മുഖ്യ തിരഞ്ഞെടുപ്പ് കമ്മിഷണർ ഗ്യാനേഷ് കുമാറിന്റെ നിയമനത്തിനെതിരായ പ്രതിഷേധങ്ങളെ ദുർബലപ്പെടുത്താൻ കേന്ദ്ര സർക്കാർ ‘ഭിന്നിപ്പിച്ച് ഭരിക്കുക’ എന്ന തന്ത്രം പയറ്റുകയാണെന്ന് കോക്രോച്ച് ജനതാ പാർട്ടി (സിജെപി) സ്ഥാപകൻ അഭിജിത് ദീപ്കെ ആരോപിച്ചു. വിവിധ പ്രതിഷേധ ഗ്രൂപ്പുകളോട് വിവേചനപരമായി പെരുമാറി അവർക്കിടയിൽ അവിശ്വാസവും സംശയവും സൃഷ്ടിക്കാനാണ് സർക്കാർ ശ്രമിക്കുന്നതെന്നും അദ്ദേഹം വിമർശിച്ചു.
മുൻപ് സിജെപിക്ക് പ്രതിഷേധത്തിന് അനുമതി നൽകിയപ്പോൾ പാർട്ടിയെ ബിജെപി അനുകൂലികളായി ചിത്രീകരിക്കുന്ന ഗൂഢാലോചനാ സിദ്ധാന്തങ്ങൾ ചിലർ പ്രചരിപ്പിച്ചിരുന്നതായി അഭിജിത് ദീപ്കെ പറഞ്ഞു. എന്നാൽ, ഒക്ടോബർ 10ന് ഇന്ത്യാ സഖ്യം നടത്തിയ വലിയ പ്രതിഷേധത്തിനുനേരെ സർക്കാർ അതേ രീതിയിലുള്ള കടുത്ത നടപടി സ്വീകരിച്ചില്ലെന്നാണ് അദ്ദേഹത്തിന്റെ ആരോപണം.
ഒരു പ്രതിഷേധത്തിന് അനുമതി നൽകുകയും മറ്റൊന്നിനെ അടിച്ചമർത്തുകയും ചെയ്യുന്നതിലൂടെ ഒരേ ലക്ഷ്യത്തിനായി പോരാടുന്ന സംഘടനകൾക്കിടയിൽ സംശയം വളർത്തുകയാണ് സർക്കാരിന്റെ നയമെന്ന് അഭിജിത് ദീപ്കെ പറഞ്ഞു. പ്രതിഷേധക്കാർ പരസ്പരം ഏറ്റുമുട്ടുന്ന സാഹചര്യം സൃഷ്ടിച്ച് അധികാരത്തെ ചോദ്യം ചെയ്യുന്ന ശബ്ദങ്ങളെ ദുർബലപ്പെടുത്താനാണ് ശ്രമമെന്നും അദ്ദേഹം ആരോപിച്ചു.
ഇന്ന് ഒരു വിഭാഗത്തിന് പ്രതിഷേധത്തിന് അനുമതി നൽകുകയും മറ്റൊരു വിഭാഗത്തെ തടയുകയും ചെയ്യുന്ന സർക്കാർ നാളെ നിലപാട് മാറ്റിയേക്കാമെന്നും അദ്ദേഹം മുന്നറിയിപ്പ് നൽകി. ആഭ്യന്തര ഭിന്നതകളുടെ കെണിയിൽ വീഴാതെ ഇത്തരം നീക്കങ്ങളുടെ പ്രത്യാഘാതങ്ങൾ തിരിച്ചറിയണമെന്നും വിവിധ പ്രതിഷേധ സംഘടനകളോടും പൊതുജനങ്ങളോടും അദ്ദേഹം അഭ്യർഥിച്ചു.
ഗ്യാനേഷ് കുമാറിന്റെ നിയമനത്തിനെതിരെയും അതിന് പിന്നിലെ സംവിധാനത്തിനെതിരെയുമാണ് തങ്ങളുടെ പോരാട്ടമെന്ന് പ്രതിഷേധക്കാർ മറക്കരുതെന്നും അഭിജിത് ദീപ്കെ പറഞ്ഞു. തെറ്റായ പ്രചാരണങ്ങളിലും ഗൂഢാലോചനാ സിദ്ധാന്തങ്ങളിലും വിശ്വസിച്ച് ഭിന്നിക്കാതെ എല്ലാവരും ഒരുമിച്ച് നിൽക്കേണ്ട സമയമാണിതെന്നും അദ്ദേഹം കൂട്ടിച്ചേർത്തു.
