മഹാരാഷ്ട്രയിലെ ഛത്രപതി സംഭാജി നഗറിൽ ഒരു ഐഫോൺ വാങ്ങുന്നതിനെച്ചൊല്ലിയുള്ള തർക്കത്തിന് പിന്നാലെ പതിനെട്ടുകാരനും മാതാപിതാക്കളും മലമുകളിൽനിന്ന് വീണ് അതിദാരുണമായി മരണപ്പെട്ടു. ജീവനേക്കാൾ വലുതാണോ ഒരു മൊബൈൽ ഫോൺ എന്ന ചോദ്യം വീണ്ടും ഉയർത്തുന്നതാണ് ഈ കണ്ണീരണിയിക്കുന്ന സംഭവം. ഒരൊറ്റ നിമിഷത്തെ വാശികൊണ്ട് കുനാൽ ചന്ദ്വാഡെ എന്ന യുവാവും അവനെ രക്ഷിക്കാൻ ശ്രമിച്ച മാതാപിതാക്കളും മലയിടുക്കിലേക്ക് പതിക്കുകയായിരുന്നു.
താൻ ആവശ്യപ്പെട്ട ഐഫോൺ വാങ്ങിനൽകാൻ മാതാപിതാക്കൾ തയ്യാറാകാത്തതിലുള്ള മനോവിഷമത്തിലാണ് കുനാൽ കടുത്ത തീരുമാനത്തിലേക്ക് നീങ്ങിയതെന്ന് ദൃക്സാക്ഷികൾ വ്യക്തമാക്കുന്നു. ഇതിനായി വെള്ളിയാഴ്ച രാവിലെ പത്ത് മണിയോടെ തിസ്ഗാവിന് സമീപമുള്ള ഖാവ്ദ്യാ ദോംഗർ കുന്നിൻ മുകളിലേക്ക് കുനാൽ എത്തി. തനിക്ക് ഐഫോൺ ലഭിച്ചില്ലെങ്കിൽ ജീവനൊടുക്കുമെന്ന ഭീഷണിയുമായി അവൻ മലയുടെ ചെങ്കുത്തായ അരികിൽ നിലയുറപ്പിച്ചു.
വിവരമറിഞ്ഞയുടൻ കുനാലിൻ്റെ പിതാവ് മുരളീധറും മാതാവ് സംഗീതയും ബന്ധുക്കളും നാട്ടുകാരും മലമുകളിലേക്ക് ഓടിയെത്തി. മകനെ അപകടകരമായ ആ സ്ഥലത്തുനിന്നും പിന്തിരിപ്പിക്കാൻ മൂന്ന് മണിക്കൂറോളമാണ് ഇവർ അനുനയശ്രമങ്ങളുമായി ശ്രമിച്ചത്. വൈകാതെ തന്നെ സ്ഥലത്തെത്തിയ എംഐഡിസി വാളൂജ് പോലീസും അഗ്നിശമനസേനയും രക്ഷാപ്രവർത്തനങ്ങൾക്ക് തുടക്കമിട്ടു.
ഈ സമയമത്രയും കുന്നിൻ ചെരുവിൽ കരഞ്ഞുതളർന്നിരുന്ന മാതാപിതാക്കൾ മകനോട് മടങ്ങിവരാൻ നിരന്തരം അപേക്ഷിച്ചു കൊണ്ടിരുന്നു. ഐഫോൺ വാങ്ങിനൽകാം എന്ന് അടക്കം നിരവധി വാഗ്ദാനങ്ങൾ അവർ മുന്നോട്ടു വെച്ചെങ്കിലും കുനാൽ തൻ്റെ തീരുമാനത്തിൽ ഉറച്ചുനിന്നു. കുനാലിനെ രക്ഷിക്കാൻ തന്റെ കൈയിലുള്ള ഐഫോൺ നൽകാമെന്ന് തിസ്ഗാവ് സർപഞ്ച് സഞ്ജയ് ജാദവ് വാഗ്ദാനം ചെയ്തെങ്കിലും അവൻ വഴങ്ങിയില്ല. “ഇനി ഇതിനൊരു പരിഹാരമില്ല, ഒരേയൊരു പരിഹാരം മാത്രമേയുള്ളൂ” എന്നായിരുന്നു അവൻ ആവർത്തിച്ചു പറഞ്ഞത്.
