ക്ഷേത്ര പരിപാടിക്കിടെ ‘നന്ദഗോവിന്ദം ഭജൻസ്’ ക്രിസ്തീയ ഭക്തിഗാനം ആലപിച്ചതിനെ ചൊല്ലി സംഘ്പരിവാർ വൃത്തങ്ങളിൽ ആഭ്യന്തര ഭിന്നത രൂക്ഷമാകുന്നു. ട്രൂപ്പിനെതിരെ നടക്കുന്ന സൈബർ ആക്രമണങ്ങളെ വിമർശിച്ച യുവമോർച്ച സംസ്ഥാന സെക്രട്ടറി അഥീന ഭാരതിക്കെതിരെയും ശക്തമായ പ്രതിഷേധം ഉയർന്നു.
അഥീന അലക്സിന്റെ പ്രതികരണങ്ങൾക്കെതിരെ സംഘ്പരിവാർ അനുകൂല സൈബർ ഹാൻഡിലുകൾ രംഗത്തെത്തി. “ബി.ജെ.പി പ്രവർത്തകർക്ക് അഥീനയുടെ സൺഡേ ക്ലാസ് വേണ്ട”, “അഥീന അലക്സ് ഹിന്ദുവിന്റെ അവസാന വാക്കല്ല” തുടങ്ങിയ വിമർശനങ്ങളാണ് ഉയർന്നത്.
ഇതിന് മറുപടിയായി, താൻ സൺഡേ സ്കൂളിൽ പഠിച്ചിട്ടില്ലെന്നും, ഹിന്ദു ഐക്യവേദി നേതാവ് കെ.പി. ശശികല ടീച്ചറെ ഏറെ ബഹുമാനിക്കുന്ന ആളാണെന്നും അഥീന വ്യക്തമാക്കി. ആർ.എസ്.എസ് സ്ഥാപകൻ ഡോ. കേശവ ബലറാം ഹെഡ്ഗേവാറിന്റെ “നമ്മളെ തകർക്കാൻ പുറത്തുള്ളവർക്ക് കഴിയില്ല, അകത്തുള്ളവർക്കേ കഴിയൂ” എന്ന വാക്കുകൾ ഉദ്ധരിച്ച് ഫേസ്ബുക്കിൽ കുറിപ്പ് പങ്കുവച്ചതോടെയാണ് വിവാദം ശക്തമായത്.
ക്ഷേത്രത്തിൽ ക്രിസ്തീയ ഭക്തിഗാനം ആലപിച്ചതിൽ ഔചിത്യക്കുറവ് ഉണ്ടെന്ന് സമ്മതിച്ചുകൊണ്ടെങ്കിലും, അതിനെ തുടർന്നുണ്ടായ അതിരുകടന്ന പ്രതികരണങ്ങളാണ് കൂടുതൽ അപകടകരമെന്ന് അഥീന അഭിപ്രായപ്പെട്ടു. ഇത്തരം പ്രവണതകൾ പൊതുസമൂഹത്തിന് മുന്നിൽ സംഘടനകളെ അപഹാസ്യരാക്കുന്നുവെന്നും അവർ ചൂണ്ടിക്കാട്ടി.
നന്ദഗോവിന്ദം ഭജൻസ് പരിപാടി ഭക്തിസംഗീതത്തിലൂടെ യുവാക്കളെ ക്ഷേത്രങ്ങളിലേക്ക് ആകർഷിക്കുന്നതിൽ പ്രധാന പങ്കുവഹിച്ചുവെന്നും, വിവിധ രാഷ്ട്രീയ പശ്ചാത്തലങ്ങളിലുള്ളവരെ പോലും ഒരുമിപ്പിക്കാൻ കഴിഞ്ഞുവെന്നും അഥീന തന്റെ കുറിപ്പിൽ പറഞ്ഞു. വിവാദമായ ഗാനം ആലപിക്കുന്നതിന് മുമ്പ് സദസിൽ ഉണ്ടായിരുന്നവരോട് അനുമതി തേടിയിരുന്നുവെന്നും, ആരും എതിർപ്പ് പ്രകടിപ്പിച്ചിരുന്നില്ലെന്നും അവർ കൂട്ടിച്ചേർത്തു.
അതേസമയം, അഥീനയുടെ നിലപാടിനെതിരെ സംഘ്പരിവാർ കേന്ദ്രങ്ങളിൽ നിന്ന് കടുത്ത വിമർശനങ്ങളാണ് ഉയർന്നത്. ക്ഷേത്രാചാരങ്ങളിൽ ഇടപെടേണ്ടതില്ലെന്നും, അതുമായി ബന്ധപ്പെട്ട കാര്യങ്ങളിൽ പരിചയസമ്പന്നരായ നേതാക്കളുണ്ടെന്നും ചിലർ അഭിപ്രായപ്പെട്ടു.
ഈ വിഷയത്തെ തുടർന്ന് സാമൂഹ്യ മാധ്യമങ്ങളിൽ കടുത്ത വാദപ്രതിവാദങ്ങളാണ് നടക്കുന്നത്.
