ശരീരഭാരം കുറയ്ക്കാനുള്ള ശ്രമത്തിൽ ഭക്ഷണക്രമത്തിനൊപ്പം പാനീയങ്ങളിലും ശ്രദ്ധിക്കുന്നവരാണ് പലരും. ഇത്തരത്തിൽ കട്ടൻ ചായയ്ക്ക് (ബ്ലാക്ക് ടീ) ആരോഗ്യസംരക്ഷണത്തിൽ പ്രത്യേക സ്ഥാനമുണ്ട്. പഞ്ചസാര ചേർക്കാതെ കുടിക്കുന്ന കട്ടൻ ചായ ശരീരത്തിലെ കലോറി ഉപഭോഗം കുറയ്ക്കാനും കൊഴുപ്പ് മെറ്റബോളിസത്തെ സ്വാധീനിക്കാനും സഹായിച്ചേക്കാമെന്നാണ് ചില പഠനങ്ങൾ സൂചിപ്പിക്കുന്നത്. എന്നാൽ കട്ടൻ ചായ മാത്രം കുടിച്ചാൽ ശരീരഭാരം കുറയുമോ എന്നതിന് വ്യക്തമായ തെളിവുകളില്ല.
കട്ടൻ ചായയിൽ കലോറി വളരെ കുറവാണ്. പഞ്ചസാര ചേർത്ത ചായ, സോഫ്റ്റ് ഡ്രിങ്കുകൾ, മധുരമുള്ള കാപ്പി എന്നിവയ്ക്ക് പകരം ഇത് കുടിക്കുന്നത് ദിവസേനയുള്ള കലോറി ഉപഭോഗം കുറയ്ക്കാൻ സഹായിക്കും. എന്നാൽ പഞ്ചസാര, തേൻ, ക്രീം എന്നിവ ചേർക്കുന്നത് കലോറിയുടെ അളവ് വർധിപ്പിക്കും.
കട്ടൻ ചായയിൽ അടങ്ങിയിരിക്കുന്ന തിയാഫ്‌ലാവിനുകൾ, തിയാറുബിജിനുകൾ തുടങ്ങിയ പോളിഫെനോളുകൾ ശരീരത്തിലെ കൊഴുപ്പിന്റെയും കാർബോഹൈഡ്രേറ്റുകളുടെയും മെറ്റബോളിസത്തെ സ്വാധീനിച്ചേക്കാം. കുടലിലെ നല്ല ബാക്ടീരിയകളുടെ പ്രവർത്തനത്തെയും ഇവ സഹായിക്കാമെന്നാണ് ചില പഠനങ്ങൾ വ്യക്തമാക്കുന്നത്. എങ്കിലും ശരീരഭാരം കുറയ്ക്കുന്നതിൽ കട്ടൻ ചായയ്ക്കുള്ള നേരിട്ടുള്ള സ്വാധീനം പരിമിതമാണ്.
ആരോഗ്യമുള്ള മുതിർന്നവർക്ക് കഫീൻ സഹിഷ്ണുതയ്ക്കനുസരിച്ച് ദിവസം ഒന്ന് മുതൽ മൂന്ന് കപ്പ് വരെ കട്ടൻ ചായ കുടിക്കാമെന്നാണ് വിദഗ്ധരുടെ നിർദേശം. പഞ്ചസാര ചേർക്കാതെയോ വളരെ കുറച്ച് ചേർത്തോ കുടിക്കുന്നതാണ് ഉചിതം.
കട്ടൻ ചായയിലെ കഫീൻ താൽക്കാലികമായി ഊർജ ചെലവ് വർധിപ്പിക്കുകയും വ്യായാമത്തിന് മുമ്പ് ഉന്മേഷം നൽകുകയും ചെയ്തേക്കാം. എന്നാൽ ആരോഗ്യകരമായ ശരീരഭാരം കൈവരിക്കാൻ സമീകൃതാഹാരം, കൃത്യമായ വ്യായാമം, മതിയായ ഉറക്കം എന്നിവയാണ് പ്രധാനം. കട്ടൻ ചായയെ മാത്രം ആശ്രയിച്ച് ശരീരഭാരം കുറയ്ക്കാനാകില്ലെന്നും ആരോഗ്യവിദഗ്ധർ ചൂണ്ടിക്കാട്ടുന്നു.
