കേരളം ഇന്നുവരെ കാണാത്ത ദുരന്തത്തിന് സാക്ഷിയാവുകയാണ് ഓരോരുത്തരും. ഈ നിമിഷത്തില്‍ ദുരിതബാധിതരെ ചേർത്തുപിടിക്കുകയാണ് സിനിമ മേഖല ഒന്നാകെ. നിരവധി താരങ്ങളാണ് വയനാടിന് കൈത്താങ്ങായി എത്തുന്നത്. ഇപ്പോഴിതാ വയനാടിന് സഹായവുമായി മമ്മൂട്ടിയും ദുൽഖൽ സൽമാനും രംഗത്ത് എത്തി. മമ്മൂട്ടി 20 ലക്ഷം രൂപയും ദുൽഖർ സൽമാൻ 15 ലക്ഷം രൂപയുമാണ് നൽകിയത്. തുക മന്ത്രി പി.രാജീവ് ഏറ്റുവാങ്ങി. മമ്മൂട്ടി കെയർ ഫൗണ്ടേഷൻ്റെ ഭാഗമായാണ് തുക കൈമാറിയത്. ദുരിതാശ്വാസ സഹായവുമായി എറണാകുളം ജില്ലാ ഭരണകൂടത്തിൻ്റെ വയനാട്ടിലേക്കുള്ള ആദ്യവണ്ടി മമ്മൂട്ടി ഫ്‌ളാഗ് ഓഫ് ചെയ്‌തു.
ദുരന്തത്തിൻ്റെ പശ്ചാത്തലത്തിൽ മറ്റു മലയാളി താരങ്ങളും തെന്നിന്ത്യൻ താരങ്ങളും മുഖ്യമന്ത്രിയുടെ ദുരിതാശ്വാസ നിധിയിലേക്ക് ധനസഹായം നൽകി. ഫഹദ് ഫാസിലും നസ്രിയയും മുഖ്യമന്ത്രിയുടെ ദുരിതാശ്വാസ നിധിയിലേക്ക് 25 ലക്ഷം സംഭാവന നൽകി. തൻ്റെ സോഷ്യൽ മീഡിയയിലൂടെയാണ് ഫഹദ് ഈ വിവരം പങ്കുവെച്ചത്. രക്ഷപ്രവർത്തകർക്കൊപ്പം ചേർന്ന് ദുരിതബാധിതർക്ക് കൈത്താങ്ങാകുന്ന ജനങ്ങളോടും സർക്കാർ ഏജൻസികളുടേയും പ്രവർത്തനം അഭിനന്ദാർഹം ആണെന്നും ഫഹദ് കുറിച്ചു.
ഒരു പ്രദേശമാകെ മണ്ണിലലിഞ്ഞില്ലാതായ ദുരവസ്ഥയിൽ കേരളത്തിന് കൈത്താങ്ങായി എത്തുകയാണ് അന്യഭാഷ താരങ്ങളും. മുഖ്യമന്ത്രിയുടെ ദുരിതാശ്വസ നിധിയിലേക്ക് 50 ലക്ഷം സംഭാവന ചെയ്‌തിരിക്കുകയാണ് തമിഴ് താരങ്ങളായ സൂര്യയും ജ്യോതികയും കാർത്തിയും ചേർന്ന്. സൂര്യ തൻ്റെ സോഷ്യൽ മീഡിയയിലൂടെയാണ് 50 ലക്ഷം സംഭാവന നൽകിയ വിവരം ആരാധകരുമായി പങ്കുവെച്ചത്. അനിയൻ കാർത്തിയും ഭാര്യ ജ്യോതികയും ചേർന്നാണ് 50 ലക്ഷം സംഭാവന നൽകിയിരിക്കുന്നത്.
നടൻ വിക്രമാണ് ആദ്യം മുക്യമന്ത്രിയുടെ ദുരിതാശ്വാസ നിധിയിലേക്ക് 20 ലക്ഷം രൂപ നൽകിയത്. ഒട്ടേറെ പേരുടെ ജീവൻ പൊലിയാൻ കാരണമായ ദുരന്തത്തിലുള്ള തൻ്റെ വേദന അറിയിച്ച അദ്ദേഹം പണം സംഭാവന നൽകുകയായിരുന്നു.
