സംഗീതനഗരമായി അറബ് രാജ്യമായ അബുദാബിയെ നാമകരണം ചെയ്ത് യുനെസ്കോ ക്രിയേറ്റീവ് സിറ്റീസ് നെറ്റ് വർക്ക്. യുനെസ്കോയുടെ സിറ്റി ഓഫ് മ്യൂസിക് ബഹുമതിയാണ് ഇപ്പോൾ അബുദാബിയെ തേടിയെത്തിയത്. ഇതോടുകൂടി ബ്രിട്ടനിലെ ലിവര്പൂള്, ന്യൂസിലാന്ഡിലെ ഓക്ലാന്ഡ്, സ്പെയിനിലെ സെവില്ല, ഇന്ത്യയിലെ ചെന്നൈ എന്നീ സംഗീത നഗരങ്ങളുടെ പട്ടികയിലേക്ക് അബുദാബിയുമെത്തി.
പരസ്പരം നഗരങ്ങള് തമ്മിലുള്ള സഹകരണം പ്രോത്സാഹിപ്പിക്കുക, നഗരങ്ങളുടെ സാംസ്കാരിക വികസനത്തിന് സഹായകമാകുക എന്നിവ ലക്ഷ്യമിട്ട് 2004ലാണ് യുനെസ്കോ ഈ പദ്ധതിക്ക് ആദ്യമായി തുടക്കമിട്ടത്.
അബുദാബിയുടെ തനതായ സാംസ്കാരികവും ക്രിയാത്മകവുമായ വികസനത്തിന് ശക്തിപ്പെടുത്തുന്നതാണ് യുനെസ്കോയുടെ അംഗീകാരമെന്നും ഇതില് അഭിമാനമുണ്ടെന്നും അബുദാബി സാംസ്കാരിക, യുവജന മന്ത്രി നൂറാ ബിന്ത് മുഹമ്മദ് അല് കഅബി അറിയിച്ചു. യുനെസ്കോ ക്രിയേറ്റീവ് സിറ്റീസ് നെറ്റ് വർക്കില് അബുദാബി അംഗമായതില് അഭിമാനമുണ്ടെന്നും അവര് കൂട്ടിച്ചേര്ത്തു.
