ഇടുക്കിയിലെ മേൽക്കൈ ഇടതുമുന്നണിക്ക് തുടരാനാകുമോ?

അഞ്ച് നിയമസഭ മണ്ഡലങ്ങളുള്ള ഇടുക്കിയിൽ 2021ലെ തിരഞ്ഞെടുപ്പ് ഫലം മൂന്ന് സീറ്റുകൾ ഇടതുമുന്നണിക്കും രണ്ട് സീറ്റുകൾ യുഡിഎഫിനും അനുകൂലമായിരുന്നു. അഞ്ചുവർഷങ്ങൾക്കിപ്പുറം വലിയ മാറ്റമില്ലെന്ന വിലയിരുത്തലുകൾ നിലനിൽക്കുന്നുണ്ടെങ്കിലും, പുതിയ രാഷ്ട്രീയ സൂചനകൾ പോരാട്ടം കടുപ്പിക്കുകയാണ്.

മണ്ഡലം അടിസ്ഥാനത്തിലുള്ള ചിത്രം

ദേവികുളം (സംവരണ മണ്ഡലം)
2006 മുതൽ എൽഡിഎഫിന്റെ ശക്തികേന്ദ്രമാണ് ദേവികുളം. 2016 വരെ എസ്. രാജേന്ദ്രൻ മണ്ഡലത്തെ പ്രതിനിധീകരിച്ചപ്പോൾ, 2021ൽ എ. രാജ വിജയം നേടി. കോൺഗ്രസിന്റെ ഡി. കുമാറിനെ 7,848 വോട്ടുകൾക്ക് പരാജയപ്പെടുത്തിയാണ് ഈ വിജയം.

ഉടുമ്പഞ്ചോല
2001 മുതൽ തുടർച്ചയായി സിപിഎമ്മിന്റെ പിടിയിലാണ് ഈ മണ്ഡലം. കെ.കെ. ജയചന്ദ്രനുശേഷം 2016, 2021 തെരഞ്ഞെടുപ്പുകളിൽ എം.എം. മണി വിജയിച്ചു. 2021ൽ കോൺഗ്രസിന്റെ ഇ.എം. അഗസ്റ്റിയെ 38,305 വോട്ടുകൾക്ക് തോൽപ്പിച്ചാണ് മണിയുടെ രണ്ടാം വിജയം.

തൊടുപുഴ
കേരള കോൺഗ്രസ് വിഭാഗങ്ങൾ തമ്മിലുള്ള പോരാട്ടം ശ്രദ്ധേയമായ മണ്ഡലം. 2011 മുതൽ പിജെ ജോസഫ് മണ്ഡലത്തെ പ്രതിനിധീകരിക്കുന്നു. കേരള കോൺഗ്രസ് (മാണി) വിഭാഗത്തിലെ കെ.ഐ. ആന്റണിയെ 20,259 വോട്ടുകൾക്ക് പരാജയപ്പെടുത്തിയാണ് 2021ൽ വിജയിച്ചത്.

ഇടുക്കി
2001 മുതൽ കേരള കോൺഗ്രസ് (മാണി) വിഭാഗത്തിന്റെ സിറ്റിങ് സീറ്റായ ഇവിടെ റോഷി അഗസ്റ്റിൻ തുടർച്ചയായി വിജയിക്കുന്നു. 2021ൽ കെ. ഫ്രാൻസിസ് ജോർജിനെ 5,573 വോട്ടുകൾക്ക് തോൽപ്പിച്ചു.

പീരുമേട്
സിപിഐയുടെ ശക്തികേന്ദ്രമായ പീരുമേടിൽ 2006 മുതൽ എൽഡിഎഫ് വിജയിച്ചു വരുന്നു. ഇ.എസ്. ബിജിമോളിന് ശേഷം 2021ൽ വാഴൂർ സോമൻ സീറ്റ് നിലനിർത്തി. കോൺഗ്രസിന്റെ സിറിയക് തോമസിനെ 1,835 വോട്ടുകൾക്ക് പരാജയപ്പെടുത്തി.

തദ്ദേശ തെരഞ്ഞെടുപ്പ് സൂചനകൾ

2024 ലോക്സഭാ തിരഞ്ഞെടുപ്പിനും 2025 തദ്ദേശ സ്വയംഭരണ തിരഞ്ഞെടുപ്പിനും പിന്നാലെ ഇടുക്കിയിലെ രാഷ്ട്രീയ കാറ്റ് മാറുന്നുവെന്ന സൂചനകളുണ്ട്. 2025ലെ ഫലത്തിൽ യുഡിഎഫ് ശക്തമായ മുന്നേറ്റമാണ് കാഴ്ചവെച്ചത്.

35 ഗ്രാമ പഞ്ചായത്തുകൾ യുഡിഎഫ് സ്വന്തമാക്കിയപ്പോൾ, എൽഡിഎഫിന് 13 പഞ്ചായത്തുകളിൽ മാത്രമാണ് വിജയം. 16 പഞ്ചായത്തുകൾ എൽഡിഎഫിന് നഷ്ടമായി. ഇടതിന്റെ കോട്ടകളായി കണക്കാക്കിയ പ്രദേശങ്ങളിലും യുഡിഎഫ് മുന്നേറ്റം നടത്തി.

ജില്ലയിലെ രണ്ട് നഗരസഭകളും യുഡിഎഫ് നിലനിർത്തി. രണ്ടിടത്തും വ്യക്തമായ ഭൂരിപക്ഷത്തോടെ അധികാരം ഉറപ്പിച്ചു. ജില്ലാ പഞ്ചായത്തിലും ബ്ലോക്ക് പഞ്ചായത്തുകളിലും യുഡിഎഫ് മേൽക്കൈ നേടി. എട്ട് ബ്ലോക്ക് പഞ്ചായത്തുകളിൽ ഏഴിടത്തും യുഡിഎഫ് വിജയിച്ചു.

ഇടുക്കിയിലെ നിയമസഭാ മണ്ഡലങ്ങളിൽ എൽഡിഎഫ് ഇപ്പോഴും ശക്തമായ നിലയിൽ തുടരുന്നുവെങ്കിലും, തദ്ദേശ തലത്തിലെ പുതിയ രാഷ്ട്രീയ പ്രവണതകൾ യുഡിഎഫിന് ആത്മവിശ്വാസം നൽകുന്നുണ്ട്. ഇടതിന്റെ പഴയ പിടിമുറുക്കം തുടരാനാകുമോ, അല്ലെങ്കിൽ യുഡിഎഫ് ഈ മുന്നേറ്റം നിയമസഭയിലേക്ക് മാറ്റുമോ എന്നതാണ് അടുത്ത തെരഞ്ഞെടുപ്പിൽ നിർണായക ചോദ്യമാകുന്നത്.