രണ്ടില വീണ്ടും പിളരുമോ?

| വാമിക

കേരള രാഷ്ട്രീയത്തിന്റെ ജാതകം തിരുത്തിയെഴുതുന്നതിൽ എന്നും നിർണ്ണായക പങ്കുവഹിച്ചിട്ടുള്ള ഒന്നാണ് കേരളാ കോൺഗ്രസിലെ പിളർപ്പുകൾ. തിരഞ്ഞെടുപ്പ് കാലത്തെ പിളർപ്പുകൾ പുത്തരിയല്ലാത്ത ഈ പാർട്ടിക്കുള്ളിൽ 2026-ലെ നിയമസഭാ തിരഞ്ഞെടുപ്പ് മുന്നിൽക്കണ്ട് വീണ്ടും ഒരു പടലപ്പിണക്കം രൂപപ്പെടുന്നു എന്നതാണ് രാഷ്ട്രീയ കേരളത്തിലെ പുതിയ സംസാരവിഷയം. ഇടതുമുന്നണിയിൽ ഉറച്ചുനിൽക്കുന്നവരും യുഡിഎഫിലേക്ക് തിരിച്ചുപോകാൻ ആഗ്രഹിക്കുന്നവരും എന്നിങ്ങനെ പാർട്ടി ഇന്ന് വ്യക്തമായ രണ്ട് തട്ടുകളിലാണ്.

കേരളാ കോൺഗ്രസ് എമ്മിന് നിയമസഭയിലുള്ള അഞ്ച് എംഎൽഎമാരിൽ നാലുപേരും രണ്ട് വ്യത്യസ്ത അഭിപ്രായക്കാരാണ് എന്നതാണ് പാർട്ടി നേരിടുന്ന പ്രധാന വെല്ലുവിളി.

• യുഡിഎഫ് പക്ഷം: പാർട്ടി ചെയർമാൻ ജോസ് കെ. മാണിക്കൊപ്പം എംഎൽഎമാരായ സെബാസ്റ്റ്യൻ കുളത്തിങ്കലും ജോബ് മൈക്കിളും യുഡിഎഫിലേക്ക് മടങ്ങാൻ താല്പര്യം പ്രകടിപ്പിക്കുന്നു എന്നാണ് റിപ്പോർട്ടുകൾ സൂചിപ്പിക്കുന്നത്.
• എൽഡിഎഫ് പക്ഷം: പാർട്ടി മന്ത്രി റോഷി അഗസ്റ്റിനും പ്രമോദ് നാരായണനും ഇടതുമുന്നണിക്കൊപ്പം തന്നെ തുടരണമെന്ന നിലപാടിലാണ്.

ഈയൊരു സാഹചര്യത്തിൽ സ്പീക്കർ പദവിയിലുള്ള എൻ. ജയരാജിന്റെ നിലപാട് അതിനിർണ്ണായകമാകും. രണ്ടാം പിണറായി സർക്കാർ അധികാരത്തിൽ വന്നപ്പോൾ റോഷി അഗസ്റ്റിൻ മന്ത്രിയാകട്ടെ എന്ന നിലപാട് എടുത്തത് ജയരാജായിരുന്നു എന്നതും ശ്രദ്ധേയമാണ്.

മുന്നണി മാറ്റത്തിന്റെ സൂചനകളും സോഷ്യൽ മീഡിയ ചർച്ചകളും അടുത്തകാലത്തായി നടന്ന ചില സംഭവങ്ങൾ ജോസ് കെ. മാണി ഇടതുമുന്നണിയുമായി അകലുന്നു എന്ന അഭ്യൂഹങ്ങൾക്ക് ആക്കം കൂട്ടിയിട്ടുണ്ട്.

1. സത്യാഗ്രഹത്തിലെ അസാന്നിധ്യം: കേന്ദ്ര അവഗണനയ്‌ക്കെതിരെ മുഖ്യമന്ത്രിയുടെ നേതൃത്വത്തിൽ നടന്ന സത്യാഗ്രഹത്തിൽ ജോസ് കെ. മാണി പങ്കെടുത്തില്ല. വിദേശത്ത് പോയതിനാലാണ് അദ്ദേഹം വരാതിരുന്നത് എന്നാണ് ഔദ്യോഗിക വിശദീകരണമെങ്കിലും രാഷ്ട്രീയ കേന്ദ്രങ്ങൾ ഇത് സംശയത്തോടെയാണ് കാണുന്നത്.
2. മധ്യമേഖലാ ജാഥ: ഇടതുമുന്നണിയുടെ മധ്യമേഖലാ ജാഥ നയിക്കുന്നതിൽ നിന്നും ജോസ് കെ. മാണി വിട്ടുനിന്നേക്കും എന്ന് സൂചനയുണ്ട്. ബജറ്റ് സമ്മേളനം കാരണമായി പറയുന്നുണ്ടെങ്കിലും, പകരം എൻ. ജയരാജിനെ ചുമതലയേൽപ്പിക്കാനുള്ള നിർദ്ദേശമാണ് പാർട്ടി മുന്നോട്ടുവെച്ചത്.
3. ഫേസ്‌ബുക്ക് പോസ്റ്റുകൾ: ജോസ് കെ. മാണിയുടെ നീക്കങ്ങൾക്ക് മറുപടിയെന്നോണം മന്ത്രി റോഷി അഗസ്റ്റിനും പ്രമോദ് നാരായണനും മുഖ്യമന്ത്രിയുടെ ചിത്രം ‘തുടരും’ (#2026തുടരും) എന്ന അടിക്കുറിപ്പോടെ പങ്കുവെച്ചത് വലിയ ചർച്ചകൾക്ക് വഴിതുറന്നു,.

യുഡിഎഫിന്റെ ‘വെൽക്കം ബാക്ക്’ കാർഡ്

ജോസ് കെ. മാണിയെ തിരികെ എത്തിക്കാൻ യുഡിഎഫ് ഉന്നതതലത്തിൽ ചർച്ചകൾ തുടങ്ങിക്കഴിഞ്ഞു. സോണിയാ ഗാന്ധി നേരിട്ട് ജോസ് കെ. മാണിയുമായി സംസാരിച്ചുവെന്നും എഐസിസി ജനറൽ സെക്രട്ടറി കെ.സി. വേണുഗോപാൽ ഇതിന് പിന്നിൽ പ്രവർത്തിക്കുന്നുവെന്നുമാണ് വിവരം. മുസ്‌ലിം ലീഗും കേരളാ കോൺഗ്രസിന്റെ തിരിച്ചുവരവിനെ സ്വാഗതം ചെയ്തിട്ടുണ്ട്. പ്രതിപക്ഷ നേതാവ് വി.ഡി സതീശനും പി.കെ കുഞ്ഞാലിക്കുട്ടിയും ജോസ് കെ. മാണിയുമായി സംസാരിച്ചതായും റിപ്പോർട്ടുകളുണ്ട്.