കേരളത്തിന്റെ സ്വപ്നപദ്ധതിയായ കോഴിക്കോട്-വയനാട് ജില്ലകളെ ബന്ധിപ്പിക്കുന്ന ഇരട്ട തുരങ്കപാതയുടെ നിര്മ്മാണ ഉദ്ഘാടനം മുഖ്യമന്ത്രി പിണറായി വിജയന് നിര്വ്വഹിച്ചു. തുരങ്കപാത പൂര്ത്തിയാകുമ്പോള് ഇന്ത്യയിലെ തന്നെ ഏറ്റവും ദൈര്ഘ്യമുള്ള മൂന്നാമത്തെ തുരങ്കപാതയായിരിക്കും ഇതെന്ന് മുഖ്യമന്ത്രി പറഞ്ഞു.
താമരശ്ശേരി ചുരം വഴിയുള്ള ഗതാഗതക്കുരുക്കിന് ശാശ്വത പരിഹാരമാകും. പ്രകടനപത്രികയിലെ വാഗ്ദാനമാണ് തുരങ്കപാത. പല വാഗ്ദാനങ്ങളും ജനങ്ങള് കണ്ടതാണ്. 2016 ശേഷം നല്കിയ വാഗ്ദാനങ്ങള് നടപ്പാക്കപ്പെടുമെന്ന ശുഭപ്രതീക്ഷ ജനങ്ങള്ക്കുണ്ടായെന്നും മുഖ്യമന്ത്രി പറഞ്ഞു. നിലവില് കച്ചവട ആവശ്യങ്ങള്ക്കും മറ്റും വയനാട്ടിലേക്ക് പോകാന് കിലോമീറ്ററുകള് താണ്ടണം.
മണിക്കൂറുകള് ഗതാഗത കുരുക്കില് കിടക്കണം. തുരങ്ക പാത യാഥാര്ഥ്യമായാല് ഇതിനൊക്കെ പരിഹാരമാകുമെന്നാണ് ജനങ്ങള് പ്രതീക്ഷിക്കുന്നത്. ആനക്കാംപൊയിലിന്റെയും സമീപ പ്രദേശങ്ങളുടെയും വികസന കുതിപ്പിന് കൂടി തുരങ്ക പാത വഴിത്തുറക്കും. കിഫ്ബി ധനസഹായത്താല് 2134 കോടി രൂപ ചെലവഴിച്ചാണ് തുരങ്കപാതയുടെ നിര്മാണം.
