സച്ചിനും സച്ചിന്റെ ഷോട്ടുകൾക്കും പ്രായത്തിന്റെ ഭാരമില്ലെന്ന് തോന്നുന്നു

| ശിൽപ നിരവിൽപുഴ

ചാമ്പ്യൻസ് ട്രോഫി മാച്ചുകളുടെ ആവേശമേറുകയാണ്. ഡബ്ല്യൂ പി എല്ലും ഒന്നിനേക്കാൾ മികച്ചതടുത്തത് എന്ന പോലെ മുന്നോട്ടു പോവുകയാണ്. അതിനിടയിലാണ് അധികം ചർച്ച ചെയ്യപ്പെടാതെഇന്റർനാഷണൽ മാസ്റ്റേഴ്സ് ലീഗ് നടക്കുന്നത്. പണ്ടാരാധിച്ചു ഹൃദയത്തിൽ കൊണ്ടുനടന്ന (ഇന്നും) മനുഷ്യർ വീണ്ടും ക്രീസിലിറങ്ങുന്നത് കാണാനുള്ള കൊതി കൊണ്ട് കണ്ടതാണ്. സാക്ഷാൽ സച്ചിൻ ടെണ്ടുൽക്കർ നയിക്കുന്ന India Mastersഉം മോർഗൻ നയിക്കുന്ന England Mastersഉം മുംബൈയിലെ ഡി വൈ പട്ടേൽ സ്റ്റേഡിയത്തിൽ ഏറ്റുമുട്ടുകയാണ്.

ഒരു വെള്ളിയാഴ്ച വൈകുന്നേരമല്ല, തിരക്കുള്ളൊരു ചൊവ്വാഴ്ച രാത്രിയാണ് മാച്ച് നടക്കുന്നത്. എന്നിട്ടും മുപ്പത്തിയാറായിരത്തോളം കാണികൾ നിറഞ്ഞു കവിഞ്ഞിരിക്കുകയാണ്. ഒരൊറ്റ കാരണം. 132 റൺസ് മാത്രമെടുത്ത ഇംഗ്ലണ്ടിന്റെ ഒന്നാം ഇന്നിങ്സിന് ശേഷം ചെയ്‌സ് ചെയ്യാൻ ഇറങ്ങുന്ന ഇന്ത്യ. ജേഴ്സി നമ്പർ 10 അണിഞ്ഞുകൊണ്ട് അയാൾ കാല് ഗ്രൗണ്ടിലേക്കെടുത്തുവെക്കാൻ കാത്തിരുന്നപോലെ ആരവമാണ് സ്റ്റേഡിയം നിറയെ. കമന്ററിയിൽ പറയുന്നുണ്ട്. “It’s unbelievable. How someone who retired 10 15 years ago can still do this to a nation” എന്ന്.

എന്ത് കൊണ്ടാണതെന്ന് അയാൾ ബാറ്റുകൊണ്ട് കാണിച്ചു തരുന്നുമുണ്ട്. സ്റ്റീവൻ ഫിന്നിന്റെ ഓവറിൽ അയാളുടെ ഒരു കവർ ഡ്രൈവ് ഉണ്ട്. ബ്രെസ്നനെ ബാക്ക്വാർഡ് സ്‌ക്വയർ ലെഗിലേക്ക് അടിച്ച ഒരു സിക്സറുണ്ട്. 22 ബോളിൽ 36ഉമെടുത്താണ് സച്ചിൻ ഔട്ടായി മടങ്ങുന്നത്. ഓരോ ഷോട്ടുകളും ഫ്രെയിം ചെയ്തെടുത്തു വക്കാൻ തോന്നും, പോസ് ചെയ്തു റീവൈൻഡ് ചെയ്തു വീണ്ടും കാണാൻ തോന്നും. His footworks, timing, class and elegance..! And his ability to pick up lengths too early..!

ഓരോ ബോൾ ഫെയ്‌സ് ചെയ്യാൻ തയ്യാറാവുമ്പോഴും കാണികളുടെ സച്ചിൻ സച്ചിൻ എന്ന ആരവം, കമന്ററി ബോക്സിലെ ആവേശം, ഉള്ളിൽ അണപൊട്ടി ഒഴുകുന്ന ഗൃഹാതുരതയുടെ മലവെള്ളപ്പാച്ചിൽ. കമന്ററിയിൽ പറഞ്ഞ അതേ കാര്യമേറ്റു പറയുകയാണ്. If you haven’t watched this match yet, please do watch this.

സച്ചിൻ ബാറ്റ് ചെയ്യാനിറങ്ങുമ്പോൾ ഒരിക്കലും വറ്റാത്ത ആരവത്തെ കുറിച്ച് ചോദിക്കുമ്പോൾ ഇർഫാൻ പത്താൻ പറയുന്നുണ്ട്. പത്തുവർഷത്തോളം താൻ ഡ്രസിങ് റൂം ഷെയർ ചെയ്തിട്ടുണ്ട്, അതിലോരോ ദിവസവും സ്പെഷ്യൽ ആയിരുന്നു എന്ന്. Because game always comes first for him എന്ന്.

ഗുർകീരാട്ടിന്റെ ഇന്നിംഗ്സ് മനോഹരമായിരുന്നു. ഈ പ്രായത്തിലും, തുടർച്ചയായ പരിശീലനങ്ങൾ ഇല്ലാതെ ഇറങ്ങിയിട്ടും ഇന്ത്യൻ ടീം ഫീൽഡിങ്ങിൽ കാണിച്ച ചുറുചുറുക്ക് അവിശ്വസനീയമായിരുന്നു..! But Sachin, his aura..! ഉള്ളിലൊരു പത്തു വർഷം പിന്നോട്ട് പോയ പ്രതീതിയാണ്. നമുക്ക് പ്രായമാവും, നമ്മുടെ ഓർമകൾക്കും. പക്ഷേ സച്ചിനും സച്ചിന്റെ ഷോട്ടുകൾക്കും പ്രായത്തിന്റെ ഭാരമില്ലെന്ന് തോന്നുന്നു. സച്ചിൻ, യുവി, ഇർഫാൻ പത്താൻ, യൂസഫ് പത്താൻ. കാലം തിരിച്ചു പിടിക്കാനാവില്ല, എന്നാൽ കഴിഞ്ഞു പോയ കാലത്തിലേക്ക് ഒരിത്തിരി നേരത്തേക്ക് എങ്കിലും തിരികെ കൊണ്ടുപോവാൻ ഇവരെക്കൊണ്ട് കഴിയും എന്ന് മനസിലായി.