മണിപ്പൂരിൽ വീണ്ടും അശാന്തി പടരുന്നു. ടമെൻഗ്ലോങ് ജില്ലയിൽ ഗർഭിണിയായ സ്ത്രീ ഉൾപ്പെടെ നാല് കുക്കി വിഭാഗക്കാർ കൊല്ലപ്പെട്ട സംഭവത്തിന് പിന്നാലെ നാഗ വിഭാഗക്കാരുടെ വീടുകൾക്ക് നേരെ ആക്രമണം. ആളൊഴിഞ്ഞ വീടുകളാണ് ഇന്ന് പുലർച്ചെയോടെ തീവെച്ച് നശിപ്പിച്ചത്. കൊലയാളികൾ നാഗ വിഘടനവാദികളാണെന്നുള്ള ആരോപണമാണ് സംഘർഷത്തിന് കാരണം.
ആക്രമണം ലോങ്പി, ടോളൻ ഗ്രാമങ്ങളിൽ
ലോങ്പി, ടോളൻ എന്നീ ഗ്രാമങ്ങളിലായിട്ടാണ് ഇന്നലെ ആക്രമണങ്ങളുണ്ടായത്. ഇത് കുക്കി ജനതയ്ക്ക് എതിരെയുള്ള ഭീകരവാദ ആക്രമണമാണെന്ന് ‘വെസ്റ്റേൺ വില്ലേജേഴ്സ് വോളൻ്റിയർസ്’ ശക്തമായി ആരോപിച്ചു.
കുക്കി ഗ്രാമങ്ങളിൽ മതിയായ കേന്ദ്ര സേനയുടെ സുരക്ഷ ഏർപ്പെടുത്തണമെന്നും അക്രമികളെ ഉടൻ പിടികൂടണമെന്നും ഇവർ ആവശ്യപ്പെട്ടു. ഈ ആവശ്യങ്ങൾ അംഗീകരിച്ചില്ലെങ്കിൽ ശക്തമായ അനിശ്ചിതകാല ബന്ദിലേക്ക് നീങ്ങുമെന്നും സംഘടന മുന്നറിയിപ്പ് നൽകിയിട്ടുണ്ട്. സംഭവസ്ഥലത്ത് നിലവിൽ സുരക്ഷാ സേന ക്യാമ്പ് ചെയ്യുന്നുണ്ടെങ്കിലും പ്രദേശത്ത് കനത്ത ഉത്കണ്ഠ തുടരുകയാണ്.
