ഭൂമിക്ക് ഭീഷണിയാകുന്ന വലിയ ഛിന്നഗ്രഹങ്ങളെ തകർക്കാനോ അവയുടെ സഞ്ചാരപാത മാറ്റാനോ ഉള്ള ഏറ്റവും ഫലപ്രദമായ മാർഗം കണ്ടെത്തിയതായി ചൈനീസ് ശാസ്ത്രജ്ഞർ അവകാശപ്പെടുന്നു. ബെയ്ജിങ്ങിലെ ചൈന അക്കാദമി ഓഫ് ലോഞ്ച് വെഹിക്കിൾ ടെക്നോളജിയിലെ ഗവേഷകരാണ് ഈ പുതിയ കണ്ടെത്തലുകൾക്ക് പിന്നിൽ. ഛിന്നഗ്രഹത്തിന്റെ ഉപരിതലത്തിൽ ആഴത്തിൽ തുളച്ചുകയറി ആണവ ബോംബ് നിക്ഷേപിച്ച് സ്ഫോടനം നടത്തുന്ന രണ്ട് ഘട്ടങ്ങളുള്ള പ്രതിരോധ രീതിയാണ് ഇവർ മുന്നോട്ടുവെച്ചിരിക്കുന്നത്.
ഈ പദ്ധതി പ്രകാരം, ആദ്യം ഒരു മെറ്റൽ പെനട്രേറ്റർ അതിവേഗത്തിൽ ഛിന്നഗ്രഹത്തിലേക്ക് ഇടിച്ചിറക്കി ആഴത്തിലുള്ള ഒരു ദ്വാരമുണ്ടാക്കുന്നു. ഇതിനുപിന്നാലെ രണ്ടാമതൊരു ബഹിരാകാശ പേടകം ഉപയോഗിച്ച് ഈ ദ്വാരത്തിലേക്ക് ആണവ ബോംബ് നിക്ഷേപിക്കുകയും തുടർന്ന് സ്ഫോടനം നടത്തുകയുമാണ് ചെയ്യുന്നത്. ‘സ്പേസ്: സയൻസ് & ടെക്നോളജി’ എന്ന ജേണലിൽ പ്രസിദ്ധീകരിച്ച സിമുലേഷൻ പഠനങ്ങളിലാണ് ഈ പുതിയ കണ്ടെത്തലുകൾ വിശദീകരിച്ചിരിക്കുന്നത്.
മൂന്ന് മെഗാടൺ ശേഷിയുള്ള ഒരു സ്ഫോടനത്തിലൂടെ 100 മീറ്റർ (328 അടി) വീതിയുള്ള ഛിന്നഗ്രഹത്തെ പൂർണ്ണമായും തകർക്കാൻ സാധിക്കുമെന്ന് പഠനം വ്യക്തമാക്കുന്നു. ഇത് ഏകദേശം 200 ഹിരോഷിമ ബോംബുകൾക്ക് തുല്യമായ പ്രഹരശേഷിയുള്ള ഒന്നായിരിക്കും. ഇത്രയും വലിയ ശക്തിയിലുള്ള സ്ഫോടനം ഛിന്നഗ്രഹത്തെ ഇല്ലാതാക്കാൻ പര്യാപ്തമാണെന്ന് ശാസ്ത്രജ്ഞർ ചൂണ്ടിക്കാട്ടുന്നു.
ഛിന്നഗ്രഹത്തിന്റെ ഉപരിതലത്തിൽ ബോംബ് സ്ഫോടനം നടത്തുന്നതിനേക്കാൾ മൂന്നിരട്ടിയിലധികം വേഗ വ്യതിയാനം ഉപരിതലത്തിന് 30 മീറ്റർ താഴെയായി നടത്തുന്ന സ്ഫോടനം വഴി ലഭിക്കും. ഇത്തരത്തിൽ വേഗതയിൽ മാറ്റം വരുത്തുന്നത് വഴി ഛിന്നഗ്രഹത്തെ ഭൂമിയുടെ സഞ്ചാരപാതയിൽനിന്ന് മാറ്റിവിടാൻ കൂടുതൽ എളുപ്പത്തിൽ സാധിക്കും. ഇത് സാധാരണ ഗതിയിലുള്ള ഉപരിതല സ്ഫോടനങ്ങളെക്കാൾ ഉയർന്ന പ്രതിരോധ ശേഷിയുള്ള രീതിയാണെന്ന് ശാസ്ത്രജ്ഞർ അവകാശപ്പെടുന്നു.
1998-ൽ പുറത്തിറങ്ങിയ പ്രശസ്തമായ ‘ആർമഗെഡൺ’ (Armageddon) എന്ന ഹോളിവുഡ് സിനിമയിലെ രീതിയെ ഓർമ്മിപ്പിക്കുന്നതാണ് ഈ പദ്ധതിയെങ്കിലും, ഇതിൽ മനുഷ്യർ നേരിട്ട് ബഹിരാകാശത്ത് പോകുന്നില്ല. പകരം പൂർണ്ണമായും മനുഷ്യരില്ലാത്ത ബഹിരാകാശ പേടകങ്ങൾ ഉപയോഗിച്ചാണ് ഇത് നടപ്പിലാക്കുന്നത് എന്നതിനാൽ സങ്കീർണ്ണത കുറവാണെന്നും ചൈന അവകാശപ്പെടുന്നു.
