ന്യൂസിലാന്റ് രാജ്യത്തേക്ക് അനധികൃത നഴ്സിംങ് റിക്രൂട്ട്മെന്റുകളിൽ ജാഗ്രത പാലിക്കണമെന്ന് വിദേശകാര്യ മന്ത്രാലയം. കമ്പെറ്റൻസി അസെസ്മെന്റ് പ്രോഗ്രാമിലും (CAP) നഴ്സിംങ് കൗൺസിൽ രജിസ്ട്രേഷനുമായി കേരളത്തില് നിന്നുളള നഴ്സിംങ് പ്രൊഫഷണലുകള് വിസിറ്റിങ് വിസയില് അനധികൃതമായി ന്യൂസിലാന്റിൽ എത്തുന്നത് ശ്രദ്ധയില്പെട്ടതിനെ തുടര്ന്നാണ് കേന്ദ്രവിദേശകാര്യ മന്ത്രാലയം ജാഗ്രതാനിര്ദ്ദേശം നല്കിയത്.
CAP-ൽ പങ്കെടുക്കാൻ വിസിറ്റിങ് വിസയ്ക്ക് ഏജന്റുമാർക്ക് വലിയ തുകകൾ ഉദ്യോഗാര്ത്ഥികള് നല്കുന്നുണ്ട്. CAP പൂർത്തിയാക്കിയിട്ടും നഴ്സിംങ് കൗൺസിൽ രജിസ്റ്റർ ചെയ്ത ശേഷവും, അവിടെ ജോലി കണ്ടെത്താൻ ബുദ്ധിമുട്ട് നേരിടുന്നവരുടെ നിരവധി പരാതികൾ ന്യൂസിലാന്റ് വെല്ലിങ്ടണിലെ ഇന്ത്യന് എംബസിക്ക് ലഭിച്ചിരുന്നു.
ഇതിനെ തുടര്ന്നാണ് ജാഗ്രത പാലിക്കണമെന്ന് ആവശ്യപ്പെട്ട് കേന്ദ്രവിദേശകാര്യ മന്ത്രാലയം ദക്ഷിണേന്ത്യന് സംസ്ഥാനങ്ങളുടെ റസിഡന്റ് കമ്മീഷണര്മാര്ക്ക് കത്ത് നല്കിയത്. കോവിഡ് മഹാമാരിയെ തുടര്ന്ന് ന്യൂസിലാന്റില് ഉണ്ടായിരുന്ന നഴ്സിംങ് ക്ഷാമം ഇന്ത്യയിൽ നിന്നും ഫിലിപ്പീൻസിൽ നിന്നുമുള്ള നഴ്സുമാരുടെ വരവോടെ പരിഹരിക്കപ്പെട്ടിട്ടുണ്ടെന്നും ഇന്ത്യന് എംബസി അറിയിച്ചു. ഇക്കാര്യത്തില് അംഗീകാരമില്ലാത്ത ഏജന്റുമാരുടെ വാഗ്ദാനങ്ങളില് വഞ്ചിതരാകരുത്.
ന്യൂസിലാന്റിലെ നഴ്സിംങ് മേഖലയിലെ വിസയുടെ ആധികാരികതയെ കുറിച്ചും തൊഴിലുടമയെ കുറിച്ചും pol.wellington@mea.gov.in എന്ന ഇമെയില് ഐഡിയില് ആവശ്യമായ രേഖകള് സഹിതം ബന്ധപ്പെട്ടാല് അറിയാന് കഴിയും. റിക്രൂട്ട്മെന്റ് ഏജന്സിയുടെ ആധികാരികത ഉറപ്പാക്കാന് ഇ- മൈഗ്രേറ്റ് (https://emigrate.gov.in) പോര്ട്ടല് സന്ദര്ശിക്കുക. വിദേശ തൊഴിൽ തട്ടിപ്പുകളുമായി ബന്ധപ്പെട്ട പരാതികള് spnri.pol@kerala.gov.in, dyspnri.pol@kerala.gov.in എന്നീ ഇ- മെയിലുകള് വഴിയും, 0471-2721547 എന്ന ഹെല്പ്പ്ലൈന് നമ്പറിലും അറിയിക്കാവുന്നതാണ്.
