ആരോഗ്യകരമായ ജീവിതത്തിന് ഒരു ശരാശരി മനുഷ്യശരീരത്തിന് ഏകദേശം 6- 8 മണിക്കൂർ ഉറക്കം ആവശ്യമാണ്. നല്ല ഉറക്കത്തിൻ്റെ അഭാവം നിങ്ങളുടെ മാനസികാവസ്ഥയെ വരെ ബാധിച്ചേക്കാം. 6- 8 മണിക്കൂർ സ്ഥിരമായി ഉറങ്ങുന്നത് മാനസികാവസ്ഥ, വൈജ്ഞാനിക പ്രവർത്തനം, ആരോഗ്യം എന്നിവ മെച്ചപ്പെടുത്തുമെന്ന് വിദഗ്ധർ അഭിപ്രായപ്പെടുന്നു. എന്നാൽ കഴിഞ്ഞ 12 വർഷമായി ഒരു ദിവസം 30 മിനിറ്റ് മാത്രം ഉറങ്ങുന്ന ഒരാളെക്കുറിച്ച് നിങ്ങൾക്ക് അറിയാമോ?
ഡെയ്സുകെ ഹോറി എന്ന ജാപ്പനീസുകാരൻ 12 വർഷമായി ദിവസവും 30 മിനിറ്റ് മാത്രം ഉറങ്ങുന്നത് തൻ്റെ ജീവിതദൈർഘ്യം ഇരട്ടിയാക്കാൻ വേണ്ടിയാണെന്ന് സൗത്ത് ചൈന മോണിംഗ് പോസ്റ്റ് റിപ്പോർട്ട് ചെയ്തു. പടിഞ്ഞാറൻ ജപ്പാനിലെ ഹ്യോഗോ പ്രിഫെക്ചറിൽ നിന്നുള്ള 40 വയസ്സുകാരൻ തൻ്റെ ശരീരത്തെയും തലച്ചോറിനെയും കുറഞ്ഞ ഉറക്കത്തിൽ സാധാരണ രീതിയിൽ പ്രവർത്തിക്കാൻ പരിശീലിപ്പിച്ചതായി പറയുന്നു. ഈ രീതി തൻ്റെ പ്രവർത്തനക്ഷമത മെച്ചപ്പെടുത്തിയെന്നും അദ്ദേഹം അവകാശപ്പെട്ടു.
“ഭക്ഷണം കഴിക്കുന്നതിന് ഒരു മണിക്കൂർ മുമ്പ് നിങ്ങൾ കായിക വിനോദങ്ങളിൽ ഏർപ്പെടുകയോ കാപ്പി കുടിക്കുകയോ ചെയ്താൽ നിങ്ങൾക്ക് ഉന്മേഷക്കുറവ് ഒഴിവാക്കാനാകും” എന്ന് ഡെയ്സുകെ പറയുന്നു.
ഫോക്കസ് നിലനിർത്താൻ ദീർഘനിദ്രയേക്കാൾ ഉയർന്ന നിലവാരമുള്ള ഉറക്കം നിർണായകമാണെന്ന് സംരംഭകൻ കൂടിയായ ഹോറി വിശ്വസിക്കുന്നു.
“ജോലിയിൽ സ്ഥിരമായ ശ്രദ്ധ ആവശ്യമുള്ള ആളുകൾക്ക് ദീർഘമായ ഉറക്കത്തേക്കാൾ ഉയർന്ന നിലവാരമുള്ള ഉറക്കത്തിൽ നിന്ന് കൂടുതൽ പ്രയോജനം ലഭിക്കും. ഉദാഹരണത്തിന്, ഡോക്ടർമാർക്കും അഗ്നിശമന സേനാംഗങ്ങൾക്കും വിശ്രമ കാലയളവ് കുറവാണ്, പക്ഷേ ഉയർന്ന കാര്യക്ഷമത നിലനിർത്തുന്നു, ” അദ്ദേഹം പറയുന്നു.
ഹോറിയുടെ അവകാശവാദങ്ങൾക്ക് പിന്നാലെ ജപ്പാനിലെ യോമിയുരി ടിവി, ‘വിൽ യു ഗോ വിത്ത് മി?’ എന്ന പേരിൽ ഒരു റിയാലിറ്റി ഷോയിൽ മൂന്ന് ദിവസം അദ്ദേഹത്തെ സൂക്ഷ്മമായി നിരീക്ഷിച്ചു. ഹോറി ഒരുദിവസം വെറും 26 മിനിറ്റ് ഉറങ്ങി, തൻ്റെ പ്രഭാതഭക്ഷണം കഴിച്ചു. തുടർന്ന് ജോലി ചെയ്യുകയും ജിമ്മിൽ പോവുകയും ചെയ്തു.
കൂടാതെ, ഡെയ്സുകെ 2016 ൽ ജപ്പാൻ ഷോർട്ട് സ്ലീപ്പേഴ്സ് ട്രെയിനിംഗ് അസോസിയേഷൻ രൂപീകരിച്ചു. ഉറക്കത്തെയും ആരോഗ്യത്തെയും കുറിച്ച് അദ്ദേഹം ക്ലാസുകൾ നടത്തുന്നു.
.
തായ് എൻഗോക്ക് എന്ന വിയറ്റ്നാമീസ് മനുഷ്യൻ 60 വർഷത്തിലേറെയായി ഉറങ്ങിയിട്ടില്ലെന്ന റിപ്പോർട്ടുകൾ നേരത്തെ പുറത്തുവന്നിരുന്നു. 1962ൽ കുട്ടിക്കാലത്ത് തനിക്ക് പനി പിടിപെട്ടുവെന്നും അതിനുശേഷം തനിക്ക് ഉറക്കം നഷ്ടപ്പെട്ടുവെന്നുമാണ് 80കാരൻ അവകാശപ്പെടുന്നത്. വ്യത്യസ്ത തെറാപ്പിയും ഉറക്ക ഗുളികകളും ഉണ്ടായിരുന്നിട്ടും തനിക്ക് ഉറങ്ങാൻ സാധിച്ചിട്ടില്ലെന്നും അദ്ദേഹം വെളിപ്പെടുത്തിയിരുന്നു.
