മലയാള സിനിമയിൽ ഇപ്പോൾ റീ റിലീസുകളുടെ കാലമാണ്. പഴയകാല ഹിറ്റ് സിനിമകളും പണ്ട് ഹിറ്റാകാതെ പോയി പിന്നീട് പ്രേക്ഷക പ്രിയങ്കരമാകുകയും ചെയ്ത സിനിമകളുമെല്ലാം ഇപ്പോൾ പുത്തൻ സാങ്കേതികവിദ്യയുടെ സഹായത്തോടെ റീമാസ്റ്റർ ചെയ്ത് പുറത്തിറങ്ങുന്നുണ്ട്. മോഹൻലാലിൻെറയും മമ്മൂട്ടിയുടേയും സിനിമകൾ റീറിലീസിനായി എത്തിയിരുന്നു.
ദേവദൂതൻ, മണിച്ചിത്രത്താഴ്, സ്ഫടികം തുടങ്ങിയ സിനിമകൾ റീ റിലീസില് കോടികളാണ് വാരികൂട്ടിയത്. ആ നിരയിലേക്ക് എത്തുകയാണ് മലയാളത്തിന്റെ സ്വന്തം ആക്ഷൻ സൂപ്പർസ്റ്റാർ ജയൻ. ടി ദാമോദരൻ തിരക്കഥയെഴുതി ഐവി ശശി സംവിധാനം ചെയ്ത് 1980 ൽ പുറത്തിറങ്ങിയ ജയന്റെ മീൻ എന്ന ചിത്രമാണ് ഇപ്പോൾ റീ റിലീസിന് ഒരുങ്ങുന്നതെന്നാണ് പുറത്തുവരുന്ന വാർത്തകൾ.
2k ദൃശ്യഭംഗിയിൽ 5.1 ഡോൾബി അറ്റ്മോസ് ശബ്ദമികവോടെയാണ് മീൻ വർഷങ്ങൾക്കിപ്പുറം പ്രേക്ഷകരിലേക്ക് എത്താൻ പോകുന്നത്. 2025 ഫെബ്രുവരിയിൽ ചിത്രം റീ റിലീസ് ചെയ്യും. ചെന്നൈയിലും മുംബൈയിലുമായി ചിത്രത്തിന്റെ റീമാസ്റ്ററിങ് നടക്കുകയാണ്. മധു, സീമ, ശ്രീവിദ്യ, അടൂർ ഭാസി, ജോസ്, ശങ്കരാടി, അംബിക, ബാലൻ കെ നായർ തുടങ്ങിയ വമ്പൻ താരനിരയാണ് ചിത്രത്തിലുള്ളത്. ജി ദേവരാജന് സംഗീതം നല്കിയ മീനിലെ ഗാനങ്ങള് ഇന്നും മലയാളികളുടെ പ്ലേലിസ്റ്റിലുണ്ട്.
സൂപ്പർഹിറ്റ് ചിത്രമായ ഗജിനി ഉൾപ്പെടെ റീമാസ്റ്റർ ചെയ്ത് പുറത്തിറക്കിയ റോഷിക എന്റർപ്രൈസസാണ് ചിത്രം റീ റിലീസ് ചെയ്യുന്നത്. ജയന്റെ കൂടുതൽ ചിത്രങ്ങൾ പ്രേക്ഷകരിലേക്ക് റീമാസ്റ്റർ ചെയ്ത് പുറത്തിറക്കാനാണ് റോഷിക എന്റർപ്രൈസസിന്റെ പദ്ധതി. ജി ദേവരാജൻ ഈണം നൽകിയ ചിത്രത്തിലെ ഗാനങ്ങളൊക്കെ വലിയ ജനപ്രീതി നേടിയിരുന്നു
