Warning: Cannot modify header information - headers already sent in /home1/nalamida/public_html/wp-content/plugins/gtranslate/gtranslate.php on line 90
തമിഴ്നാട്ടിൽ ജയിലിൽ നിന്ന് 17 വിചാരണ തടവുകാർ ചാടിപ്പോയി; പരിശോധന ശക്തം | Nalamidam
3 November 2026
Home News National തമിഴ്നാട്ടിൽ ജയിലിൽ നിന്ന് 17 വിചാരണ തടവുകാർ ചാടിപ്പോയി; പരിശോധന ശക്തം

തമിഴ്നാട്ടിൽ ജയിലിൽ നിന്ന് 17 വിചാരണ തടവുകാർ ചാടിപ്പോയി; പരിശോധന ശക്തം

ജയിൽ സുരക്ഷാ സംവിധാനങ്ങളിലെ വീഴ്ചകളുണ്ടായിട്ടുണ്ടോയെന്നും അധികൃതർ പരിശോധിച്ചുവരികയാണ്.

158

ചെന്നൈ: തമിഴ്നാട്ടിലെ തേനി ആണ്ടിപ്പെട്ടി സബ് ജയിലിൽനിന്ന് 17 വിചാരണത്തടവുകാർ രക്ഷപ്പെട്ടു. സുരക്ഷാ ജീവനക്കാരെ ആക്രമിച്ച ശേഷമാണ് ഇവർ ജയിൽ ചാടിയത്. രക്ഷപ്പെട്ടവരിൽ ഒരാളെ ജയിലിന് സമീപത്തെ വനമേഖലയിൽനിന്ന് പൊലീസ് പിടികൂടി. മറ്റുള്ളവർക്കായി തിരച്ചിൽ ഊർജിതമാക്കിയിട്ടുണ്ട്.

ജയിൽ ചാടിയവർ കേരളത്തിലേക്ക് കടക്കാൻ സാധ്യതയുണ്ടെന്ന മുന്നറിയിപ്പിനെ തുടർന്ന് കേരള-തമിഴ്നാട് അതിർത്തിയിലെ ചെക്ക് പോസ്റ്റുകളിൽ ജാഗ്രതാ നിർദേശം നൽകി. ഇടുക്കി വഴി പ്രതികൾ കേരളത്തിലെത്തിയേക്കാമെന്ന സൂചനയുടെ അടിസ്ഥാനത്തിൽ വാഹനപരിശോധനയും ശക്തമാക്കിയിട്ടുണ്ട്.

നാല് പൊലീസുകാർക്ക് ആക്രമണം

രക്ഷപ്പെട്ട 17 തടവുകാരും ഒരേ സെല്ലിലായിരുന്നു കഴിഞ്ഞിരുന്നത്. ജയിലിൽ സുരക്ഷാ ചുമതലയിലുണ്ടായിരുന്ന നാല് പൊലീസുകാരെ ആക്രമിച്ചാണ് ഇവർ പുറത്തുകടന്നതെന്നാണ് വിവരം.

തടവുകാരിൽ ഒരാൾക്ക് സുഖമില്ലെന്ന് അറിയിച്ചതിനെ തുടർന്ന് സുരക്ഷാ ജീവനക്കാർ സെല്ലിനുള്ളിൽ പ്രവേശിച്ചപ്പോഴായിരുന്നു ആക്രമണം. സംഭവത്തിൽ തങ്കപാണ്ടി എന്ന പൊലീസുകാരന് തലയ്ക്ക് പരിക്കേറ്റു. ഇയാളെ സമീപത്തെ ആശുപത്രിയിൽ പ്രവേശിപ്പിച്ചു. മറ്റ് രണ്ട് പൊലീസുകാർക്കും പരിക്കേറ്റിട്ടുണ്ട്.

17 സംഘങ്ങളായി തിരച്ചിൽ

രക്ഷപ്പെട്ടവരിൽ ഭൂരിഭാഗവും വില്ലുപുരം ജില്ലയിൽനിന്നുള്ളവരാണെന്നാണ് പ്രാഥമിക വിവരം. ഇവരുടെ ചിത്രങ്ങളും മറ്റ് വിവരങ്ങളും സമീപത്തെ പൊലീസ് സ്റ്റേഷനുകളിലേക്ക് കൈമാറിയിട്ടുണ്ട്.

തമിഴ്നാട് സൗത്ത് സോൺ ഐജി വിജയേന്ദ്ര ബിദാരിയുടെ നേതൃത്വത്തിൽ 17 സംഘങ്ങളായാണ് തിരച്ചിൽ പുരോഗമിക്കുന്നത്. ജയിലിൽനിന്ന് ഏകദേശം 25 കിലോമീറ്റർ അകലെയുള്ള വർഷനാട് വനമേഖലയിലും വ്യാപക പരിശോധന നടത്തുന്നുണ്ട്.

രക്ഷപ്പെട്ടവരിൽ ചിലർക്കെതിരെ കേരളത്തിലും കേസുകളുണ്ടെന്നാണ് പൊലീസ് നൽകുന്ന വിവരം. ഇതിന്റെ പശ്ചാത്തലത്തിൽ കേരള പൊലീസുമായി ഏകോപിപ്പിച്ചുള്ള പരിശോധനയും ശക്തമാക്കിയിട്ടുണ്ട്.

അതിർത്തിയിൽ കർശന പരിശോധന

കേരളത്തിലേക്ക് കടക്കാനുള്ള സാധ്യത കണക്കിലെടുത്ത് അതിർത്തി ചെക്ക് പോസ്റ്റുകളിൽ വാഹനങ്ങൾ വിശദമായി പരിശോധിക്കുന്നുണ്ട്. പ്രധാന റോഡുകളിലും വനമേഖലയിലേക്കുള്ള വഴികളിലും നിരീക്ഷണം ശക്തമാക്കിയിട്ടുണ്ട്.

രക്ഷപ്പെട്ട തടവുകാരെ ഉടൻ പിടികൂടാനാകുമെന്നാണ് പ്രതീക്ഷയെന്ന് തമിഴ്നാട് സൗത്ത് സോൺ ഐജി വിജയേന്ദ്ര ബിദാരി അറിയിച്ചു. സംഭവത്തിൽ ജയിൽ സുരക്ഷാ സംവിധാനങ്ങളിലെ വീഴ്ചകളുണ്ടായിട്ടുണ്ടോയെന്നും അധികൃതർ പരിശോധിച്ചുവരികയാണ്.