ഇന്ത്യൻ സിനിമയുടെ ചരിത്രത്തിൽ ഗ്ലാമറിന്റെ പര്യായമായി മാറിയ പേരാണ് സിൽക്ക് സ്മിത. എന്നാൽ വെള്ളിത്തിരയിൽ അവർ തീർത്ത തിളക്കത്തിനപ്പുറം കണ്ണീരും അതിജീവനവും വഞ്ചനയും നിറഞ്ഞ ഒരു ജീവിതകഥയുണ്ടായിരുന്നു. ചെറുപ്പത്തിൽ തന്നെ ക്രൂരമായ ദാമ്പത്യബന്ധത്തിൽ നിന്ന് രക്ഷപ്പെട്ട് ചെന്നൈയിലെത്തിയ ഒരു പെൺകുട്ടി, പിന്നീട് ദക്ഷിണേന്ത്യൻ സിനിമയിലെ ഏറ്റവും വിലപിടിപ്പുള്ള താരങ്ങളിലൊരാളായി മാറിയ യാത്ര അത്ര സാധാരണമായിരുന്നില്ല.
വിദ്യാ ബാലൻ കേന്ദ്രകഥാപാത്രത്തെ അവതരിപ്പിച്ച ദേശീയ പുരസ്കാര ജേതാവായ ‘ദി ഡേർട്ടി പിക്ചർ’ സിൽക്ക് സ്മിതയുടെ ജീവിതത്തിൽ നിന്ന് പ്രചോദനം ഉൾക്കൊണ്ടതാണ്. ശിവാജി ഗണേശൻ, രജനീകാന്ത്, കമൽഹാസൻ തുടങ്ങിയ പുരുഷ താരങ്ങൾ സിനിമാലോകം അടക്കിവാണിരുന്ന കാലത്ത്, ഒരു ദരിദ്ര ഗ്രാമീണ കുടുംബത്തിൽ നിന്നെത്തിയ സ്ത്രീക്ക് ഇത്രയും വലിയ താരപദവി സ്വന്തമാക്കാനാകുമെന്ന് ആരും കരുതിയിരുന്നില്ല.
ബാല്യത്തിൽ തന്നെ ദുരിതം
ആന്ധ്രാപ്രദേശിലെ ഗോവ്വാലി ഗ്രാമത്തിൽ വടലപതി വിജയലക്ഷ്മിയായാണ് സിൽക്ക് സ്മിത ജനിച്ചത്. കടുത്ത സാമ്പത്തിക ബുദ്ധിമുട്ടുകൾ കാരണം ചെറുപ്പത്തിൽ തന്നെ പഠനം ഉപേക്ഷിക്കേണ്ടിവന്നു. 14-ാം വയസ്സിൽ, സ്വന്തം സമ്മതമില്ലാതെ തന്നെ തന്നേക്കാൾ പ്രായമുള്ള ഒരാളുമായി വിവാഹം കഴിപ്പിച്ചുവെന്നാണ് ലഭ്യമായ ജീവചരിത്ര വിവരങ്ങൾ.
ഭർത്താവിൽ നിന്നും ഭർതൃവീട്ടുകാരിൽ നിന്നും ശാരീരികവും മാനസികവുമായ പീഡനങ്ങൾ നേരിട്ട വിജയലക്ഷ്മി രണ്ട് വർഷത്തോളം ആ ദുരിതജീവിതം സഹിച്ചു. ഒടുവിൽ അവിടെ നിന്ന് രക്ഷപ്പെട്ട് ചെന്നൈയിലേക്ക് പലായനം ചെയ്തു. ജീവിതത്തിൽ പുതിയൊരു അധ്യായം തുടങ്ങാനുള്ള ശ്രമമായിരുന്നു അത്.
വീട്ടുജോലിയിൽ നിന്ന് സിനിമാ സെറ്റിലേക്ക്
ചെന്നൈയിലെത്തിയ ശേഷം അമ്മായിയുടെ സഹായത്തോടെ ആദ്യം വീട്ടുജോലിക്കാരിയായി ജോലി ചെയ്തു. പിന്നീട് സിനിമാ സെറ്റുകളിൽ ടച്ച്-അപ്പ് ആർട്ടിസ്റ്റായി പ്രവർത്തിക്കാൻ തുടങ്ങി. സിനിമാ ലോകവുമായി അടുത്തിടപഴകിയതോടെ ചെറിയ വേഷങ്ങളിൽ അഭിനയിക്കാനുള്ള അവസരങ്ങളും ലഭിച്ചു.
