ഗാർഹിക പാചക വാതക (എൽപിജി) സബ്സിഡി ലഭിക്കുന്നതിന് ബയോമെട്രിക് ആധാർ പ്രാമാണീകരണം നിർബന്ധമാക്കി കേന്ദ്ര സർക്കാർ. 2026 ഒക്ടോബർ 1 മുതൽ സബ്സിഡിയോടെയുള്ള നിരക്കിൽ എൽപിജി റീഫിൽ ബുക്ക് ചെയ്യണമെങ്കിൽ ബയോമെട്രിക് ആധാർ ഓതന്റിക്കേഷൻ (BAA) പൂർത്തിയാക്കിയിരിക്കണമെന്ന് പെട്രോളിയം, പ്രകൃതി വാതക മന്ത്രാലയം അറിയിച്ചു.
സബ്സിഡി ആനുകൂല്യം യഥാർഥവും അർഹരുമായ ഗാർഹിക ഉപഭോക്താക്കളിലേക്ക് മാത്രമായി എത്തുന്നുവെന്ന് ഉറപ്പാക്കുകയാണ് നടപടിയുടെ പ്രധാന ലക്ഷ്യമെന്ന് കേന്ദ്രം വ്യക്തമാക്കി. ഗാർഹിക സിലിണ്ടറുകൾ വാണിജ്യ, വ്യാവസായിക ആവശ്യങ്ങൾക്കായി വഴിതിരിച്ചുവിടുന്നത് തടയാനും ഡ്യൂപ്ലിക്കേറ്റ്, അയോഗ്യമായ കണക്ഷനുകൾ കണ്ടെത്തി ഒഴിവാക്കാനും ആധാർ പ്രാമാണീകരണം സഹായിക്കുമെന്നും മന്ത്രാലയം അറിയിച്ചു.
സെപ്റ്റംബർ 19 വരെയുള്ള കണക്കുകൾ പ്രകാരം രാജ്യത്തെ 27.43 കോടി സജീവ ഗാർഹിക എൽപിജി ഉപഭോക്താക്കൾ ബയോമെട്രിക് ആധാർ പ്രാമാണീകരണം ഇതിനകം പൂർത്തിയാക്കിയിട്ടുണ്ട്. ഇത് ആകെ ഉപഭോക്താക്കളുടെ 89.9 ശതമാനമാണ്. ഇവർക്ക് വീണ്ടും പ്രാമാണീകരണം നടത്തേണ്ടതില്ലെന്നും കേന്ദ്രം വ്യക്തമാക്കി.
ബയോമെട്രിക് പ്രക്രിയ പൂർത്തിയാക്കാത്തവർക്ക് നിരവധി മാർഗങ്ങളിലൂടെ ഇത് ചെയ്യാം. സിലിണ്ടർ ഡെലിവറി സമയത്ത്, ഗ്യാസ് വിതരണക്കാരുടെ ഷോറൂമിൽ നേരിട്ടെത്തി, അല്ലെങ്കിൽ ബന്ധപ്പെട്ട എണ്ണ വിപണന കമ്പനികളുടെ മൊബൈൽ ആപ്പുകൾ വഴി വീട്ടിലിരുന്നും പ്രക്രിയ പൂർത്തിയാക്കാം. ഇൻഡെയ്ൻ ഉപഭോക്താക്കൾക്ക് IndianOil ONE, ഭാരത് ഗ്യാസ് ഉപഭോക്താക്കൾക്ക് HelloBPCL, എച്ച്പി ഗ്യാസ് ഉപഭോക്താക്കൾക്ക് HP PAY ആപ്പുകൾ ഉപയോഗിക്കാം.
ബയോമെട്രിക് പ്രാമാണീകരണം നടത്താത്തവർക്ക് എൽപിജി ലഭിക്കുന്നത് പൂർണമായി നിർത്തില്ലെന്നും സർക്കാർ വ്യക്തമാക്കിയിട്ടുണ്ട്. എന്നാൽ സബ്സിഡി ലഭിക്കണമെങ്കിൽ പ്രാമാണീകരണം പൂർത്തിയാക്കേണ്ടിവരും. പ്രാമാണീകരണം നടത്താൻ തയ്യാറല്ലാത്തവർക്ക് ബന്ധപ്പെട്ട എണ്ണക്കമ്പനിയുടെ ഡിജിറ്റൽ സംവിധാനങ്ങളിലൂടെ ഓപ്ഷൻ രജിസ്റ്റർ ചെയ്ത് വിപണി വിലയ്ക്ക്, ലഭ്യത അനുസരിച്ച്, സിലിണ്ടർ വാങ്ങാം.
നിലവിൽ 14.2 കിലോഗ്രാം ഗാർഹിക എൽപിജി സിലിണ്ടറിന് സെപ്റ്റംബർ മാസത്തിൽ ഏകദേശം 210 രൂപയുടെ നിഹിത സബ്സിഡിയാണ് കണക്കാക്കുന്നത്. ജൂണിൽ ഇത് ഏകദേശം 721 രൂപയായിരുന്നു. സബ്സിഡി ആനുകൂല്യം അർഹരായ ഉപഭോക്താക്കളിലേക്ക് കൃത്യമായി എത്തിക്കുന്നതിനാണ് പുതിയ നടപടി സഹായകരമാകുന്നതെന്ന് കേന്ദ്ര സർക്കാർ വ്യക്തമാക്കി.