ഈ വർഷം സിനിമ ലോകം ഏറെ പ്രതീക്ഷയോടെ നോക്കി കാണുന്ന ബിഗ് ബഡ്ജറ്റ് പ്രഭാസ് ചിത്രം “കൽക്കി 2898 എഡി” യുടെ റിലീസ് തിയതി അണിയറപ്രവർത്തകർ പുറത്തുവിട്ടു. വിവിധ ഭാഷകളിൽ ആയി ഒരുങ്ങുന്ന ബിഗ് ബഡ്ജറ്റ് സിനിമ ജൂൺ 27 ന് തിയേറ്ററുകളിൽ എത്തുമെന്ന് നിർമാതാക്കൾ അറിയിച്ചു.
പുരാണകഥകളെയും ആധുനികലോകവും ഒരുപോലെ ആവിഷ്ക്കരിച്ചുകൊണ്ട് ഭാവിയെ തുറന്ന് കാട്ടുന്ന ഒരു സയൻസ് ഫിക്ഷൻ സിനിമ ആയിരിക്കും കൽക്കി എന്നതാണ് പുറത്ത് വരുന്ന റിപ്പോർട്ടുകൾ. ഇന്ത്യൻ സിനിമയിലെ വമ്പൻ താര നിരയാണ് സ്ക്രീനിലും അണിയറയിലും ആയി അണിനിരക്കുന്നത്. അമിതാഭ് ബച്ചൻ, കമല്‍ഹാസന്‍, ദീപിക പദുക്കോണ്‍, ജൂനിയര്‍ എന്‍ടിആര്‍, വിജയ് ദേവർകൊണ്ട ഒപ്പം മലയാളികളുടെ യുവതാരം ദുൽഖർ സൽമാൻ ഉൾപ്പെടെ ഉള്ളവർ സിനിമയിൽ പ്രധാന വേഷങ്ങളിൽ എത്തുന്നുണ്ട്.
സയൻസ് ഫിക്ഷനും ഫാന്റസിയും ഒത്ത് ചേരുന്ന സിനിമ വൈജയന്തി പ്രോഡക്ക്ഷൻ ബാനറിൽ അശ്വിനി ദത്ത് ആണ് നിർമ്മിക്കുന്നത്. മഹാനടി എന്ന സിനിമയിലൂടെ സുപരിചിതനായ നാഗ് അശ്വിൻ ആണ് സിനിമ സംവിധാനം ചെയ്യുന്നത്.
ഹിറ്റ്‌ തമിഴ് ഗാനങ്ങളിലൂടെ പ്രശസ്തനായ സന്തോഷ്‌ നാരായണൻ ഗാനങ്ങൾ ഒരുക്കുന്നു. സാൻ ഡീഗോ കോക്കിൽ കോണിൽ കഴിഞ്ഞ വർഷം അരങ്ങേറ്റം കുറിച്ച് ആഗോള തലത്തിൽ വലിയ ചർച്ചയായ ‘കൽക്കി 2898 എഡി’ യുടെ തിയേറ്റർ റിലീസ് അതീവ ആകാംഷയോടെ കാത്തിരിക്കുകയാണ് സിനിമ പ്രേമികൾ.
