| മനൂപ് ഖാൻ
ഇന്ത്യയുടെ ഏകദിന ലോകകപ്പ് ടീം, ഓസീസിനെതിരായ ഏകദിന ടീം, ഏഷ്യൻ ഗെയിംസ് ടീം, ഈ മൂന്ന് ടീമുകളിലും ഉൾപ്പെടുത്താതെ മലയാളി താരം സഞ്ജു സാംസണെ പുറത്തു നിർത്തിയത്തിന്റെ നിരാശയിൽ പലരും ഇട്ട പോസ്റ്റുകൾക്ക് താഴെ നൂറു കണക്കിന് കണ്ട കമന്റുകളാണ് സഞ്ജു അവസരം മുതലാക്കിയില്ല, സ്ഥിരതയില്ല എന്നു തുടങ്ങുന്ന വാദങ്ങളും, ടീമിൽ ഇടം കിട്ടാൻ നന്നായി കളിക്കണം, മലയാളി ആയത് കൊണ്ട് ടീമിൽ എടുക്കണം എന്നു കരഞ്ഞിട്ടു കാര്യമില്ല എന്നു തുടങ്ങുന്ന പരിഹാസങ്ങളും.
ഏതാണ്ട് അടുത്തടുത്തു വരുന്ന മൂന്ന് ഏകദിന ടൂർണമെന്റുകൾക്കായി മൂന്ന് വ്യത്യസ്ത ടീമുകളാണ് നിലവിൽ ഇന്ത്യക്ക് ഉള്ളത്. അതിൽ ചിലർ കോമണായി ഉണ്ട് താനും. ലോകകപ്പിനുള്ള ഇന്ത്യയുടെ ഒന്നാം നിര ടീമിൽ സഞ്ജുവിന് അർഹതയുണ്ട് എങ്കിൽ പോലും പതിനഞ്ചു പേരടങ്ങുന്ന ഒരു സംഘത്തിൽ ഒരുപക്ഷേ ഇടം കിട്ടാത്തതിന് പല കാരണങ്ങളും കണ്ടെത്താം. പക്ഷേ പ്രധാന താരങ്ങൾക്ക് വിശ്രമം അനുവദിച്ച ഓസീസിനെതിരെ കളിക്കുന്ന ടീമിൽ പോലും സഞ്ജു യോഗ്യനല്ല എന്ന് വരുന്നതിന് ഒരു കാരണവും കാണുന്നില്ല.
അതും പോട്ടേ, പ്രധാന താരങ്ങൾ ആരുമില്ലാത്ത, ഇതുവരെ അന്താരാഷ്ട്ര മത്സരങ്ങൾ കളിച്ച പരിചയം പോലുമില്ലാത്ത കളിക്കാർ ഉൾപ്പെടുന്ന ഏഷ്യൻ ഗെയിംസ് ടീമിൽ പോലും കളിക്കാൻ സഞ്ജു യോഗ്യനല്ല എന്നു കരുതുന്നവരോട് എന്ത് പറയാനാണ്. അത് പറയുന്നവർ ക്രിക്കറ്റ് കാണാറുണ്ട് എന്നൊക്കെ പറയുന്നത് കേൾക്കുമ്പോഴാണ് തമാശയായി തോന്നുന്നത്. സ്ഥിരതയില്ല സ്ഥിരതയില്ല, അവസരം മുതലക്കുന്നില്ല എന്നു പലരും മോങ്ങുന്ന സഞ്ജുവിന്റെ അന്താരാഷ്ട്ര ഏകദിന ക്രിക്കറ്റിലെ കണക്കുകൾ ഒന്നു നോക്കാം.
പന്ത്രണ്ട് ഇന്നിംഗ്സുകളിൽ 55 റൺസ് ശരാശരിയിൽ 104 സ്ട്രൈക്ക് റേറ്റിൽ മൂന്ന് അർധ സെഞ്ചുറികൾ അടക്കം നാനൂറോളം റൺസ് നേടിയ ഒരു മിഡിൽ ഓർഡർ ബാറ്റർ എങ്ങനെയാണ് മോശം കളിക്കാരനാവുന്നത്? അതിൽ 7 ഇന്നിംഗ്സുകളിൽ 30 പ്ലസ് സ്കോറുകൾ നേടിയ കളിക്കാരൻ എങ്ങനെയാണ് സ്ഥിരതയില്ലാത്ത, അവസരം മുതലാക്കാത്ത ആളാകുന്നത്? അഞ്ച് ഇന്നിംഗ്സുകളിൽ സഞ്ജുവിന്റെ വിക്കറ്റ് എടുക്കാൻ എതിരാളികൾക്ക് കഴിഞ്ഞിട്ടില്ല. വെറും 3 ഇന്നിംഗ്സുകളിൽ മാത്രമാണ് സഞ്ജു കുറഞ്ഞ സ്കോറിന് പുറത്തായത്. അതിൽ തന്നെ രണ്ടക്കം കാണാത്ത ഒരേയൊരു ഇന്നിംഗ്സ് മാത്രം.
ഇത്രയും മികച്ച കണക്കുകൾ ഇവിടെ പകൽ പോലെ വ്യക്തമായി നിൽക്കുമ്പോൾ എന്ത് അടിസ്ഥാനത്തിലാണ് സഞ്ജു സ്ഥിരത കാണിച്ചില്ല, ഉത്തരവാദിത്തമില്ല, അവസരം മുതലാക്കിയില്ല എന്ന മണ്ടൻ വാദങ്ങൾ പറഞ്ഞ് മലയാളിയായ ഒരു കളിക്കാരനെ, സംഘപരിവാർ ഭരിക്കുന്ന ബിസിസിഐ സ്ഥിരമായി തഴയുന്നതിനെ ന്യായീകരിക്കാൻ മലയാളികൾക്ക് കഴിയുന്നത്?
ഏകദിനത്തിൽ ഈ അടുത്ത കാലത്ത് തുടർച്ചയായി മൂന്ന് ഗോൾഡൻ ഡക്ക് അടിച്ച സൂര്യകുമാർ യാദവ് ഒക്കെ ലോകകപ്പ് കളിക്കുമ്പോ, ഇതുവരെ കളിച്ചു തെളിയിച്ചിട്ടില്ലാത്ത കളിക്കാർ പോലും ഏഷ്യൻ ഗെയിംസ് കളിക്കുമ്പോ സഞ്ജു സാംസണ് ഒന്നിലും പെടാതെ പുറത്തിരിക്കുന്ന കാഴ്ച സങ്കടകരമാണ്. നീതികേടാണ്. അതിനെ ന്യായീകരിക്കരുത്
