| രഞ്ജിത്ത് പി തങ്കപ്പൻ
ഇന്ത്യ ഇറാനുമായി ചബഹാർ പോർട്ട് കരാർ ഒപ്പുവച്ചു. നല്ല കാര്യം. ഏതാണ്ട് 2002 ൽ തുടങ്ങിയ ഇന്ത്യൻ നീക്കമാണ് ഒടുവിൽ ഇറാനിലെ തന്ത്രപ്രധാനമായ തുറമുഖം ചുരുങ്ങിയത് പത്തുവർഷ കാലയളവിലേക്കെങ്കിലും കൈവശപ്പെടുത്താൻ ഇന്ത്യക്കു സാധിച്ചിരിക്കുന്നത്. അഫ്ഗാനിസ്ഥാനുമായും വിശിഷ്യാ മിഡിൽ ഈസ്റ്റുമായും ഇന്ത്യക്കു സുഗമമായ വ്യാപാരങ്ങൾ നടത്താൻ സാധിക്കുന്ന തന്ത്രപ്രധാനമായ നീക്കം തന്നെ.
ഏറ്റവും എളുപ്പത്തിൽ ഇക്കാര്യങ്ങൾ ഇന്ത്യക്കു സാധിക്കുമായിരുന്നു പാക്കിസ്ഥാൻ വഴിയുള്ള വ്യാപാര സഞ്ചാരം സാധ്യമായിരുന്നെങ്കിൽ. പക്ഷെ പാകിസ്ഥാൻ ഇത് നിരസിച്ചതോടെ ബദൽ മാർഗ്ഗങ്ങൾ അന്വേഷിക്കാൻ ഇന്ത്യ നിർബന്ധിതമായി.
ഇത്രയും നമുക്ക് ഉത്സാഹം നല്കുന്നവ തന്നെ. എന്നാൽ അഫ്ഗാൻ ധാതു ലവണങ്ങളും ഇറാൻ പ്രകൃതിദത്ത വാതകങ്ങളും എല്ലാം ഇന്ത്യക്കാർക്ക് ഗുണം ചെയ്യുമോ ? ഇല്ല എന്നുതന്നെയാണ് അനുഭവങ്ങൾ. കാരണം ഇന്ത്യൻ മുതലാളിമാരുടെ നാണംകെട്ട ലാഭക്കൊതിതന്നെ. ഈ ലാഭക്കൊതിയാണ് ഇത്രയും കാലമായിട്ടും ഇന്ദിരാ സർക്കാരിനും മുന്നേ തുടങ്ങിയ ഇറാനിൽ നിന്നുമുള്ള വിലകുറഞ്ഞ പ്രകൃതിവാതക ഇന്ധനം ലഭിക്കുന്ന പൈപ്പ്ലൈൻ ഇടനാഴികൾ ഇന്ത്യയിലേക്ക് യാഥാർഥ്യം ആവാതിരിക്കുന്നതിന്റെ കാരണം.
ഇന്ന് അന്താരാഷ്ട്ര വിപണയിൽ വിലകുറഞ്ഞ റഷ്യൻ ക്രൂഡോയിലിന്റെ ഏറ്റവും വലിയ വ്യാപാരപങ്കാളികളിൽ ഒരാൾ ഇന്ത്യയാണ് എന്നിട്ടും എന്തുകൊണ്ട് നമുക്ക് ഇന്ധന വില കുറയുന്നില്ല എന്നിടത്താണ് മോഡി സർക്കാരും ഇന്ത്യൻ മുതലാളിമാരും ചേർന്നുള്ള കുതികാൽവെട്ടൽ നടക്കുന്നത്.
ആടെന്തറിയുന്നു അങ്ങാടി വാണിഭം എന്ന പോലെ, ലോകത്തെ ഐടി കുതിച്ചുചാട്ടത്തിലെ ഏറ്റവും അമൂല്യമായ ധാതുക്കളുടെ വിളനിലമായ അഫ്ഗാനെ വരുതിയിലാക്കാൻ ആണ് അമേരിക്ക അടക്കമുള്ള ലോകശക്തികളുടെ ഈ നീണ്ടകാലമുള്ള യുദ്ധങ്ങളുടെ ഒക്കെയും പിന്നാമ്പുറ കഥകൾ. ഇന്നതിൽ സമർത്ഥമായി ചൈന ഇടപെടുന്നു.
പുതിയ ചബഹാർ പോർട്ട് കരാർ വഴി ഇന്ത്യക്കും അതിൽ സമർത്ഥമായി ഇടപെടാൻ സാധിക്കും ധാതുമൂലകങ്ങൾ പുതിയ വ്യാവസായിക കുതിച്ചുചാട്ടങ്ങൾക്കു നിലമൊരുക്കും. ആർക്ക് ? എന്നതാണ് ചോദ്യം ചൈനയിൽ അത് ജനസാമാന്യത്തിനു ലഭിക്കുമ്പോൾ ഇന്ത്യയിൽ അത് കോർപ്പറേറ്റു മുതലാളി കള്ളന്മാർക്ക് മാത്രമായി ലഭിക്കും എന്നിടത്താണ് അതിന്റെ ചതിയും.
കരാർ ഉണ്ടാക്കിയാലും ആരും വാതക പൈപ്പുലൈനുകളെ കുറിച്ച് മിണ്ടില്ല എന്നതാണ് ഇന്ത്യൻ മോഡി മീഡിയകളുടെ ശക്തിയും. സ്വാഭാവികമായും മോദിയുടെ മൈ പ്രണ്ട് രാഷ്ട്രം അമേരിക്ക ഇന്ത്യയെ ഭീഷണിപ്പെടുത്തിക്കഴിഞ്ഞു ഇറാനുമായുള്ള കരാറിന്റെ പേരിൽ .. വരും നാടകങ്ങൾ എന്താവും ? കാത്തിരുന്നുകാണാം.
