നടിയും ഗായികയുമായ ശ്രുതി ഹാസൻ ജീവിതത്തിലെ വെല്ലുവിളികളും ലക്ഷ്യബോധവും സംബന്ധിച്ച് മനസ്സുതുറന്നു. പ്രയാസകരമായ നിമിഷങ്ങൾ പലപ്പോഴും വിലപ്പെട്ട പാഠങ്ങളായി മാറാറുണ്ടെന്നും, നല്ല നിമിഷങ്ങൾ മുന്നോട്ട് പോകാനുള്ള പ്രചോദനമായി പ്രവർത്തിക്കാറുണ്ടെന്നും അവർ പറഞ്ഞു.
റഗ്ബി പ്രീമിയർ ലീഗ് (ആർപിഎൽ) സീസൺ 2-നോടനുബന്ധിച്ച് മാധ്യമങ്ങളോട് സംസാരിക്കവെയാണ് ശ്രുതി തന്റെ അഭിപ്രായങ്ങൾ പങ്കുവെച്ചത്. റഗ്ബിയായാലും മറ്റേതെങ്കിലും ഇഷ്ടപ്പെട്ട മേഖലയായാലും വെല്ലുവിളികൾ ജീവിതത്തിന്റെ ഭാഗമാണെന്ന് അവർ ചൂണ്ടിക്കാട്ടി. ചില വെല്ലുവിളികൾ വ്യക്തിപരമായതാകാമെന്നും ചിലത് പുറംലോകത്ത് നിന്നുള്ളതാകാമെന്നും അവർ പറഞ്ഞു.
താൻ ചെയ്യുന്ന കാര്യത്തോടുള്ള ആത്മാർഥമായ സ്നേഹവും അതിനോടുള്ള അഭിനിവേശവുമാണ് പ്രതിസന്ധികളെ അതിജീവിക്കാൻ സഹായിക്കുന്നതെന്ന് ശ്രുതി വ്യക്തമാക്കി. ജീവിതത്തിൽ ചെയ്യാൻ ആഗ്രഹിക്കുന്ന കാര്യമാണ് അതെന്ന് ഉറച്ച വിശ്വാസമുണ്ടെങ്കിൽ കഠിന ദിവസങ്ങൾ പോലും പുതിയ പാഠങ്ങൾ പഠിപ്പിക്കുന്ന അവസരങ്ങളായി മാറുമെന്നും, നല്ല ദിവസങ്ങൾ അതേ വഴിയിൽ മുന്നോട്ട് പോകാനുള്ള ഓർമ്മപ്പെടുത്തലുകളായി നിലനിൽക്കുമെന്നും അവർ കൂട്ടിച്ചേർത്തു.
ജൂൺ 16ന് ഹൈദരാബാദിലെ ഗച്ചിബൗളി സ്റ്റേഡിയത്തിൽ നടന്ന ആർപിഎൽ സീസൺ 2 ഉദ്ഘാടന ചടങ്ങിൽ ശ്രുതി ഹാസൻ ശ്രദ്ധേയ പ്രകടനം നടത്തിയിരുന്നു. ചടങ്ങിൽ നിന്നുള്ള വീഡിയോകളും ചിത്രങ്ങളും താരം സാമൂഹിക മാധ്യമങ്ങളിലൂടെ പങ്കുവെച്ചിരുന്നു.
