്കുന്നു. കേന്ദ്ര സംസ്ഥാന സർക്കാരുകളുടെ സംയുക്തമായ ഇടപെടലുകളിലൂടെ നടപ്പിലാവുന്ന അതും പൂർണമായും കേന്ദ്രം ആവിഷ്കരിച്ച മോട്ടോർ വാഹന നിയമങ്ങളും ചട്ടങ്ങളും പ്രകാരം നടപ്പിലാവുന്ന ഈ പദ്ധതിയിൽ വളരെ ബോധപൂർവ്വമായി തെറ്റിദ്ധാരണകൾ പരത്താനും അത് പ്രചരിപ്പിക്കാനും വേണ്ടിയാണ് മാധ്യമങ്ങൾ ശ്രമിച്ചുകൊണ്ടിരിക്കുന്നത്.
ഒരർത്ഥത്തിൽ കുറ്റകൃത്യങ്ങൾ ചെയ്യാൻ വേണ്ടിയുള്ള പ്രോത്സാഹനം തന്നെയാണ് നമ്മുടെ മാധ്യമങ്ങൾ നൽകിക്കൊണ്ടിരിക്കുന്നത് എന്ന് വ്യക്തമാണ്, അത്തരം സംഭവവികാസങ്ങൾ ഉണ്ടെങ്കിൽ മാത്രമാണ് മാധ്യമങ്ങൾക്ക് വാർത്താ പ്രാധാന്യം ഉണ്ടാവുകയും അത് ആളുകൾ ശ്രദ്ധിക്കുകയും അതുവഴി ലാഭം ഉണ്ടാവുകയും ചെയ്യുള്ളൂ. എല്ലാവരും സമാധാനത്തോടെയും സന്തോഷത്തോടുകൂടിയും സഹവർത്തിത്വത്തോട് കൂടിയും ഒരുമിച്ച് ഐക്യത്തോടെ ജീവിച്ചാൽ നമ്മുടെ നാട്ടിലെ മാധ്യമങ്ങൾ പട്ടിണിയാവും എന്നുള്ളതാണ് അവർ തരത്തിൽ കലാപം അഴിച്ചു വിടാൻ വേണ്ടി ആഹ്വാനം ചെയ്യുന്നതിനുള്ള പ്രധാനപ്പെട്ട കാരണം.
നമ്മളുടെ വാഹനം കൊണ്ട് നമ്മൾക്കോ മറ്റൊരാൾക്കോ ഒരു മിനിറ്റ് താമസം മുതൽ മരണം വരെ സംഭവിക്കുന്ന വളരെ വിപുലമായ തെറ്റുകൾ സംഭവിക്കാൻ ഇടയുണ്ട്. അത് ഒഴിവാക്കുക എന്നത് നമ്മുടെ നിർബന്ധമായ ഉത്തരവാദിത്തമാണ്. അതിന് സഹായിക്കുന്ന ഇത്തരം സംവിധാനങ്ങളെ പരമാവധി പ്രോത്സാഹിപ്പിക്കേണ്ടതിന് പകരം മാധ്യമങ്ങളുടെ വാക്ക് കേട്ട് അതിനെതിരെ തിരിയുന്നത് വിഡ്ഢിത്തമാണ്.
