ദക്ഷിണേന്ത്യൻ സൂപ്പർ താരം നയൻതാരയുടെ ജീവിതം ആധാരമാക്കി ഓണലൈൻ പ്ലാറ്റ്ഫോമായ നെറ്റ്ഫ്ലിക്സിൽ റിലീസ് ചെയ്യാൻ തയ്യാറെടുക്കുന്ന ‘നയൻതാര ബിയോണ്ട് ദി ഫെയറി ടെയിൽ’ എന്ന ഡോക്യുമെന്ററിയുമായി ബന്ധപ്പെട്ട് വിവാദം ഉയരുന്നു . പ്രശസ്ത നടൻ ധനുഷിനെതിരെ ഇൻസ്റ്റഗ്രാമിൽ നയൻതാര തുറന്ന കത്ത് പോസ്റ്റ് ചെയ്തതിന് പിന്നാലെ പ്രതികരണവുമായി മറ്റ് നടിമാർ രംഗത്തെത്തി.
നയൻതാരയുടെ ചിത്രത്തിൻ്റെ ട്രെയിലറിൽ അവർ അഭിനയിച്ച ധനുഷ് സിനിമ ‘നാനും റൗഡി താൻ’ എന്ന സിനിമയുടെ ദൃശ്യങ്ങൾ ഉപയോഗിച്ചെന്നു കാട്ടി ധനുഷ് നയൻതാരയ്ക്ക് പത്ത് കോടിയുടെ കോപ്പിറൈറ്റ് നോട്ടിസ് അയച്ചിരുന്നു. പിന്നാലെയാണ് രൂക്ഷ വിമർശനവുമായി നയൻതാര രംഗത്ത് എത്തിയത്.
നയൻതാരയെ നായികയാക്കി ഭർത്താവും സംവിധായകനുമായ വിഘ്നേശ് ശിവൻ സംവിധാനം ‘നാനും റൗഡി താൻ’ എന്ന ചിത്രം നിർമിച്ചത് ധനുഷായിരുന്നു. ഈ സിനിമയുടെ ലൊക്കേഷനിലാണ് നയൻതാരയും വിഘ്നേശും പ്രണയത്തിലാകുന്നത്. അതിനാൽ തന്നെ ഈ സിനിമയ്ക്ക് ഡോക്യുമെന്ററിയിൽ വലിയ പ്രാധാന്യമുണ്ട്.
ഈ സിനിമയിലെ പാട്ടുകൾ ഡോക്യുമെന്ററിയിൽ ഉപയോഗിക്കാൻ ധനുഷിന്റെ നിർമാണക്കമ്പനിയോട് നയൻതാര അനുവാദം ചോദിച്ചെങ്കിലും ലഭിച്ചില്ല. തന്റെ നിസാര ആവശ്യം പരിഗണിക്കുന്നത് പോലും ധനുഷ് വൈകിച്ചെന്നും നയൻതാര ആരോപിക്കുന്നു.
അതേസമയം, സോഷ്യൽ മീഡിയയിലെ നയൻതാരയുടെ കത്തിന് പിന്തുണയുമായി ധാരാളം സഹപ്രവർത്തകരും രംഗത്തെത്തിച്ചിട്ടുണ്ട്. ധനുഷിൻ്റെ നായികമാരായി അഭിനയിച്ച പാർവതി തിരുവോത്ത്, അനുപമ പരമേശ്വരൻ, നസ്രിയ എന്നിവരും സോഷ്യൽ മീഡിയയിൽ പോസ്റ്റ് ചെയ്ത കത്തിൽ പ്രതികരണം രേഖപ്പെടുത്തിയിട്ടുണ്ട്. ധനുഷിനൊപ്പം അഭിനയിച്ച നസ്രിയ ഫഹദ് , ഐശ്വര്യ ലക്ഷ്മി, ഗൗരി ജി കിഷൻ എന്നിവരും പോസ്റ്റ് ലൈക്ക് ചെയ്തിട്ടുണ്ട്.
‘നയൻതാര: ബീയോണ്ട് ദ ഫെയറി ടേൽ’ എന്ന ഡോക്യു ഫിലിം സംവിധാനം ചെയ്തിരിക്കുന്നത് ഗൗതം വാസുദേവ് മേനോനാണ്. മലയാള സിനിമയിൽ തുടങ്ങി പിന്നീട് തമിഴ്, തെലുങ്ക്, ഹിന്ദി ചിത്രങ്ങളിലൂടെ തന്റേതായ വ്യക്തിമുദ്ര പതിപ്പിച്ച നയൻതാരയുടെ ജീവിതകഥയാണ് ആരാധകർക്കായി നെറ്റ്ഫ്ലിക്സ് പുറത്തിറക്കുന്നത്.
