2025 ല് നടക്കുന്ന സൗഹൃദ മത്സരത്തിനായി ലയണല് മെസി അടക്കമുള്ള ടീം കേരളത്തില് എത്തുമെന്ന് സ്ഥിരീകരിച്ച് കായിക മന്ത്രി വി അബ്ദുറഹ്മാന്. അര്ജന്റീന ടീമിനെ ക്ഷണിക്കാന് സ്പെയിനില് പോയിരുന്നു എന്നും ഒന്നര മാസത്തിനകം അര്ജന്റീന പ്രതിനിധികള് കേരളത്തിലെത്തും എന്നും മന്ത്രി അറിയിച്ചു.
രണ്ട് മത്സരങ്ങളാണ് ഉറപ്പിച്ചിട്ടുള്ളത്. ഏഷ്യയിലെ രണ്ട് ടീമുകളാകും അര്ജന്റീനക്കെതിരെ കളിക്കുക. സര്ക്കാരിന്റെ നിയന്ത്രണത്തിലായിരിക്കും മത്സരം നടക്കുക. വ്യാപാര വ്യവസായ അസോസിയേഷനുമായി ചേര്ന്ന് കേരള ഗോള്ഡ് ആന്ഡ് സില്വര് മെര്ച്ചന്റ് അസോസിയേഷന് മത്സരം നടത്താനുള്ള സഹായ ഉറപ്പ് നല്കി, അവരായിരിക്കും സ്പോണ്സര്മാര്.
കേരളത്തിലെ ഫുട്ബോളിനെ പ്രോത്സാഹിപ്പിക്കുക നിരവധി കാര്യങ്ങള് സര്ക്കാര് ചെയ്തിട്ടുണ്ട്. സ്പോര്ട്സ് ഇക്കോണമി വര്ധിപ്പിക്കാനും നീക്കങ്ങള് നടത്തുന്നു.ആറു മാസം മുന്പ് കായിക ഉച്ച കോടി വിജയകരമായി നടത്തിയെന്നും മന്ത്രി വാര്ത്ത സമ്മേളനത്തില് വ്യക്തമാക്കി.
മത്സര വേദി അടക്കമുള്ള ഔദ്യോഗിക പ്രഖ്യാപനം എ എഫ് എ നടത്തും. വേദിയുടെ കാര്യത്തില് പിന്നീട് തീരുമാനം ഉണ്ടാകുമെന്നും കൊച്ചിയാണ് പ്രഥമ പരിഗണയെന്നും മന്ത്രി പറഞ്ഞു. അതേസമയം, ഖത്തറിലെ ലോകകപ്പ് വിജയത്തിന് പിന്നാലെ അര്ജന്റീന ടീമിനെ കേരളത്തിലെത്തിക്കുന്നതിനുള്ള ശ്രമങ്ങള് കായികമന്ത്രി നടത്തിയിരുന്നു. എന്നാല് ലയണല് മെസി കേരളത്തിലെത്തുമോ എന്ന കാര്യത്തില് വ്യക്തതയുണ്ടായിരുന്നില്ല.
