നിങ്ങൾ എന്തെങ്കിലും അപകടത്തിൽപ്പെട്ടിട്ടുണ്ടോ എന്ന് പ്രിയപ്പെട്ടവരെ അറിയിക്കാൻ ഒരു മൊബൈൽ ആപ്പിന് സാധിക്കുമോ? കേൾക്കുമ്പോൾ അല്പം വിചിത്രമെന്ന് തോന്നുമെങ്കിലും ചൈനയിൽ ഇന്ന് തരംഗമായിക്കൊണ്ടിരിക്കുന്ന ‘Are You Dead?’ എന്ന ആപ്പ് ലക്ഷക്കണക്കിന് മനുഷ്യരുടെ ഭയത്തിനും ആശങ്കയ്ക്കും ഒരു ഡിജിറ്റൽ പരിഹാരമായി മാറുകയാണ്.
വളരെ ലളിതമായ ഒരു രീതിയിലാണ് ഈ ആപ്പ് പ്രവർത്തിക്കുന്നത്. ഇതിൽ സൈൻ-അപ്പ് ചെയ്യുന്ന ഉപയോക്താവ് ഓരോ രണ്ട് ദിവസം കൂടുമ്പോഴും ആപ്പിൽ ലോഗിൻ ചെയ്ത് ഒരു ബട്ടൺ ക്ലിക്ക് ചെയ്യണം. രണ്ട് ദിവസം പിന്നിട്ടിട്ടും ഉപയോക്താവ് ‘ചെക്ക്-ഇൻ’ ചെയ്തില്ലെങ്കിൽ, ആപ്പ് ഉടൻ തന്നെ ആ വ്യക്തി നേരത്തെ നൽകിയിട്ടുള്ള എമർജൻസി കോൺടാക്റ്റുകളെ വിവരമറിയിക്കും. ഉപയോക്താവ് എന്തെങ്കിലും അപകടത്തിൽപ്പെട്ടിരിക്കാം എന്ന മുന്നറിയിപ്പാണ് ഇതിലൂടെ നൽകുന്നത്.
കഴിഞ്ഞ വർഷം മെയ് മാസത്തിൽ പുറത്തിറങ്ങിയ ഈ ആപ്പിന് തുടക്കത്തിൽ വലിയ സ്വീകാര്യത ലഭിച്ചിരുന്നില്ല. എന്നാൽ ചൈനയിലെ നഗരങ്ങളിൽ ഒറ്റയ്ക്ക് താമസിക്കുന്ന യുവാക്കൾക്കിടയിൽ ഇത് പെട്ടെന്ന് പ്രചാരം നേടി. ഇന്ന് ചൈനയിൽ ഏറ്റവും കൂടുതൽ ഡൗൺലോഡ് ചെയ്യപ്പെടുന്ന പെയ്ഡ് ആപ്പുകളിൽ ഒന്നായി ഇത് മാറിയിരിക്കുകയാണ്. തനിച്ച് താമസിക്കുന്ന ഐടി ജീവനക്കാർ, വിദ്യാർത്ഥികൾ, ഏകാന്തത ഇഷ്ടപ്പെടുന്നവർ എന്നിവർക്കെല്ലാം സുരക്ഷ ഉറപ്പാക്കുന്ന ഒരു ‘ഡിജിറ്റൽ കൂട്ടാളി’ എന്നാണ് ഈ ആപ്പ് അറിയപ്പെടുന്നത്.
യുവാക്കൾക്കിടയിൽ ഈ ആപ്പിന് ഇത്രയും പ്രിയം ലഭിക്കാൻ കാരണം അവരുടെ ഉള്ളിലെ ആഴത്തിലുള്ള ചില ഭയങ്ങളാണ്. താൻ മരിച്ചാൽ ആരും അറിയില്ലേ, തന്റെ മൃതദേഹം ആര് ഏറ്റെടുക്കും, അന്ത്യകർമ്മങ്ങൾ ആര് ചെയ്യും തുടങ്ങിയ ആശങ്കകൾ ഒറ്റയ്ക്ക് താമസിക്കുന്ന പലർക്കുമുണ്ടെന്ന് ചൈനയിലെ യുവാക്കൾ പറയുന്നു. ആരെയും സഹായത്തിന് വിളിക്കാൻ ഇല്ലാത്ത അവസ്ഥയെ അവർ ഭയപ്പെടുന്നു. ഈയൊരു ശൂന്യതയിലേക്കാണ് ഒരു രക്ഷകനെപ്പോലെ ഈ ആപ്പ് കടന്നുവരുന്നത്.
ആപ്പിന്റെ പ്രവർത്തനം ഉപകാരപ്രദമാണെങ്കിലും അതിന്റെ പേരിനെക്കുറിച്ച് വലിയ വിമർശനങ്ങൾ ഉയരുന്നുണ്ട്. ‘Are you ok?’ അല്ലെങ്കിൽ ‘How are you?’ തുടങ്ങിയ പോസിറ്റീവ് ആയ പേരുകൾ നൽകുന്നതാകും ഉചിതമെന്ന് പലരും അഭിപ്രായപ്പെടുന്നു. ആപ്പിന് പിന്നിലുള്ള കമ്പനിയായ മൂൺസ്കേപ്പ് ടെക്നോളജീസ് ഈ പേര് മാറ്റുന്നതിനെക്കുറിച്ച് ആലോചിക്കുന്നുണ്ടെന്നാണ് റിപ്പോർട്ടുകൾ.
