ഐസ്ക്രീം ഇഷ്ടപ്പെടുന്നവർക്ക് ജീവിതത്തിൽ ഒരിക്കലെങ്കിലും സന്ദർശിക്കേണ്ട സ്ഥലങ്ങളുടെ പട്ടികയിൽ ഇടംപിടിക്കുന്ന ഒരു ചെറിയ പട്ടണമുണ്ട് അമേരിക്കയിൽ. അയോവ സംസ്ഥാനത്തിലെ ലെ മാർസ് എന്ന പട്ടണമാണ് ലോകമെമ്പാടും “ലോകത്തിന്റെ ഐസ്ക്രീം തലസ്ഥാനം” എന്ന വിശേഷണത്തിൽ അറിയപ്പെടുന്നത്. വെറും 10,000 ഓളം ജനസംഖ്യ മാത്രമുള്ള ഈ പട്ടണം, അതിശയിപ്പിക്കുന്ന ഐസ്ക്രീം ഉൽപാദന ശേഷിയിലൂടെയും ഐസ്ക്രീം സംസ്കാരത്തിലൂടെയും ലോകശ്രദ്ധ നേടിയിരിക്കുകയാണ്.
1994-ലാണ് ലെ മാർസിന് ഔദ്യോഗികമായി “Ice Cream Capital of the World” എന്ന പദവി ലഭിച്ചത്. ഇതിന് പിന്നിൽ പ്രവർത്തിച്ചത് ലോകപ്രശസ്തമായ വെൽസ് എന്റർപ്രൈസസ്എ ന്ന കമ്പനിയാണ്. ജനപ്രിയ ബ്രാൻഡായ ബ്ലൂ ബണ്ണി ഐസ്ക്രീം നിർമ്മിക്കുന്ന ഈ സ്ഥാപനം ലോകത്തിലെ ഏറ്റവും വലിയ ഐസ്ക്രീം ഉൽപാദന കേന്ദ്രങ്ങളിലൊന്നാണ്.
പ്രതിവർഷം ഏകദേശം 150 ദശലക്ഷം ഗാലൺ, അതായത് 560 ദശലക്ഷം ലിറ്ററിലധികം ഐസ്ക്രീമാണ് ഇവിടെ നിർമ്മിക്കുന്നത്. ഇത്രയും വലിയ തോതിൽ ഒരിടത്ത് ഐസ്ക്രീം ഉൽപാദിപ്പിക്കുന്ന ഫാക്ടറി ലോകത്ത് മറ്റൊന്നില്ലെന്നതാണ് ലെ മാർസിന്റെ പ്രത്യേകത.
ഐസ്ക്രീം നിർമ്മാണത്തിൽ മാത്രം ഒതുങ്ങുന്നതല്ല ലെ മാർസിന്റെ പ്രത്യേകത. പട്ടണത്തിന്റെ സംസ്കാരവും വിനോദസഞ്ചാരവും ഐസ്ക്രീമിനെ ചുറ്റിപ്പറ്റിയാണ് വികസിച്ചിരിക്കുന്നത്. നഗരത്തിലെ വിവിധ ഭാഗങ്ങളിൽ സ്ഥാപിച്ചിരിക്കുന്ന 50-ലധികം ഭീമൻ ഐസ്ക്രീം കോൺ ശിൽപങ്ങൾ സന്ദർശകരുടെ പ്രധാന ആകർഷണമാണ്. ഫോട്ടോഗ്രാഫിക്കും കുടുംബസഞ്ചാരത്തിനും ഈ ശിൽപങ്ങൾ പ്രിയപ്പെട്ട ഇടങ്ങളായി മാറിയിട്ടുണ്ട്.
പട്ടണത്തിലെ വെൽസ് വിസിറ്റർ സെന്റർ & ഐസ്ക്രീം പാർലർ വിനോദസഞ്ചാരികൾക്ക് വ്യത്യസ്തമായ അനുഭവമാണ് സമ്മാനിക്കുന്നത്. ഐസ്ക്രീം നിർമ്മാണത്തിന്റെ ചരിത്രം, ഉൽപാദന പ്രക്രിയ, ഫാക്ടറിയുടെ പ്രവർത്തനങ്ങൾ എന്നിവയെക്കുറിച്ചുള്ള വിവരങ്ങൾ ഇവിടെ ലഭിക്കും. കൂടാതെ ചെറിയ മ്യൂസിയവും സംവേദനാത്മക പ്രദർശനങ്ങളും സന്ദർശകർക്ക് ഒരുക്കിയിട്ടുണ്ട്. ഐസ്ക്രീം പ്രേമികൾക്ക് വർഷം മുഴുവൻ 30-ലധികം വ്യത്യസ്ത രുചികളിലുള്ള ഫ്രഷ് ഐസ്ക്രീമുകൾ ഇവിടെ ആസ്വദിക്കാനാകും.
എല്ലാ വർഷവും ജൂൺ മാസത്തിൽ ലെ മാർസിൽ “ഐസ്ക്രീം ഡേയ്സ്” എന്ന പേരിൽ വിപുലമായ ഉത്സവം സംഘടിപ്പിക്കുന്നു. 2026-ൽ 32-ാം പതിപ്പിലെത്തുന്ന ഈ ആഘോഷത്തിൽ സൗജന്യ ഐസ്ക്രീം വിതരണം, വർണാഭമായ പരേഡുകൾ, സംഗീത പരിപാടികൾ, കാർണിവൽ, കുട്ടികൾക്കും കുടുംബങ്ങൾക്കുമായി വിവിധ വിനോദപരിപാടികൾ എന്നിവ നടക്കും.
ഭക്ഷണവും വിനോദസഞ്ചാരവും ഒരുമിക്കുന്ന അപൂർവ കേന്ദ്രങ്ങളിലൊന്നാണ് ലെ മാർസ്. ലോകത്തിലെ ഏറ്റവും വലിയ ഐസ്ക്രീം ഉൽപാദന കേന്ദ്രം, ഐസ്ക്രീമിനെ ആസ്പദമാക്കിയ വിനോദസഞ്ചാര ആകർഷണങ്ങൾ, വാർഷിക ആഘോഷങ്ങൾ എന്നിവയിലൂടെ ഈ ചെറിയ അമേരിക്കൻ പട്ടണം ഇന്ന് ലോകമെമ്പാടുമുള്ള ഐസ്ക്രീം പ്രേമികളുടെ സ്വപ്നലക്ഷ്യമായി മാറിയിരിക്കുകയാണ്.
