പ്രീമിയം മാക്സി സ്‌കൂട്ടർ ശ്രേണിയിൽ പുതിയ മോഡലുകളുമായി അപ്രീലിയ. SXR GT സീരീസിലെ SXR GT 125, SXR GT 175 എന്നീ രണ്ട് സ്‌കൂട്ടറുകളാണ് കമ്പനി ഇന്ത്യൻ വിപണിയിൽ അവതരിപ്പിച്ചത്. യഥാക്രമം 1.11 ലക്ഷം രൂപയും 1.31 ലക്ഷം രൂപയുമാണ് എക്‌സ്-ഷോറൂം വില.
മുൻപ് വിപണിയിലുണ്ടായിരുന്ന SXR 125, SXR 160 മോഡലുകൾ നിർത്തലാക്കിയതിന് പിന്നാലെയാണ് പുതിയ GT സീരീസ് അവതരിപ്പിച്ചിരിക്കുന്നത്. SXR GT 125-ൽ 124.5 സിസി സിംഗിൾ സിലിണ്ടർ എൻജിനാണ് ഉപയോഗിച്ചിരിക്കുന്നത്. 10.6 എച്ച്പി പവറും 10.4 എൻഎം ടോർക്കുമാണ് എൻജിൻ നൽകുന്നത്. SXR GT 175-ൽ 174.7 സിസി സിംഗിൾ സിലിണ്ടർ എൻജിനാണ്. ഇത് 13.3 എച്ച്പി പവറും 14.1 എൻഎം ടോർക്കും ഉത്പാദിപ്പിക്കും.
രണ്ട് മോഡലുകളുടെയും എൻജിനുകൾ BS6 OBD-II Stage B മാനദണ്ഡങ്ങൾ പാലിക്കുന്നവയാണ്. E20 പെട്രോൾ ഉപയോഗിക്കാനും ഇവയ്ക്ക് സാധിക്കും. പുതിയ സീരീസിലെ പ്രധാന മാറ്റങ്ങളിലൊന്ന് 14 ഇഞ്ച് വീലുകളാണ്. മോശം റോഡുകളിലും കുഴികളിലും കൂടുതൽ സ്ഥിരത നൽകുന്നതിനൊപ്പം ഉയർന്ന വേഗതയിലുള്ള യാത്രയിൽ മികച്ച നിയന്ത്രണവും നൽകുന്നതിനാണ് വലിയ വീലുകൾ സഹായിക്കുക.
SXR GT 175-ൽ 5 ഇഞ്ച് TFT ഡിസ്‌പ്ലേ, ബ്ലൂടൂത്ത് കണക്റ്റിവിറ്റി, കോൾ, മ്യൂസിക് കൺട്രോൾ, ടേൺ-ബൈ-ടേൺ നാവിഗേഷൻ എന്നിവ ലഭിക്കും. ഹാൻഡിൽബാർ കൺട്രോളുകൾക്കും സിംഗിൾ-ചാനൽ ABS-നും പുറമെ എക്‌സ്‌ഹോസ്റ്റ് എൻഡ് പൈപ്പിലും ഹീറ്റ് ഷീൽഡിലും മാറ്റങ്ങൾ വരുത്തിയിട്ടുണ്ട്.
അതേസമയം, SXR GT 125-ൽ 5 ഇഞ്ച് LCD ഇൻസ്ട്രുമെന്റ് ക്ലസ്റ്ററാണ് നൽകിയിരിക്കുന്നത്. സിംഗിൾ-ചാനൽ ABS-ന് പകരം CBS ബ്രേക്കിംഗ് സംവിധാനമാണ് ഈ മോഡലിലുള്ളത്. പുതിയ GT സീരീസ് നഗര യാത്രകൾക്കൊപ്പം ദീർഘദൂര യാത്രകളും ലക്ഷ്യമിട്ടാണ് രൂപകൽപ്പന ചെയ്തിരിക്കുന്നത്. പഴയ മാക്സി സ്‌കൂട്ടർ ഡിസൈൻ നിലനിർത്തിക്കൊണ്ട് പുതുക്കിയ എൻജിനുകളും വലിയ വീലുകളും കൂടുതൽ ആധുനിക ഫീച്ചറുകളുമാണ് പുതിയ മോഡലുകളിൽ ഉൾപ്പെടുത്തിയിരിക്കുന്നത്.
