തെലുങ്ക് സിനിമാ വ്യവസായത്തിന്റെയും ബോളിവുഡിന്റെയും പ്രവർത്തന രീതികളെ താരതമ്യം ചെയ്ത് നടി രാകുൽ പ്രീത് സിംഗ് നടത്തിയ പരാമർശങ്ങൾ ശ്രദ്ധ നേടുന്നു. ടോളിവുഡിലെ സഹകരണ മനോഭാവത്തെ പ്രശംസിച്ച താരം, ബോളിവുഡിൽ അസൂയയും അരക്ഷിതാവസ്ഥയും കൂടുതലാണെന്ന അഭിപ്രായവും പങ്കുവച്ചു.
അടുത്തിടെ നൽകിയ ഒരു അഭിമുഖത്തിലാണ് തന്റെ സിനിമാ യാത്രയിൽ നിർണായക പങ്കുവഹിച്ച തെലുങ്ക് സിനിമാ മേഖലയെക്കുറിച്ച് രാകുൽ സംസാരിച്ചത്.
“ടോളിവുഡിൽ താരങ്ങൾ പരസ്പരം പിന്തുണയ്ക്കുന്ന സംസ്കാരമുണ്ട്. സഹതാരങ്ങളുടെ സിനിമകളുടെ ട്രെയിലർ ലോഞ്ചുകളിൽ പങ്കെടുക്കുന്നതും ചിത്രങ്ങളെ പ്രോത്സാഹിപ്പിക്കുന്നതും സാധാരണമാണ്. പ്രൊഫഷണൽ മത്സരം നിലനിൽക്കുമ്പോഴും മറ്റുള്ളവരുടെ വിജയത്തെ ഹൃദയപൂർവം അംഗീകരിക്കുന്ന സമീപനമാണ് അവിടെയുള്ളത്,” രാകുൽ പറഞ്ഞു.
അതേസമയം, ബോളിവുഡിലെ സാഹചര്യം വ്യത്യസ്തമാണെന്നും താരം അഭിപ്രായപ്പെട്ടു. ചില സാഹചര്യങ്ങളിൽ അസൂയയും അരക്ഷിതാവസ്ഥയും കാരണം താരങ്ങൾ തമ്മിലുള്ള സഹകരണം കുറയുന്നുവെന്നും, ചിലർ മറ്റുള്ളവരുടെ പ്രതിച്ഛായയെ ബാധിക്കുന്ന തരത്തിലുള്ള നെഗറ്റീവ് പ്രചാരണങ്ങൾ നടത്തുന്നതായും അവർ ചൂണ്ടിക്കാട്ടി.
“തെലുങ്ക് സിനിമാ മേഖലയിൽ കാണുന്ന ഐക്യവും സൗഹൃദവും ഹിന്ദി സിനിമാ മേഖലയിലും ഉണ്ടാകുകയാണെങ്കിൽ വ്യവസായം കൂടുതൽ ശക്തമാകും,” രാകുൽ അഭിപ്രായപ്പെട്ടു.
ദക്ഷിണേന്ത്യൻ സിനിമാ ലോകമാണ് തന്റെ കരിയറിന് വലിയ അടിത്തറ നൽകിയതെന്നും, ഇവിടുത്തെ പ്രേക്ഷകരുടെ പിന്തുണയാണ് തന്റെ വളർച്ചയിൽ നിർണായകമായതെന്നും താരം നേരത്തെയും വ്യക്തമാക്കിയിട്ടുണ്ട്. അല്ലു അർജുൻ, മഹേഷ് ബാബു തുടങ്ങിയ പ്രമുഖ താരങ്ങളുടെ ലാളിത്യത്തെയും പ്രൊഫഷണൽ സമീപനത്തെയും രാകുൽ പലപ്പോഴും പ്രശംസിച്ചിട്ടുണ്ട്.
രാകുലിന്റെ പരാമർശങ്ങൾ സമൂഹമാധ്യമങ്ങളിലും വലിയ ചർച്ചയായി. ടോളിവുഡിനോടുള്ള താരത്തിന്റെ ആദരവും അനുഭവപങ്കിടലും തെലുങ്ക് പ്രേക്ഷകരിൽ നിന്ന് മികച്ച പ്രതികരണമാണ് നേടുന്നത്.
