ടെൽ അവിവ്: ഗാസ യുദ്ധത്തിന്റെ പ്രാരംഭ ഘട്ടത്തിൽത്തന്നെ എല്ലാ ഇസ്രായേലി തടവുകാരെയും തിരികെ കൊണ്ടുവരാനുള്ള കരാർ സാധ്യമായിരുന്നുവെന്ന് മുൻ ഇസ്രായേലി മേജർ ജനറൽ നിറ്റ്സാൻ അലോൺ. എന്നാൽ രാഷ്ട്രീയ താൽപ്പര്യങ്ങൾക്കായി നെതന്യാഹു സർക്കാർ ഇത് അനാവശ്യമായി നീട്ടിക്കൊണ്ടുപോവുകയായിരുന്നുവെന്നും അദ്ദേഹം വ്യക്തമാക്കി.
വാഷിംഗ്ടൺ ഇൻസ്റ്റിറ്റ്യൂട്ട് ഫോർ നിയർ ഈസ്റ്റ് പോളിസി സംഘടിപ്പിച്ച വെബ്‌കാസ്റ്റിൽ സംസാരിക്കുകയായിരുന്നു അദ്ദേഹം. 2023 ഒക്ടോബർ 7-ലെ ഹമാസ് ആക്രമണത്തിന് മൂന്ന് വർഷം തികയുന്ന വേളയിലാണ് ഈ നിർണായക വെളിപ്പെടുത്തൽ.
നഷ്ടപ്പെട്ടത് സുവർണ്ണാവസരം
“യുദ്ധത്തിന്റെ മറ്റ് തന്ത്രപരമായ ലക്ഷ്യങ്ങളിൽ വലിയ പ്രത്യാഘാതങ്ങളൊന്നുമില്ലാതെ, വളരെ നേരത്തെ, ഒരുപക്ഷേ ഒരു വർഷം മുമ്പോ മറ്റോ ഈ കരാറിലെത്താൻ കഴിയുമായിരുന്നു. വാസ്തവത്തിൽ ഞങ്ങൾക്ക് ആ അവസരം നഷ്ടമായി, യുദ്ധം വളരെ നീണ്ടുപോയി,” അലോൺ പറഞ്ഞു. ഒരു കരാറിൽ ഒപ്പുവെക്കുന്നതിന് മുമ്പ് ഇസ്രായേൽ “പൂർണ്ണ വിജയം” നേടണമെന്ന പ്രധാനമന്ത്രി ബെഞ്ചമിൻ നെതന്യാഹുവിന്റെ വാദം തികച്ചും തെറ്റാണെന്നും അദ്ദേഹം തുറന്നടിച്ചു.
ഒക്ടോബറിലെ വെടിനിർത്തൽ കരാർ വഴി ഹമാസിന്റെ സൈനിക ശക്തിയെ നിയന്ത്രിക്കാൻ സാധിച്ചെങ്കിലും, തടങ്കലിൽ വെച്ച് കൊല്ലപ്പെട്ട പല ബന്ദികളെയും അതിനും വളരെ മുമ്പ് ജീവനോടെ തിരിച്ചെത്തിക്കാൻ കഴിയുമായിരുന്നുവെന്ന് അദ്ദേഹം കൂട്ടിച്ചേർത്തു. ആയിരക്കണക്കിന് ജീവനുകൾ രക്ഷിക്കാൻ ഈ നീക്കം സഹായിച്ചേനെ എന്നും അദ്ദേഹം അഭിപ്രായപ്പെട്ടു.
കടുത്ത വിമർശനവുമായി മുൻ നയതന്ത്രജ്ഞരും
അലോണിന്റെ പ്രസ്താവനയെ ശരിവെച്ചുകൊണ്ട് മുൻ ഇസ്രായേലി നയതന്ത്രജ്ഞൻ അലൻ പിങ്കാസും രംഗത്തെത്തി. 2023 ഒക്ടോബറിലെ ആക്രമണത്തിന് തൊട്ടുപിന്നാലെത്തന്നെ ഒരു കരാർ സാധ്യമായിരുന്നുവെന്നും, ബന്ദികളെ തിരികെ ലഭിക്കാൻ രണ്ട് വർഷമെടുത്തത് നഷ്ടപ്പെടുത്തിയ അവസരം മാത്രമല്ല കടുത്ത ദുരന്തവുമാണെന്ന് അദ്ദേഹം അൽ ജസീറയോട് പ്രതികരിച്ചു.
ആക്രമണങ്ങൾക്ക് ശേഷം പരിമിതമായ വെടിനിർത്തലിന് പകരമായി മുഴുവൻ ബന്ദികളെയും വിട്ടയക്കണമെന്ന ഹമാസിന്റെ അന്നത്തെ നിർദ്ദേശം ഇസ്രായേൽ ഉദ്യോഗസ്ഥർ ബോധപൂർവ്വം തള്ളിക്കളയുകയായിരുന്നു എന്ന് ഖത്തർ പ്രധാനമന്ത്രി ഷെയ്ഖ് മുഹമ്മദ് ബിൻ അബ്ദുൾറഹ്മാൻ ബിൻ ജാസിം അൽതാനിയും വെളിപ്പെടുത്തിയിരുന്നു.
തെരഞ്ഞെടുപ്പ്; ചർച്ചയായി രാഷ്ടീയ വിവാദങ്ങൾ
ഒക്ടോബർ 27-ന് ഇസ്രായേലിൽ നിയമസഭാ തിരഞ്ഞെടുപ്പ് നടക്കാനിരിക്കെയാണ് മുൻ ജനറലിന്റെ ഈ പ്രസ്താവന പുറത്തുവന്നിരിക്കുന്നത്. ഹമാസ് ആക്രമണം തടയുന്നതിൽ നെതന്യാഹു സർക്കാർ പരാജയപ്പെട്ടതിലുള്ള പൊതുജന രോഷം നിലനിൽക്കുന്നതിനിടയിൽ, ഈ വെളിപ്പെടുത്തലുകൾ രാഷ്ട്രീയ രംഗത്ത് വലിയ ചർച്ചയായിട്ടുണ്ട്. അതേസമയം, സുരക്ഷാ മുന്നറിയിപ്പുകൾ അവഗണിച്ചതുമായി ബന്ധപ്പെട്ട് നെതന്യാഹുവിനെതിരെ ഉയർന്ന വൻ ആരോപണങ്ങളും രാജ്യത്ത് വ്യാപക പ്രതിഷേധത്തിന് കാരണമായിട്ടുണ്ട്.