അങ്ങനെയിരിക്കെയാണ് തമിഴ് സംവിധായകനും നടനുമായ വിനു ചക്രവർത്തിയുടെ ശ്രദ്ധയിൽ സ്മിതപ്പെടുന്നത്. ചെന്നൈയിലെ എവിഎം സ്റ്റുഡിയോയ്ക്ക് സമീപം സ്മിതയെ കണ്ട വിനു ചക്രവർത്തി അവരുടെ കഴിവ് തിരിച്ചറിഞ്ഞു. അഭിനയം, നൃത്തം, സംഭാഷണം എന്നിവയിൽ പ്രത്യേക പരിശീലനം നൽകുകയും സിനിമയിലേക്കുള്ള വഴിയൊരുക്കുകയും ചെയ്തു.
‘സിൽക്ക്’ എന്ന പേര് പിറന്നത് അങ്ങനെ
ആന്റണി ഈസ്റ്റ്മാൻ സംവിധാനം ചെയ്ത ‘ഇണയെ തേടി’ എന്ന മലയാള ചിത്രത്തിലൂടെയാണ് സ്മിതയുടെ സിനിമാ അരങ്ങേറ്റം. എന്നാൽ ചിത്രം വൈകിയാണ് റിലീസ് ചെയ്തത്. ഇതിനിടെ നിരവധി മലയാള ചിത്രങ്ങളിൽ ചെറിയ വേഷങ്ങളിൽ അവർ പ്രത്യക്ഷപ്പെട്ടു.
1980ൽ പുറത്തിറങ്ങിയ തമിഴ് ചിത്രം ‘വണ്ടിച്ചക്രം’ ആണ് സ്മിതയുടെ ജീവിതത്തിലെ വലിയ വഴിത്തിരിവായത്. ചിത്രത്തിൽ അവർ അവതരിപ്പിച്ച ‘സിൽക്ക്’ എന്ന കഥാപാത്രം ശ്രദ്ധിക്കപ്പെട്ടു. ആ കഥാപാത്രത്തിന്റെ പേരാണ് പിന്നീട് അവരുടെ സ്വന്തം സിനിമാനാമമായി മാറിയത് — സിൽക്ക് സ്മിത.
ആ ചിത്രത്തിന്റെ വിജയത്തോടെ ദക്ഷിണേന്ത്യൻ സിനിമയിൽ സിൽക്ക് സ്മിതയുടെ പുതിയ അധ്യായം ആരംഭിച്ചു.
ആഗ്രഹിച്ചത് സ്വഭാവനടി; കിട്ടിയത് ഗ്ലാമർ വേഷങ്ങൾ
സാവിത്രിയെയും സരിതയെയും പോലുള്ള ശക്തമായ കഥാപാത്രങ്ങൾ അവതരിപ്പിക്കുന്ന സ്വഭാവനടിയാകണമെന്നായിരുന്നു സിൽക്ക് സ്മിതയുടെ ആഗ്രഹം. എന്നാൽ ‘വണ്ടിച്ചക്രം’ വിജയിച്ചതോടെ സിനിമാലോകം അവരെ ഗ്ലാമർ വേഷങ്ങളിലേക്ക് മാത്രം ചുരുക്കുകയായിരുന്നു.
സ്വയം ആഗ്രഹിച്ച കഥാപാത്രങ്ങൾ ലഭിക്കാതെ വന്നതിലുള്ള നിരാശ സ്മിത പല അവസരങ്ങളിലും തുറന്നുപറഞ്ഞിട്ടുണ്ട്. എന്നാൽ സിനിമയിൽ തുടരാനും മുന്നോട്ട് പോകാനും ലഭിച്ച അവസരങ്ങൾ സ്വീകരിക്കുകയായിരുന്നു അവർ.
1982ൽ രജനീകാന്തിനൊപ്പം അഭിനയിച്ച ‘മൂന്ന് മുഖം’ പുറത്തിറങ്ങിയതോടെ സിൽക്ക് സ്മിതയുടെ താരമൂല്യം വീണ്ടും ഉയർന്നു. പിന്നീട് ദക്ഷിണേന്ത്യൻ സിനിമയിലെ ഏറ്റവും ജനപ്രിയമായ ഗ്ലാമർ താരങ്ങളിൽ ഒരാളായി അവർ മാറി.
നായികമാരെക്കാൾ ഉയർന്ന പ്രതിഫലം
ഏകദേശം 18 വർഷത്തെ സിനിമാ ജീവിതത്തിൽ 450ലേറെ ചിത്രങ്ങളിൽ സിൽക്ക് സ്മിത അഭിനയിച്ചതായി റിപ്പോർട്ടുകളുണ്ട്. പല സിനിമകളിലും സിൽക്കിന്റെ നൃത്തം തന്നെ പ്രധാന ആകർഷണമായി മാറിയിരുന്നു.
