പരിചയമില്ലാത്ത നമ്പറുകളിൽ നിന്ന് കോളുകൾ വരുമ്പോൾ വിളിച്ചത് ആരാണെന്ന് ഉപഭോക്താവിന് പറഞ്ഞു കൊടുക്കുന്ന ആപ്പുകളിൽ ഒന്നാണ് ട്രൂ കോളർ. ആൻഡ്രോയ്ഡ് ഫോണുകളിലെ ഈ ജനകീയ ആപ്പിൽ എഐ സാങ്കേതിക വിദ്യ കൊണ്ടുവരാൻ തയ്യാറെടുക്കുകയാണ് ഡവലപ്പേഴ്സ്. മൈക്രോസോഫ്റ്റിന്റെ അസൂർ ആർട്ടിഫിഷ്യൽ ഇന്റലിജൻസ് (എഐ) സ്പീച്ച് സാങ്കേതികവിദ്യയാണ് ട്രൂകോളറിൽ കൊണ്ടു വരുന്നത്. ട്രൂകോളർ അസിസ്റ്റന്റിനൊപ്പം സ്വന്തം ശബ്ദത്തിന്റെ ഡിജിറ്റൽ പതിപ്പ് സൃഷ്ടിക്കാൻ പേഴ്സണൽ വോയ്സ് നിങ്ങളെ അനുവദിക്കും.
ഉപഭോക്താവിനെ വിളിക്കുന്നവർക്ക് സാധാരണ ഡിജിറ്റൽ അസിസ്റ്റന്റിന് പകരം ഉപഭോക്താവിന്റെ ശബ്ദത്തിൽ തന്നെ ആരാണ് വിളിക്കുന്നതെന്നും മറ്റും കേൾക്കാൻ സാധിക്കും. ട്രൂകോളർ വക്താവ് ആഗ്നസ് ലിൻഡ്ബെർഗ് ആണ് പുതിയ സാങ്കേതിക വിദ്യയെ കുറിച്ച് പരിചയപ്പെടുത്തിയത്. ട്രൂകോളർ അസിസ്റ്റന്റ് പ്രീമിയം വരിക്കാർക്ക് മാത്രമേ ഈ സൗകര്യം ഇപ്പോൾ ലഭ്യമാകൂ.
ഉപയോക്താവ് കോള് നിരസിക്കുകയോ അറ്റൻഡ് ചെയ്യാതിരിക്കുകയോ ചെയ്യുമ്പോൾ, അത് ട്രൂകോളർ അസിസ്റ്റന്റിലേക്ക് കൈമാറും. തുടർന്ന് വിളിക്കുന്നയാളുമായി കോളിന്റെ ഉദ്ദേശ്യം ചോദിക്കുകയും ചെയ്യും. അതേ സമയം, കോളറും ട്രൂകോളർ അസിസ്റ്റന്റും തമ്മിലുള്ള എല്ലാ വോയ്സ് അധിഷ്ഠിത ഇടപെടലുകളും ടെക്സ്റ്റുകളായി പരിവർത്തനം ചെയ്യപ്പെടുന്നു, ഇത് ഫോണിന്റെ സ്ക്രീനിൽ ദൃശ്യമാകും. ഈ വിവരങ്ങൾ ഉപയോഗിച്ച്, ഫോൺ ഉടമയ്ക്ക് ആരാണ് വിളിച്ചതെന്ന് അറിയാനും അതിന് ഉത്തരം നൽകാനും അല്ലെങ്കിൽ കോൾ അവഗണിക്കാനും കഴിയും. ഇന്ത്യയിൽ, അസിസ്റ്റന്റ് ഓപ്ഷനുള്ള ട്രൂകോളർ പ്രീമിയം സബ്സ്ക്രിപ്ഷന്, പ്രതിമാസം 149 രൂപ (ഒരു വർഷത്തേക്ക് 1,499 രൂപ) ആണ്, ഇത് കൂടാതെ പ്രതിമാസം 299 രൂപയ്ക്ക് ഫാമിലി പ്ലാനും ഉണ്ട്.
