ലോകത്തിലെ ഏറ്റവും പുരാതനമായ പിരമിഡുകളെക്കുറിച്ച് പറയുമ്പോൾ ആദ്യം ഓർമ്മ വരുന്നത് ഈജിപ്തിലെ ഗിസ പിരമിഡുകളാണ്. ക്രിസ്തുവിന് മുമ്പ് ഏകദേശം 2630-ഓടെ നിർമ്മിക്കപ്പെട്ട ഇവ മനുഷ്യ സിവിലൈസേഷന്റെ ഏറ്റവും വലിയ വാസ്തുവിദ്യാ അത്ഭുതങ്ങളിലൊന്നായി കണക്കാക്കപ്പെടുന്നു. എന്നാൽ ഇന്തോനേഷ്യയിലെ ഗുണുങ് പഡാങ് എന്ന പുരാതന സൈറ്റിനെക്കുറിച്ചുള്ള ഒരു പഠനം ഈ ചരിത്രധാരണയെ ചോദ്യം ചെയ്ത് ആഗോളതലത്തിൽ വലിയ ചർച്ചകൾക്ക് വഴിവെച്ചിരിക്കുകയാണ്.
പശ്ചിമ ജാവയിൽ സ്ഥിതി ചെയ്യുന്ന ഗുണുങ് പഡാങ് ഒരു സാധാരണ പ്രകൃതിദത്ത കുന്നല്ലെന്നും, മനുഷ്യർ നിർമ്മിച്ച ഒരു വമ്പൻ പിരമിഡ് ഘടനയാണെന്നും ഇന്തോനേഷ്യൻ അക്കാദമി ഓഫ് സയൻസസിലെ ഗവേഷകനായ ഡാനി ഹിൽമാൻ നതാവിദ്ജാജയുടെ നേതൃത്വത്തിലുള്ള സംഘം അവകാശപ്പെട്ടു. ഒരു അഗ്നിപർവ്വത പാറയെ അടിസ്ഥാനമാക്കി, അതിന് മുകളിലായി വിവിധ ഘട്ടങ്ങളിലായി കല്ലുകൾ നിരത്തി നിർമിച്ച സങ്കീർണമായ ഘടനയാണിതെന്നാണ് ഗവേഷകരുടെ വാദം.
ഈ പഠനത്തെ ലോകശ്രദ്ധയിലേക്ക് നയിച്ചത് മറ്റൊരു അവകാശവാദമായിരുന്നു. ഗുണുങ് പഡാങിന്റെ നിർമ്മാണം ഏകദേശം 27,000 വർഷങ്ങൾക്ക് മുമ്പ് ആരംഭിച്ചിരിക്കാമെന്നാണ് ഗവേഷകർ വിലയിരുത്തിയത്. ഇത് ശരിയാണെങ്കിൽ, ഈജിപ്തിലെ പിരമിഡുകളേക്കാളും തുർക്കിയിലെ പ്രശസ്തമായ ഗോബെക്ലി ടെപെ സൈറ്റിനേക്കാളും ആയിരക്കണക്കിന് വർഷങ്ങൾ പഴക്കമുള്ള മനുഷ്യനിർമിത ഘടനയെന്ന വിശേഷണം ഗുണുങ് പഡാങിന് ലഭിക്കും.
എന്നാൽ ഈ കണ്ടെത്തൽ ശാസ്ത്രലോകത്ത് ശക്തമായ വിമർശനങ്ങൾക്കും കാരണമായി. പുരാവസ്തുശാസ്ത്രജ്ഞരും ഭൂമിശാസ്ത്ര വിദഗ്ധരും പഠനത്തിന്റെ രീതിശാസ്ത്രത്തെ ചോദ്യം ചെയ്തു. ഗവേഷകർ ഉപയോഗിച്ച റേഡിയോകാർബൺ ഡേറ്റിംഗ് സാമ്പിളുകൾക്ക് കെട്ടിടനിർമാണവുമായി നേരിട്ട് ബന്ധമില്ലെന്നും, പുരാതന മണ്ണിന്റെ പ്രായം മാത്രം കണക്കാക്കി ഒരു നിർമാണത്തിന്റെ പ്രായം നിർണയിക്കാൻ കഴിയില്ലെന്നും വിമർശകർ ചൂണ്ടിക്കാട്ടി.
വിവാദം ശക്തമായതോടെ പഠനം പ്രസിദ്ധീകരിച്ച Archaeological Prospection എന്ന ശാസ്ത്ര ജേണൽ 2024-ൽ പ്രബന്ധം ഔദ്യോഗികമായി പിൻവലിച്ചു. പഠനത്തിലെ നിഗമനങ്ങൾക്ക് മതിയായ ശാസ്ത്രീയ തെളിവുകൾ ഇല്ലെന്നായിരുന്നു വിദഗ്ധരുടെ നിലപാട്.
എന്നിരുന്നാലും, ഇന്തോനേഷ്യൻ ഗവേഷകർ അവരുടെ കണ്ടെത്തലിൽ ഇപ്പോഴും ഉറച്ചുനിൽക്കുകയാണ്. ഗുണുങ് പഡാങ് യഥാർത്ഥത്തിൽ മനുഷ്യർ നിർമിച്ച പുരാതന പിരമിഡാണോ, അതോ പ്രകൃതിയുടെ ഭൗമശാസ്ത്രപരമായ ഒരു രൂപീകരണമോ എന്ന ചോദ്യം ഇന്നും അന്താരാഷ്ട്ര പുരാവസ്തു ലോകത്ത് ചർച്ചയായിക്കൊണ്ടിരിക്കുകയാണ്.
ലോക ചരിത്രത്തെ തന്നെ പുനർനിർവചിക്കാൻ സാധ്യതയുള്ള അവകാശവാദമായതിനാൽ, ഗുണുങ് പഡാങിനെക്കുറിച്ചുള്ള കൂടുതൽ ഗവേഷണങ്ങളുടെയും തെളിവുകളുടെയും ഫലമാണ് ഈ വിവാദത്തിന് അന്തിമ ഉത്തരമാകുക.
