സൂര്യൻ അസ്തമിക്കുന്നതോടെ നമ്മുടെ നാട്ടിലെ റോഡുകൾ പലപ്പോഴും അപകട മേഖലകളായി മാറുകയാണ് പതിവ്. മങ്ങിയ വെളിച്ചം, ഡ്രൈവർമാരുടെ തളർച്ച, റോഡ് മുറിച്ചുകടക്കുന്ന മൃഗങ്ങൾ എന്നിവ കാരണം ഓരോ വർഷവും ആയിരക്കണക്കിന് അപകടങ്ങളാണ് സംഭവിക്കുന്നത്.
എന്നാൽ വേഗത കുറയ്ക്കുകയും ചില നല്ല ശീലങ്ങൾ സ്വീകരിക്കുകയും ചെയ്യുന്നതിലൂടെ ഈ അപകടസാധ്യതകൾ ഗണ്യമായി കുറയ്ക്കാൻ നമുക്ക് സാധിക്കും. സുരക്ഷിതമായി വീട്ടിലെത്താൻ സഹായിക്കുന്ന, റോഡ് സുരക്ഷാ വിദഗ്ധർ പങ്കുവെക്കുന്ന അഞ്ച് പ്രധാന നിർദ്ദേശങ്ങൾ താഴെ പറയുന്നവയാണ്.
- കാഴ്ച വ്യക്തമാക്കാം: ഹെഡ് ലൈറ്റും വിൻഡ്ഷീൽഡും മങ്ങിയ ഹെഡ്ലൈറ്റുകൾ വെളിച്ചത്തിന്റെ ദൂരം പകുതിയായി കുറയ്ക്കുന്നു എന്നത് പലപ്പോഴും അപകടങ്ങൾക്ക് കാരണമാകാറുണ്ട്. അതിനാൽ, ലൈറ്റുകളുടെ ലെൻസുകൾ തുടച്ചു വൃത്തിയാക്കാനും മങ്ങിയ ബൾബുകൾ ഉണ്ടെങ്കിൽ അവ മാറ്റാനും പ്രത്യേകം ശ്രദ്ധിക്കണം. സൂര്യൻ അസ്തമിക്കുന്നതിന് മുൻപ് തന്നെ വിൻഡ്ഷീൽഡിന് അകത്തും പുറത്തും വൃത്തിയാക്കുന്നത് വഴി കുഴികളും റോഡ് മുറിച്ചുകടക്കുന്ന മൃഗങ്ങളെയും കൃത്യമായി കാണുന്നതിന് ഡ്രൈവർക്ക് സാധിക്കും.
- വെളിച്ചം ഉപയോഗിക്കുമ്പോൾ വേണം അച്ചടക്കം: ഒഴിഞ്ഞ റോഡുകളിൽ ഹൈ-ബീമുകൾ സാധാരണയായി 200 മീറ്റർ വരെ വെളിച്ചം നൽകുമെങ്കിലും, അത് എതിർദിശയിൽ വരുന്ന ഡ്രൈവർമാരുടെ കാഴ്ച മറയ്ക്കാൻ സാധ്യതയുണ്ട്. അതിനാൽ, എതിർദിശയിൽ വാഹനം വരുമ്പോൾ ഉടൻ തന്നെ ലോ-ബീം ഉപയോഗിക്കണം. സ്ട്രീറ്റ് ലൈറ്റുകൾ ഉള്ള ഇടങ്ങളിൽ എപ്പോഴും ലോ-ബീം മാത്രം ഉപയോഗിക്കുക.
- വേഗതയും അകലവും പ്രധാനം: രാത്രികാലങ്ങളിൽ കാഴ്ച പരിമിതമായതിനാൽ പ്രതികരണ സമയം കുറവായിരിക്കും. വെളിച്ചമില്ലാത്ത വഴികളിൽ സാധാരണ വേഗതയെക്കാൾ 10-20 കിലോമീറ്റർ വേഗത കുറയ്ക്കുന്നത് ഉചിതമാണ്. മുന്നിലുള്ള വാഹനവുമായി കൃത്യമായ അകലം പാലിക്കുന്നത് അപ്രതീക്ഷിതമായി ബ്രേക്ക് ഇടേണ്ടി വരുമ്പോൾ പ്രതികരിക്കാൻ നിങ്ങൾക്ക് ആവശ്യമായ സമയം നൽകുന്നു.
- വെളിച്ചത്തിന്റെ വെല്ലുവിളിയും ഉറക്കവും: എതിർദിശയിൽ വരുന്ന വാഹനങ്ങളുടെ അമിത വെളിച്ചമുള്ള എൽഇഡി ലൈറ്റുകൾ നിങ്ങളുടെ കാഴ്ച മറയ്ക്കുന്നുണ്ടെങ്കിൽ, നേരിട്ട് മുന്നോട്ട് നോക്കുന്നതിന് പകരം റോഡിന്റെ ഇടതുവശത്തേക്ക് നോക്കുക. ഇത് താൽക്കാലിക അന്ധത ഒഴിവാക്കാൻ സഹായിക്കും. ഡ്രൈവിംഗിനിടെ ഉറക്കം വരുന്നുണ്ടെങ്കിൽ വണ്ടി നിർത്തി വെള്ളം കുടിക്കാനും ഓരോ രണ്ട് മണിക്കൂറിലും പുറത്തിറങ്ങി അഞ്ച് മിനിറ്റ് നടക്കാനും ശ്രദ്ധിക്കണം.
- അതീവ ജാഗ്രത പുലർത്തുക ഇരുട്ടിൽ മറഞ്ഞിരിക്കുന്ന വാഹനങ്ങളോ ട്രക്കുകളോ കണ്ടെത്താൻ എപ്പോഴും ശ്രദ്ധ വേണം. വണ്ടിയിലെ മിററുകൾ ഇടയ്ക്കിടെ പരിശോധിക്കുകയും വളവുകളിലേക്ക് തിരിയുന്നതിന് മുൻപ് സിഗ്നലുകൾ നൽകുകയും ഹോൺ അടിക്കുകയും ചെയ്യുക. മൂടൽമഞ്ഞോ മഴയോ ഉണ്ടെങ്കിൽ വേഗത പരമാവധി കുറയ്ക്കണം.
