ഉലകനായകന്‍ ഇന്ന് സപ്തതി നിറവില്‍ (70) .ഇന്ത്യന്‍, സിമിമയിലെ എക്കാലത്തേയും മികച്ച നടന്മാരില്‍ ഒരാളാണ് കമലഹാസ്സന്‍. ബഹുമുഖ പ്രതിഭയായ അദ്ദേഹം അഭിനേതാവായി മാത്രമല്ല, സംവിധായകനായും എഴുത്തുകാരനായും നിര്‍മാതാവായും,തന്റെ കഴിവ് തെളിയിച്ച വ്യക്തിയാണ്. സകലകലാവല്ലഭനില്‍ നിന്ന് ആണ്ടവരിലേക്കും അവിടെ നിന്ന് ഉലക നായകനിലേക്കുമുള്ള കമല്‍ ഹാസന്റെ ജീവിതം സംഭവബഹുലമായിരുന്നു.
ഒരു തമിഴ് അയ്യങ്കാര്‍ ബ്രാഹ്മണ കുടുംബത്തില്‍ അഭിഭാഷകനും സ്വാതന്ത്ര്യ സമര സേനാനിയുമായിരുന്ന ഡി. ശ്രീനിവാസന്റെയും വീട്ടമ്മയായിരുന്ന രാജലക്ഷ്മിയുടെയും മകനായി കമല്‍ഹാസന്‍ ജനിച്ചു . കമല്‍ഹാസന്റെ പേര് ആദ്യം പാര്‍ത്ഥസാരഥി എന്നായിരുന്നു. പിന്നീട് അച്ഛന്‍ കമല്‍ഹാസന്‍ എന്ന് പേര് മാറ്റി. നടനെന്ന നിലയില്‍ തമിഴില്‍ ശ്രദ്ധേയനാകും മുന്‍പേ മലയാളത്തില്‍ സൂപ്പര്‍ഹിറ്റുകള്‍ ചെയ്തു.
മുപ്പതിലധികം മലയാള സിനിമകളില്‍ അദ്ദേഹം അഭിനയിച്ചിട്ടുണ്ട്. 1974-ല്‍ മലയാളത്തില്‍ കന്യാകുമാരി എന്ന ചിത്രത്തിലൂടെയാണ് അദ്ദേഹം തന്റെ ആദ്യ നായക സിനിമ ചെയ്തത്. അദ്ദേഹത്തിന്റെ ആദ്യ മലയാള ചിത്രം കൂടിയാണ്. മലയാള സിനിമയുമായി കമല്‍ എന്നും ശക്തമായ ബന്ധം പുലര്‍ത്തിയിരുന്നു. മലയാള സിനിമകളെക്കുറിച്ചുള്ള അദ്ദേഹത്തിന്റെ മുന്‍ പ്രസ്താവനകളില്‍ നിന്ന് ഇത് വീണ്ടും വീണ്ടും തെളിഞ്ഞു.
കമല്‍ഹാസന്‍ തന്റെ കരിയറില്‍ 35-ലധികം സിനിമകള്‍ മലയാളത്തില്‍ ചെയ്തിട്ടുണ്ട്. കന്യാകുമാരി ബോക്‌സോഫീസ് ഹിറ്റായിരുന്നു, പൂര്‍ണ്ണമായും കന്യാകുമാരിയിലും പരിസരങ്ങളിലുമാണ് ചിത്രീകരിച്ചത്. അഭിനയത്തിന് കമലിന് മികച്ച നടനുള്ള ഫിലിംഫെയര്‍ അവാര്‍ഡ് ലഭിച്ചു. ആറ് പതിറ്റാണ്ടിലേറെയായി സജീവമായി തുടരുന്ന ചലച്ചിത്രയാത്ര, അസാധാരണമായ നടനവൈഭവം, മികച്ച നര്‍ത്തകന്‍, ആക്ഷന്‍രംഗങ്ങളിലെ കൃത്യത. അങ്ങനയങ്ങനെ കമല്‍ഹാസനെ വേറിട്ടുനിര്‍ത്തുന്ന ഘടകങ്ങള്‍ ഒട്ടേറെയുണ്ട്.
കളത്തൂര്‍ കണ്ണമ്മയില്‍ ബാലതാരമായി അഭിനയിച്ചു. മികച്ച ബാലതാരത്തിനുള്ള രാഷ്ട്രപതിയുടെ സ്വര്‍ണ്ണ മെഡല്‍ കമല്‍ഹാസന്‍ സ്വന്തമാക്കി. പട്ടാമ്പൂച്ചി എന്ന ചിത്രത്തിലൂടെയാണ് തമിഴില്‍ താരപരിവേഷം നേടിയത്. അപൂര്‍വരാഗങ്ങള്‍ അദ്ദേഹത്തിന്റെ എക്കാലത്തേയും വിജയകരമായ തമിഴ് ചിത്രമാണ്. ഈ സിനിമ അദ്ദേഹത്തിന് ആദ്യ ഫിലിംഫെയര്‍ അവാര്‍ഡും നേടിക്കൊടുത്തു. അതുവരെ തമിഴ് സിനിമകളില്‍ സപ്പോര്‍ട്ടിംഗ് റോളുകള്‍ മാത്രമായിരുന്നു അദ്ദേഹം ചെയ്തിരുന്നത്. പക്ഷേ, കന്യാകുമാരിസിനിമയിലൂടെ ഒരു സൂപ്പര്‍ സ്റ്റാര്‍ താര പദവിയിലേക്ക് അദ്ദേഹം ഉയര്‍ന്നു.
