റിയല് എസ്റ്റേറ്റ് മേഖലയിലെ സുതാര്യതയും കാര്യക്ഷമതയും വര്ധിപ്പിക്കുന്നതിന്റെ ഭാഗമായി 2025 ജനുവരിയില് ദുബായില് സ്മാര്ട്ട് വാടക സൂചിക നടപ്പിലാക്കുമെന്ന് ലാന്ഡ് ഡിപാര്ട്ട്മെന്റ് അറിയിച്ചു. വാടകക്കാര്, ഭൂവുടമകള്, നിക്ഷേപകര് എന്നിവരുമായി ബന്ധപ്പെട്ട എല്ലാ വിഭാഗങ്ങള്ക്കും പുതിയ സൂചിക ഫലപ്രദമാകും എന്നാണ് പ്രതീക്ഷ.
നിലവില് ദുബായ് വാടക സൂചിക മൂന്ന് മാസത്തിലൊരിക്കല് പുതുക്കുന്ന സംവിധാനമാണ്. 2024 ഏപ്രിലിലാണ് ദുബായ് ലാന്ഡ് ഡിപാര്ട്ട്മെന്റ് അവസാനമായി വാടക സൂചികയില് മാറ്റം വരുത്തിയത്. അതിന് ശേഷം ദുബായിലെ വിവിധ മേഖലകളില് വാടക ഗണ്യമായി വര്ധിച്ചിരുന്നു.
പുതിയ സ്മാര്ട്ട് വാടക സൂചികക്ക് ഏറ്റവും വലിയ പ്രത്യേകത നിര്മിത ബുദ്ധി ഉപയോഗിച്ചുള്ള കൃത്യമായ റിയല് എസ്റ്റേറ്റ് വിവരങ്ങളുടെ ലഭ്യതയാണ്. വാടക നിരക്കുകള് നീതിയുക്തമായി നിര്ണ്ണയിക്കുന്നതും പുതുക്കുന്നതും ഇതിലൂടെ ഉറപ്പാക്കാനാകും. വാടകയില് അനാവശ്യമായ ഉയര്ച്ച തടയാനാവും ഇതിലൂടെ.
കോവിഡിന് ശേഷമുള്ള കാലഘട്ടത്തില് ദുബായില് വാടക നിരക്കില് ഇടവിട്ട് വര്ധനയുണ്ടായി. 2024ന്റെ മൂന്നാം പാദത്തില് ദുബായില് വാടക 18% വരെ ഉയര്ന്നതായി കണക്കുകള് വ്യക്തമാക്കുന്നു. ജനസംഖ്യയിലെ വര്ധനവ് ആണ് വാടക നിരക്കിലും പ്രതികൂല സ്വാധീനം ചെലുത്തിയത്.
വാടക നിരക്കുകളില് ഉണ്ടായ വലിയ വര്ധനയെത്തുടര്ന്ന് സമീപ എമിറേറ്റുകളിലേക്ക് താമസം മാറുന്നവരുടെ എണ്ണം കൂടി. അബുദബിയിലും വാടക നിരക്കുകള് വര്ധിച്ചതായി റിപ്പോര്ട്ടുകള് വ്യക്തമാക്കുന്നു. വാടക നിരക്കുകളുടെ എളുപ്പത്തിലുള്ള അവലോകനത്തിനായി അബുദബിയും ഔദ്യോഗിക വാടക സൂചിക പുറത്തിറക്കിയിരുന്നു. ദുബായില് സ്മാര്ട്ട് വാടക സൂചിക സംബന്ധിച്ച കൂടുതല് വിവരങ്ങള് അടുത്ത ദിവസങ്ങളില് ദുബായ് ലാന്ഡ് ഡിപാര്ട്ട്മെന്റ് പുറത്ത് വിടുമെന്നാണ് റിപ്പോര്ട്ട്.