ബോക്സ് ഓഫീസിൽ പ്രതീക്ഷിച്ച വിജയം നേടാതെ നിന്ന ചില സിനിമകൾക്ക് പോലും സിൽക്ക് സ്മിതയുടെ ഒരു ഗാനരംഗം ചേർക്കുന്നത് പ്രേക്ഷകരെ ആകർഷിക്കാനുള്ള മാർഗമായി കണക്കാക്കപ്പെട്ടിരുന്ന കാലമുണ്ടായിരുന്നു. ഒരു ഗാനരംഗത്തിന് മാത്രം 50,000 രൂപ വരെ അവർ പ്രതിഫലം വാങ്ങിയിരുന്നുവെന്നാണ് വിവിധ റിപ്പോർട്ടുകൾ പറയുന്നത്. അന്നത്തെ മുൻനിര നായികമാരുടെ പ്രതിഫലവുമായി താരതമ്യം ചെയ്യുമ്പോൾ പോലും ഇത് വലിയ തുകയായിരുന്നു.
സിനിമയിൽ നായകന്മാരുടെയും നായികമാരുടെയും താരമൂല്യത്തിന് പുറത്ത് സ്വന്തമായി ഒരു വിപണി സൃഷ്ടിച്ച അപൂർവ താരമായി സിൽക്ക് സ്മിത മാറി.
ഉയരത്തിനൊപ്പം വന്ന ഏകാന്തത
താരപദവിയുടെ ഉന്നതിയിലെത്തിയപ്പോഴും വ്യക്തിജീവിതത്തിൽ സ്മിതയ്ക്ക് സമാധാനം കണ്ടെത്താനായില്ല. തന്റെ വളർച്ച സിനിമാ വ്യവസായത്തിനുള്ളിൽ അസൂയയ്ക്കും അപവാദങ്ങൾക്കും കാരണമായതായി അവർ തന്നെ പറഞ്ഞിട്ടുണ്ടെന്ന് ജീവചരിത്ര രേഖകൾ സൂചിപ്പിക്കുന്നു.
പിന്നീട് സ്വന്തം നിർമ്മാണ സംരംഭങ്ങളിലേക്കും അവർ തിരിഞ്ഞു. അടുത്തവരുടെ നിർദേശങ്ങൾ വിശ്വസിച്ച് സിനിമാ നിർമ്മാണത്തിൽ പണം മുടക്കിയതോടെ വലിയ സാമ്പത്തിക ബാധ്യതയുണ്ടായതായി റിപ്പോർട്ടുകളുണ്ട്. കോടിക്കണക്കിന് രൂപയുടെ കടബാധ്യതയിലായതോടെ വർഷങ്ങളോളം കഠിനാധ്വാനം ചെയ്ത് സമ്പാദിച്ച സ്വത്തുക്കളിൽ പലതും നഷ്ടപ്പെട്ടു.
35-ാം വയസ്സിൽ അപ്രതീക്ഷിത അന്ത്യം
1990കളുടെ മധ്യത്തോടെ സിൽക്ക് സ്മിതയുടെ സിനിമാ ജീവിതത്തിൽ താഴ്ചയുടെ സൂചനകൾ പ്രകടമായി. സാമ്പത്തിക പ്രതിസന്ധിയും വ്യക്തിജീവിതത്തിലെ പ്രശ്നങ്ങളും ഏകാന്തതയും അവരെ ബാധിച്ചിരുന്നുവെന്നാണ് വിവിധ ജീവചരിത്ര വിവരണങ്ങൾ.
1996 സെപ്റ്റംബർ 23ന് ചെന്നൈയിലെ വീട്ടിൽ സിൽക്ക് സ്മിതയെ മരിച്ച നിലയിൽ കണ്ടെത്തി. മരണം ആത്മഹത്യയാണെന്നായിരുന്നു ഔദ്യോഗിക നിഗമനം. എന്നാൽ പതിറ്റാണ്ടുകൾ പിന്നിട്ടിട്ടും അവരുടെ മരണവുമായി ബന്ധപ്പെട്ട് നിരവധി ചോദ്യങ്ങളും സംശയങ്ങളും പൊതുചർച്ചയിൽ തുടരുന്നു.
വെള്ളിത്തിരയിൽ ആയിരക്കണക്കിന് ആരാധകരെ ആകർഷിച്ച ഗ്ലാമർ താരത്തിന്റെ ജീവിതം ഒടുവിൽ വലിയൊരു വിരോധാഭാസമായി മാറുകയായിരുന്നു. ദാരിദ്ര്യത്തിൽ നിന്ന് ഉയർന്ന് ദക്ഷിണേന്ത്യൻ സിനിമയിലെ ഏറ്റവും വിലപിടിപ്പുള്ള താരങ്ങളിൽ ഒരാളായി മാറിയ സിൽക്ക് സ്മിതയുടെ ജീവിതം, പ്രശസ്തിയുടെ പിന്നിൽ മറഞ്ഞിരിക്കുന്ന ഏകാന്തതയുടെയും വിശ്വാസവഞ്ചനയുടെയും കഥ കൂടിയാണ്.
