സാൻ ഫ്രാൻസിസ്കോ ആസ്ഥാനമായുള്ള ഓപ്പൺ എഐ കൗമാരക്കാർക്കായി പ്രത്യേകം രൂപകൽപ്പന ചെയ്ത ‘ചാറ്റ് ജിപിടി ഫോർ ടീൻസ്’ അവതരിപ്പിച്ചു. ആർട്ടിഫിഷ്യൽ ഇന്റലിജൻസിനൊപ്പം വളർന്നുവരുന്ന ആദ്യ തലമുറയിലെ കുട്ടികളെ ലക്ഷ്യം വച്ചാണ് ഈ പുതിയ പതിപ്പ് പുറത്തിറക്കിയിരിക്കുന്നത്. വിദ്യാഭ്യാസ ആവശ്യങ്ങൾക്കും ദൈനംദിന സംശയങ്ങൾക്കും ആശ്വാസത്തിനുമായി എഐയെ ആശ്രയിക്കുന്ന കൗമാരക്കാർക്ക് കൂടുതൽ സുരക്ഷിതമായ ഒരു സാഹചര്യം ഒരുക്കുക എന്നതാണ് കമ്പനിയുടെ ലക്ഷ്യം.
13 മുതൽ 17 വയസ്സുവരെയുള്ള കുട്ടികൾക്ക് വേണ്ടിയാണ് ഈ പതിപ്പ് തയ്യാറാക്കിയിരിക്കുന്നത്. ആത്മഹത്യ, സ്വയം ഉപദ്രവിക്കൽ, ലൈംഗികമോ പ്രണയപരമോ ആയ സംഭാഷണങ്ങൾ തുടങ്ങിയ വിഷയങ്ങളിൽ സാധാരണ പതിപ്പിനേക്കാൾ കർശനമായ സുരക്ഷാ നിയന്ത്രണങ്ങൾ ഇതിൽ ഏർപ്പെടുത്തിയിട്ടുണ്ട്. കൗമാരക്കാരുടെ വികാസഘട്ടങ്ങൾക്കനുസൃതമായ രീതിയിൽ അവരെ കൈകാര്യം ചെയ്യണമെന്നും അതേസമയം അനാവശ്യമായ വിവരങ്ങളിലേക്ക് അവർ എത്താതിരിക്കാൻ ശ്രദ്ധിക്കണമെന്നുമാണ് കമ്പനിയുടെ നയമെന്ന് ഓപ്പൺ എഐ ഗ്ലോബൽ പോളിസി വൈസ് പ്രസിഡന്റ് ആൻ ഒ ലിയറി പറഞ്ഞു.
പഠനത്തിലും ഗൃഹപാഠം ചെയ്യുന്നതിലും കുട്ടികളെ സഹായിക്കുന്നതിനായി പ്രത്യേക സംവിധാനം ഇതിലുണ്ട്. നേരിട്ട് ഉത്തരങ്ങൾ നൽകുന്നതിനോ ഉപന്യാസങ്ങൾ എഴുതി നൽകുന്നതിനോ പകരം, കുട്ടികളെ സ്വയം ചിന്തിപ്പിക്കാനും ശരിയായ ഉത്തരത്തിലേക്ക് നയിക്കാനും സഹായിക്കുന്ന രീതിയിലാണ് ഇത് രൂപകൽപ്പന ചെയ്തിരിക്കുന്നത്. ഇതിലൂടെ കുട്ടികളുടെ സ്വതന്ത്രമായ ചിന്താശേഷിയും പഠനത്തോടുള്ള താല്പര്യവും വർദ്ധിപ്പിക്കാൻ സാധിക്കുമെന്ന് ഓപ്പൺ എഐ അവകാശപ്പെടുന്നു. അധ്യാപകർക്കായി നേരത്തെ തന്നെ ഒരു ചാറ്റ് ജിപിടി പതിപ്പ് കമ്പനി പുറത്തിറക്കിയിരുന്നു.
എഐ ചാറ്റ്ബോട്ടുകളെ കൗമാരക്കാർ വൈകാരികമായി അമിതമായി ആശ്രയിക്കുന്നത് സംബന്ധിച്ച ആശങ്കകൾ പരിഗണിച്ചാണ് ഈ പുതിയ നടപടി. ഉപയോക്താവിനോട് ചാറ്റ്ബോട്ടിന് വ്യക്തിപരമായ വികാരങ്ങളുണ്ടെന്ന് തോന്നിക്കുന്ന തരത്തിലുള്ള പ്രതികരണങ്ങൾ ഇതിൽ നിയന്ത്രിക്കും. കൂടാതെ, മാതാപിതാക്കൾക്ക് ഈ അക്കൗണ്ടുകൾ ലിങ്ക് ചെയ്യാനും കുട്ടികളുടെ എഐ ഉപയോഗത്തിന് നിയന്ത്രണങ്ങൾ ഏർപ്പെടുത്താനും സാധിക്കും. രാത്രികാലങ്ങളിൽ ഉപയോഗം തടയുന്നതിനായി ‘ക്വയറ്റ് അവേഴ്സ്’ (Quiet Hours) ക്രമീകരിക്കാനും ഉയർന്ന അപകടസാധ്യതയുള്ള സാഹചര്യങ്ങളിൽ സുരക്ഷാ അറിയിപ്പുകൾ സ്വീകരിക്കാനും മാതാപിതാക്കൾക്ക് അവസരമുണ്ട്.
ഉപയോക്താക്കളുടെ ചോദ്യങ്ങളുടെ സ്വഭാവം വിശകലനം ചെയ്ത് പ്രായം കണക്കാക്കുന്ന ‘ഏജ് അഷുറൻസ്’ സംവിധാനം ഇതിലുണ്ട്. പ്രായപൂർത്തിയാകാത്ത കുട്ടിയാണെന്ന് കണ്ടെത്തിയാൽ അവരെ തനിയെ ചാറ്റ് ജിപിടിയുടെ ടീൻ വേർഷനിലേക്ക് മാറ്റും. ഇൻസ്റ്റാഗ്രാമിലെ ടീൻ അക്കൗണ്ടുകൾക്ക് സമാനമായ കർശനമായ സ്വകാര്യതാ നിയന്ത്രണങ്ങളാണ് ഇതിലും പിന്തുടരുന്നത്. രക്ഷിതാക്കളുടെ നിയന്ത്രണ സംവിധാനങ്ങൾ ഉപയോഗിക്കാൻ കുട്ടിയും രക്ഷിതാവും ഒരുപോലെ സമ്മതം നൽകണമെങ്കിലും, ഈ ഫീച്ചറുകൾ ഇല്ലെങ്കിലും ടീൻ പതിപ്പ് സുരക്ഷിതമായിരിക്കുമെന്ന് കമ്പനി ഉറപ്പുനൽകുന്നു.
