വിനോദം, യാത്ര, ഹോട്ടൽ താമസം, റെസ്റ്റോറന്റുകൾ, സാംസ്കാരിക പരിപാടികൾ തുടങ്ങിയ അനുഭവാധിഷ്ഠിത മേഖലകളിലേക്കുള്ള ഇന്ത്യൻ കുടുംബങ്ങളുടെ ചെലവ് വരും വർഷങ്ങളിൽ ഭൗതിക വസ്തുക്കൾക്കായുള്ള ചെലവിനെ മറികടക്കുമെന്ന് പുതിയ പഠനം. 2025 മുതൽ 2030 വരെയുള്ള കാലയളവിൽ അനുഭവങ്ങൾക്കായുള്ള ചെലവ് വാർഷിക ശരാശരി 10.3 ശതമാനം വളർച്ചാ നിരക്കിൽ ഉയരുമെന്നാണ് റിയൽ എസ്റ്റേറ്റ് സേവന-നിക്ഷേപ സ്ഥാപനമായ സിബിആർഇ (CBRE) പുറത്തുവിട്ട റിപ്പോർട്ട് വ്യക്തമാക്കുന്നത്.
അതേസമയം, ഭൗതിക വസ്തുക്കൾക്കായുള്ള ഗാർഹിക ചെലവ് 9.1 ശതമാനം വാർഷിക വളർച്ചാ നിരക്കിലാണ് ഉയരാൻ സാധ്യത. ഹോട്ടൽ താമസച്ചെലവിൽ മാത്രം 10.6 ശതമാനം വളർച്ച പ്രതീക്ഷിക്കുന്നതായും റിപ്പോർട്ട് ചൂണ്ടിക്കാട്ടുന്നു.
ഇന്ത്യയിൽ ജീവിതശൈലി ഹോട്ടലുകളുടെ സാന്നിധ്യം ഇപ്പോഴും താരതമ്യേന കുറവായതിനാൽ, നിക്ഷേപകർക്കും ഹോട്ടൽ ഡെവലപ്പർമാർക്കും വലിയ സാധ്യതകളാണ് തുറന്നുകിടക്കുന്നത്. നിലവിലുള്ള സ്വതന്ത്ര ഹോട്ടലുകളെ നവീകരിച്ചും ബ്രാൻഡഡ് ലൈഫ്സ്റ്റൈൽ ഹോട്ടലുകളാക്കി മാറ്റിയും ഈ വിപണി കൂടുതൽ വികസിപ്പിക്കാനാകുമെന്നാണ് വിലയിരുത്തൽ.
സോഷ്യൽ മീഡിയയിൽ പങ്കുവയ്ക്കാൻ അനുയോജ്യമായ ആകർഷകമായ ഡിസൈൻ, വ്യക്തിഗത അനുഭവങ്ങൾ, പ്രാദേശിക സംസ്കാരവുമായി ബന്ധിപ്പിക്കുന്ന പരിപാടികൾ, വൈൻ ടേസ്റ്റിംഗ്, സംഗീത പരിപാടികൾ തുടങ്ങിയവയാണ് പുതിയ തലമുറ യാത്രക്കാർ കൂടുതൽ തേടുന്നത്.
സ്വയം ചെക്ക്-ഇൻ, സ്മാർട്ട് റൂം സാങ്കേതികവിദ്യകൾ, വെൽനസ് സൗകര്യങ്ങൾ തുടങ്ങിയവ ഇനി പ്രത്യേക ആകർഷണമല്ല; മറിച്ച് യാത്രക്കാർ പ്രതീക്ഷിക്കുന്ന അടിസ്ഥാന സൗകര്യങ്ങളായി മാറിയിരിക്കുകയാണ്.