അഗ്നിശമനസേന ഉദ്യോഗസ്ഥർ താഴെ സുരക്ഷാവലകൾ വിരിച്ച് കുട്ടിയെ രക്ഷിക്കാൻ ശ്രമം നടത്തിക്കൊണ്ടിരുന്നു. എന്നാൽ, കുന്നിൻ ചെരുവിൻ്റെ അപകടകരമായ അരികിൽ നിന്നിരുന്ന കുനാൽ നിരന്തരം തൻ്റെ സ്ഥാനം മാറിക്കൊണ്ടിരുന്നത് രക്ഷാപ്രവർത്തനം അതീവ ദുഷ്കരമാക്കി മാറ്റി. ദുർഘടമായ മലയിടുക്കും കുട്ടിയുടെ വിട്ടുവീഴ്ചയില്ലാത്ത മനോനിലയും രക്ഷാപ്രവർത്തകരെ നിസ്സഹായരാക്കി.
സമയം നീണ്ടുപോയിട്ടും മകൻ വാശി മാറ്റാത്തതിനെത്തുടർന്ന്, അവനെ എങ്ങനെയെങ്കിലും സുരക്ഷിതനായി തിരികെ കൊണ്ടുവരാൻ പിതാവ് മുരളീധർ നേരിട്ട് അവനരികിലേക്ക് നീങ്ങി. ഈ നീക്കത്തിൽ അച്ഛനിൽ നിന്നും കുതറിമാറാൻ ശ്രമിച്ച കുനാൽ പുറകോട്ട് ആഞ്ഞുപോയി. തുടർന്ന് അച്ഛൻ മകൻ്റെ കൈപിടിക്കാൻ ആഞ്ഞു ശ്രമിച്ചെങ്കിലും ഇരുവരും നിയന്ത്രണം നഷ്ടപ്പെട്ട് മലഞ്ചെരുവിൽ നിന്ന് താഴേക്ക് പതിക്കുകയായിരുന്നു.
തൻ്റെ ഭർത്താവും ഏക മകനും കൺമുന്നിൽ വൻ താഴ്ചയിലേക്ക് വീഴുന്നത് കണ്ട് സ്തബ്ധയായ സംഗീതയ്ക്ക് ആ ആഘാതം താങ്ങാനായില്ല. പ്രിയപ്പെട്ടവർ ഇല്ലാത്ത ഒരു ലോകത്തെക്കുറിച്ച് ചിന്തിക്കാൻ പോലും കൂട്ടാക്കാതെ ആ അമ്മയും നിമിഷങ്ങൾക്കകം മലമുകളിൽ നിന്ന് താഴേക്ക് ചാടി ജീവനൊടുക്കി. ഒരു കുടുംബം മുഴുവൻ ഒരൊറ്റ നിമിഷം കൊണ്ട് ഇല്ലാതായ ദാരുണമായ കാഴ്ചയ്ക്കാണ് അവിടെയുണ്ടായിരുന്നവർ സാക്ഷ്യം വഹിച്ചത്.
സംഭവ സ്ഥലത്തുണ്ടായവർ പകർത്തിയ ഇവരുടെ അവസാന നിമിഷങ്ങളുടെ ദൃശ്യങ്ങൾ ഇപ്പോൾ സാമൂഹിക മാധ്യമങ്ങളിൽ വലിയ തോതിൽ പ്രചരിക്കുന്നുണ്ട്. ദുർഘടമായ പ്രദേശത്തുനിന്നും വളരെ പാടുപെട്ടാണ് പോലീസ് മൃതദേഹങ്ങൾ കണ്ടെടുത്തത്. മരിച്ച കുടുംബം ജൽന ജില്ലയിലെ ധൻഗർ പിമ്പൽഗാവ് സ്വദേശികളാണെന്നും നിയമപരമായ നടപടികൾക്ക് ശേഷം മൃതദേഹങ്ങൾ ബന്ധുക്കൾക്ക് കൈമാറിയതായും പോലീസും മറ്റ് ഉദ്യോഗസ്ഥരും വ്യക്തമാക്കി.
