ഒരു ജിമെയിൽ അക്കൗണ്ട് ഉണ്ടാക്കിയിട്ട് അത് ഉപയോഗിക്കാതെ ഇരിക്കുന്നവരാണെങ്കിൽ ഇനി ഒന്ന് സൂക്ഷിച്ചോളൂ. കുറേ കാലമായി ഉപയോഗിക്കാത്ത ജി-മെയിൽ അക്കൗണ്ടുകൾ അടുത്ത മാസത്തോടെ ഗൂഗിൾ ഡിലീറ്റ് ചെയ്യാനൊരുങ്ങുന്നു. ഏതാണ്ട് രണ്ടുവർഷമായി നിഷ്ക്രിയമായി തുടരുന്ന ജി മെയിലുകളാണ് ഡിസംബർ മാസത്തോടെ ഗൂഗിൾ നിർജീവമാക്കാൻ പോകുന്നത്. ദശലക്ഷ കണക്കിന് അക്കൗണ്ടുകളാണ് ഇങ്ങനെ ഉപയോഗിക്കാതെ കിടക്കുന്നത് എന്നാണ് വിവരം. രണ്ട് വർഷത്തിനിടെ ഒരിക്കൽ പോലും ഉപയോഗിക്കാതെ വെച്ചിരിക്കുന്ന ജിമെയിൽ അക്കൗണ്ടുകൾക്കാണ് പണി കിട്ടുക.
ഇതുവഴി ജി-മെയിൽ, ഡോക്സ്, ഡ്രൈവ്, ഗൂഗിൾ മീറ്റ്, കലണ്ടർ, ഗൂഗിൾ ഫോട്ടോസ് എന്നിവയിലെ കണ്ടെന്റുകൾ എല്ലാം നഷ്ടപ്പെടും. നിർജീവ അക്കൗണ്ടുകൾ സജീവ അക്കൗണ്ടുകളേക്കാൾ അപകടകരമാണെന്നാണ് ഗൂഗിളിന്റെ വിലയിരുത്തൽ. ഉപയോഗിക്കാതെ കിടക്കുന്ന അക്കൗണ്ടുകൾ പല തരത്തിലുള്ള കുറ്റകൃത്യങ്ങൾക്കും മറ്റും ഉപയോഗപ്പെടുത്തുമെന്നാണ് കരുതുന്നത്. എന്നാൽ ഇപ്പോഴത്തെ ഈ നടപടി സ്കൂളുകൾ, വ്യാപാര സ്ഥാപനങ്ങൾ തുടങ്ങിയവയുടെ അക്കൗണ്ടുകളെ ബാധിക്കില്ല.
നിശ്ചിത ഇടവേളകളിൽ ജിമെയിൽ അക്കൗണ്ട് ഉപയോഗിക്കുക എന്നതാണ് ഇത് സജീവമായി നിലനിർത്താനുള്ള മാർഗം. രണ്ട് വർഷത്തിൽ ഒരിക്കൽ എങ്കിലും അക്കൗണ്ടിൽ സൈൻ ഇൻ ചെയ്യണം എന്നാണ് ഗൂഗിൾ കമ്പനി നൽകുന്ന നിർദ്ദേശം. ഈ അക്കൗണ്ട് ലിങ്ക് ചെയ്തിരിക്കുന്ന യൂട്യൂബ്, പ്ലേ സ്റ്റോർ എന്നിവ ഉപയോഗിക്കുന്നതും അക്കൗണ്ട് സജീവമായി നിലനിർത്താൻ സഹായിക്കും. നിശ്ചിത ഇടവേളകളിൽ ജിമെയിൽ ഉൾപ്പടെയുള്ളവയുടെ പാസ്സ്വേർഡുകൾ മാറ്റുന്നത് അക്കൗണ്ട് ഹാക്ക് ചെയ്യുന്നത് പ്രതിരോധിക്കാനും സഹായിക്കും.