ഈ മാറ്റത്തെ മുൻനിർത്തിയാണ് സ്വതന്ത്ര ഹോട്ടലുകളുടെ പ്രത്യേകതയും വലിയ ബ്രാൻഡുകളുടെ പ്രവർത്തന മികവും ഒരുമിപ്പിക്കുന്ന “ലൈഫ്സ്റ്റൈൽ ഹോട്ടൽ” മോഡൽ വേഗത്തിൽ വളരുന്നത്.
കോവിഡിന് ശേഷം അനുഭവാധിഷ്ഠിത ചെലവിൽ കുതിപ്പ്
കോവിഡ് മഹാമാരിക്ക് ശേഷം ആളുകൾ കൂടുതൽ അനുഭവങ്ങൾക്കായി ചെലവിടാൻ തുടങ്ങിയതായും 2022 മുതൽ ഈ പ്രവണത ശക്തമായി തുടരുന്നതായും റിപ്പോർട്ട് വ്യക്തമാക്കുന്നു. പ്രത്യേകിച്ച് ഏഷ്യ-പസഫിക് മേഖലയിലെ ഏറ്റവും വലിയ ജനസംഖ്യാ വിഭാഗമായ ജനറേഷൻ Z ആണ് ഈ മാറ്റത്തിന് പ്രധാന പ്രചോദനമാകുന്നത്.
2015 മുതൽ 2025 വരെ ഏഷ്യ-പസഫിക് മേഖലയിലെ മൊത്തം ഹോട്ടൽ വിതരണ വളർച്ച 5 ശതമാനമായിരുന്നപ്പോൾ, ലൈഫ്സ്റ്റൈൽ ഹോട്ടൽ വിഭാഗം 19 ശതമാനം വളർച്ചയാണ് രേഖപ്പെടുത്തിയത്. 2030 വരെയും ഈ വിഭാഗം വാർഷികം 10 ശതമാനം വളർച്ച നിലനിർത്തുമെന്നാണ് കണക്കുകൂട്ടൽ.
നിക്ഷേപകർക്കും ഹോട്ടൽ മേഖലയ്ക്കും പുതിയ അവസരങ്ങൾ
ലൈഫ്സ്റ്റൈൽ ഹോട്ടലുകൾക്ക് പരമ്പരാഗത ഹോട്ടലുകളേക്കാൾ കൂടുതൽ വരുമാന സാധ്യതയുണ്ടെന്നാണ് പഠനം വ്യക്തമാക്കുന്നത്. 2025-ൽ ഏഷ്യ-പസഫിക് മേഖലയിലെ ഉയർന്ന നിലവാരമുള്ള ലൈഫ്സ്റ്റൈൽ ഹോട്ടലുകൾ സമാന വിഭാഗത്തിലെ സാധാരണ ഹോട്ടലുകളേക്കാൾ 13 ശതമാനം അധിക വരുമാനം ഓരോ മുറിയിൽ നിന്നും നേടിയതായി റിപ്പോർട്ട് ചൂണ്ടിക്കാട്ടുന്നു.
ചെറിയ മുറികൾ ഉണ്ടായിരുന്നെങ്കിലും മികച്ച ഭക്ഷണ-പാനീയ സേവനങ്ങളും കാര്യക്ഷമമായ പ്രവർത്തന രീതികളും കാരണം ഈ ഹോട്ടലുകൾക്ക് കൂടുതൽ ലാഭം നേടാൻ സാധിച്ചുവെന്നാണ് വിലയിരുത്തൽ.
ഇന്ത്യൻ ഉപഭോക്താക്കളുടെ ചെലവിടൽ ശീലങ്ങളിൽ ഉണ്ടാകുന്ന ഈ മാറ്റം രാജ്യത്തെ ടൂറിസം, ഹോസ്പിറ്റാലിറ്റി, വിനോദ മേഖലകൾക്ക് അടുത്ത അഞ്ച് വർഷത്തിനുള്ളിൽ വലിയ വളർച്ചാ അവസരങ്ങൾ ഒരുക്കുമെന്നാണ് വിദഗ്ധരുടെ നിരീക്ഷണം.
