. രഞ്ജിത്ത് പി തങ്കപ്പൻ
വേൾഡ് കോൺഫറൻസ് ഓൺ ചൈൽഡ് വെൽഫെയർ 1925 ജൂൺ 1 ന് ജനീവയിൽ അന്താരാഷ്ട്ര ശിശുദിനം ആക്കി പ്രഖ്യാപനം നടത്തി. പിന്നെ പല ദേശങ്ങൾ പല ദിവസങ്ങൾ ആയി ശിശുദിനം അഥവാ ബാലദിനം ആചരിക്കാൻ തുടങ്ങി. 1954 മുതൽ ഐക്യരഷ്ട്രസഭ നവംബർ 20 ലോക ശിശുദിനം ആയി ആചരിക്കുന്നു. ഇന്ത്യയിൽ അത് ചാച്ചാ നെഹ്രുവിന്റെ ജന്മദിനമായ നവംബർ 14 നു ശിശുദിനമായി കൊണ്ടാടുന്നു.
എന്നാൽ പേരിനൊരു ശിശുദിനം ആയികോട്ടെ എന്നതിൽ നിന്നും അതിനൊരു അന്തർദേശീയ മാഹാത്മ്യവും അന്തസ്സും കൈവരുന്നത് 1949 ൽ സോവിയറ്റ് യൂണിയനിൽ, മോസ്‌കോയിൽ വച്ചുനടന്ന അന്തർ ദേശീയ വനിതാ സമ്മേളനത്തിലെ പ്രഖ്യാപനത്തോടെയാണ്. അന്നുമുതൽ ജൂൺ 1 കമ്മ്യൂണിസ്റ്റ്, കമ്മ്യൂണിസ്റ്റ് അനുഭാവ ചേരി രാജ്യങ്ങൾ എല്ലാം ജൂൺ 1 ദേശീയ ഉത്സവങ്ങളാക്കി. കുട്ടികൾ ആണ് രാജാക്കന്മാർ എന്ന കമ്മ്യൂണിസ്റ്റ് പ്രഖ്യാപനം കൂടിയായിരുന്നു അത്.
ലോകത്താദ്യമായി ദേശീയ പ്രാധാന്യവും ദേശീയ ബഹുമതികളും ദേശീയ അവധിയും ദേശീയ ആഘോഷവും പ്രഖ്യാപിച്ചുകൊണ്ട്. കുട്ടികളുടെ ആരോഗ്യവും വിദ്യാഭ്യാസവും എല്ലാം പൂർണ്ണമായും രാഷ്ട്രം ഏറ്റെടുത്ത നടപടികൾ അക്ഷരാർത്ഥത്തിൽ മുതലാളിത്ത ലോകത്തെത്തന്നെ ഞെട്ടിച്ചുകളഞ്ഞു. സോവിയറ്റ് യൂണിയനിലെ വൃദ്ധ ജനങ്ങൾക്കും ആ രാജകീയ പദവി നൽകി ആ മഹത്തായ രാഷ്ട്രം. പൂർണ്ണമായും വൃദ്ധജനങ്ങളെ രാഷ്ട്രം ഏറ്റെടുത്തു. കാരണം അവർ തങ്ങളുടെ യുവത്വം മുഴുവനും അധ്വാനിച്ചിരുന്നു.
നിങ്ങളുടെ ആ അധ്വാനം ആണ് ഈ കാണുന്ന മുഴുവൻ മിച്ചമൂല്യവും ഈ മുഴുവൻ സമ്പത്തും എന്ന് ലോകത്താദ്യമായി ഒരു രാഷ്ട്രം സ്വന്തം ജനത്തോടു സത്യം സത്യമായി പറഞ്ഞുകൊടുത്തു. ഈ വാർത്തകൾ പുറത്തുവരാതിരിക്കാനും ഇപ്പോഴത്തെപ്പോലെ സോവിയറ്റ് യൂണിയനെതിരെ വ്യാജ വാർത്തകളും പച്ച നുണകളും പ്രചരിപ്പിക്കാനായിരുന്നു ലോകത്തെ തൊണ്ണൂറു ശതമാനം മാധ്യമങ്ങളും ഉത്സാഹിച്ചത്.
കാരണം അവർക്കു ഭയമായിരുന്നു. എല്ലാവർക്കും വീടും ആരോഗ്യവും തൊഴിലും വരുമാനവും ഭക്ഷണവും വിദ്യാഭ്യാസവും നൽകുന്ന ഒരു നാടിനെ, സോവിയറ്റ് തട്ടിപ്പുകൾ ആയി അവർ ശിശുദിന ആഘോഷങ്ങളെ പരിഹസിച്ചു. അറിയണം ..ഓർക്കണം .. ഇന്ന് ശിശുദിനമായി ചാച്ച നെഹ്‌റുവിനെ സ്മരിക്കുമ്പോൾ ആ പഴയ ലോക ചരിത്രം കൂടി നിരന്തരം പറയേണ്ടതുണ്ട് നമ്മൾക്ക്..