വര്‍ഷങ്ങളോളം യുഎസിലെ മേക്കപ്പ് ടെക്‌നീഷ്യന്‍മാര്‍ക്കായുള്ള വര്‍ക്ക്‌ഷോപ്പുകളില്‍ ഹാസന്‍ പങ്കെടുക്കുകയും മൈക്കല്‍ വെസ്റ്റ്‌മോറിന്റെ കീഴില്‍ മേക്കപ്പ് ആര്‍ട്ടിസ്റ്റായി പരിശീലനം നേടുകയും ചെയ്തു.കമല്‍ഹാസന്‍ തന്റെ സിനിമകള്‍ക്ക് പാട്ടുകള്‍ എഴുതിയിട്ടുണ്ട്. ഹേ റാമിലെ ഒരു സിംഗിളിന് വരികളും , വിരമാണ്ടി , ഉന്നൈപ്പോള്‍ ഒരുവന്‍ എന്നീ ചിത്രങ്ങളിലെ ഗാനങ്ങളും മന്മദന്‍ അമ്പുവിനുള്ള ആല്‍ബവും അദ്ദേഹം എഴുതി.
ഒരു പിന്നണി ഗായകന്‍ കൂടിയാണ് അദ്ദേഹം. അഞ്ച് ഭാഷകളിലാണ് അദ്ദേഹം നായകനായി തിളങ്ങിയത്. ഗുണയും അവ്വൈ ഷണ്‍മുഖിയും ഇന്ത്യനും , ദശാവതാരവും, വിശ്വരൂപവുമൊക്കെ നമ്മെ വിസ്മയിപ്പിച്ച ആദ്ദേഹത്തിന്റെ കഥാപാത്രങ്ങളാണ്.
നാലു ദേശീയ ചലച്ചിത്ര പുരസ്കാരങ്ങളും, 19 ഫിലിംഫെയർ പുരസ്കാരങ്ങളും ഉൾപ്പെടെ ധാരാളം ബഹുമതികൾക്ക് അദ്ദേഹം അർഹനായിട്ടുണ്ട്. മികച്ച വിദേശ ഭാഷാചിത്രങ്ങൾക്കായുള്ള അക്കാദമി അവാർഡിനുവേണ്ടി സമർപ്പിച്ച ചിത്രങ്ങളിൽ ഏറ്റവും കൂടുതൽ കമലഹാസൻ അഭിനയിച്ച ചിത്രങ്ങളായിരുന്നു.
കമലഹാസന്റെ ചലച്ചിത്ര നിർമ്മാണ കമ്പനി ആയ രാജ്കമൽ ഇന്റർനാഷണൽ ആണ് അദ്ദേഹത്തിന്റെ മിക്ക ചിത്രങ്ങളുടേയും നിർമ്മാതാക്കൾ. 1990-ൽ ഇന്ത്യൻ സിനിമാലോകത്തിനു കമലഹാസൻ നൽകിയ സംഭാവനകളെ മുൻനിർത്തി രാജ്യം പത്മശ്രീ ബഹുമതി നൽകി അദ്ദേഹത്തെ ആദരിക്കുകയുണ്ടായി. കൂടാതെ സത്യഭാമ സർവ്വകലാശാല ഡോക്ടറേറ്റ് നൽകിയും ആദരിച്ചു.
ഇന്ത്യൻ സിനിമയിൽ 50 വർഷം പൂർത്തിയാക്കിയ അപൂർവ്വം ചില കലാകാരന്മാരിൽ ഒരാളാണ് കമലഹാസൻ. കമലഹാസൻ മൗലികമായ പല പരീക്ഷണശ്രമങ്ങളും സിനിമയിൽ നടത്തി ചരിത്രം സൃഷ്ടിച്ചു. നിശ്ശബ്ദചിത്രമായ പുഷ്പകവിമാനം, അദ്ദേഹം സ്ത്രീ വേഷത്തിൽ അഭിനയിച്ച അവ്വൈ ഷണ്മുഖി, ഇന്ത്യൻ, അപൂർവ്വ സഹോദരങ്ങൾ തുടങ്ങിയവ ചില ഉദാഹരണങ്ങളാണ്.
