ഓപ്പറേഷൻ സിന്ദൂരിൽ കഴിഞ്ഞ ആഴ്‌ച പാകിസ്ഥാൻ വ്യോമ താവളങ്ങളിൽ ഇന്ത്യ നടത്തിയ ആക്രമണത്തിൻ്റെ പുതിയ ഉപഗ്രഹ ചിത്രങ്ങൾ എൻ‌ഡി‌ടി‌വിക്ക് ലഭിച്ചു. കഴിഞ്ഞ മാസം ജമ്മു കാശ്‌മീരിലെ പഹൽഗാമിൽ നടന്ന മാരകമായ ഭീകര ആക്രമണത്തിന് മറുപടിയായി ആരംഭിച്ച ഓപ്പറേഷൻ സിന്ദൂർ തുടങ്ങിയത്.
ഇന്ത്യയുടെ പടിഞ്ഞാറൻ മേഖലയിലെ സിവിലിയൻ പ്രദേശങ്ങളെയും സൈനിക അടിസ്ഥാന സൗകര്യങ്ങളെയും ലക്ഷ്യമിട്ടുള്ള പാകിസ്ഥാൻ്റെ ഡ്രോൺ, മിസൈൽ ആക്രമണങ്ങളെ ചെറുക്കുന്നതിനായാണ് ഇന്ത്യൻ സായുധ സേന വ്യോമ താവളങ്ങൾ ലക്ഷ്യമിട്ടത്.
റാവൽപിണ്ടിയിലെ നൂർ ഖാൻ, സിന്ധിലെ സുക്കൂർ, പാകിസ്ഥാനിലെ പഞ്ചാബിലെ റഹിം യാർ ഖാൻ എന്നീ പാകിസ്ഥാൻ സൈനിക താവളങ്ങളിൽ ഇന്ത്യൻ സായുധ സേന നടത്തിയ നിരന്തരമായ കൃത്യതയുള്ള ആക്രമണങ്ങൾ മൂലമുണ്ടായ നാശനഷ്‌ടങ്ങളുടെ വ്യാപ്‌തി യുഎസ് എയ്‌റോസ്‌പേസ് സ്ഥാപനമായ മാക്‌സർ ടെക്‌നോളജീസിൻ്റെ ഉയർന്ന റെസല്യൂഷൻ ചിത്രങ്ങൾ വ്യക്തമാക്കുന്നു.
സർഗോധയിലെ മുഷഫ്, വടക്കൻ സിന്ധിലെ ഷഹബാസ് ജേക്കബാബാദ്, വടക്കൻ തട്ടയിലെ ബൊളാരി എന്നീ പാകിസ്ഥാൻ വ്യോമസേനാ (പിഎഎഫ്) താവളങ്ങൾക്കും കേടുപാടുകൾ സംഭവിച്ചതായി ചിത്രങ്ങൾ കാണിക്കുന്നു.
കഴിഞ്ഞ ആഴ്‌ച ഓപ്പറേഷൻ സിന്ദൂരിനെ കുറിച്ചുള്ള ഒരു പത്രസമ്മേളനത്തിൽ, ഇന്ത്യൻ സായുധ സേന പാകിസ്ഥാൻ സൈനിക ലക്ഷ്യങ്ങളിൽ “കൃത്യമായ ആക്രമണം” നടത്തിയതായി വിംഗ് കമാൻഡർ വ്യോമിക സിംഗ് സ്ഥിരീകരിച്ചു.
സാങ്കേതിക അടിസ്ഥാന സൗകര്യങ്ങൾ, കമാൻഡ് ആൻഡ് കൺട്രോൾ സെൻ്റെറുകൾ, റഡാർ സൈറ്റുകൾ, ആയുധ സംഭരണ മേഖലകൾ എന്നിവ ഇതിൽ ഉൾപ്പെടുന്നുവെന്ന് അവർ പറഞ്ഞു.
ഇന്ത്യൻ വ്യോമ സേനയുടെ യുദ്ധവിമാനങ്ങളിൽ നിന്നുള്ള എയർ- ലോഞ്ച്ഡ് പ്രിസിഷൻ ആയുധങ്ങൾ ഉപയോഗിച്ചാണ് റാഫിഖി, മുരീദ്, ചക്ലാല, റഹിം യാർ ഖാൻ, സുക്കൂർ, ചുനിയൻ എന്നിവിടങ്ങളിലെ പാകിസ്ഥാൻ സൈനിക ലക്ഷ്യങ്ങൾ ആക്രമിച്ചതെന്ന് അവർ പറഞ്ഞു.
പസ്‌റൂരിലെയും സിയാൽകോട്ടിലെയും വ്യോമയാന കേന്ദ്രങ്ങളിലെ റഡാർ സൈറ്റുകളും കൃത്യതയുള്ള യുദ്ധോപകരണങ്ങൾ ഉപയോഗിച്ച് ലക്ഷ്യമാക്കി.
“ഈ പ്രതികരണങ്ങൾ നടത്തുമ്പോൾ, ഇന്ത്യ ഏറ്റവും കുറഞ്ഞ കൊളാറ്ററൽ നാശനഷ്‌ടങ്ങൾ ഉറപ്പാക്കി,” വിംഗ് കമാൻഡർ സിംഗ് പറഞ്ഞു.
ഇസ്ലാമാബാദിൽ നിന്ന് 10 കിലോമീറ്ററിൽ താഴെ മാത്രം അകലെയുള്ളതും രാജ്യത്തിൻ്റെ സൈനിക ആസ്ഥാനത്തോട് ചേർന്നുള്ളതുമായ ഒരു പ്രധാന സ്ഥലമായ നൂർ ഖാൻ വ്യോമതാവളം ഒരു വലിയ സ്ഫോടനത്തെ തുടർന്ന് തീപിടിച്ചതായി വ്യോമസേനാ ഡയറക്ടർ ജനറൽ എയർ മാർഷൽ എകെ ഭാരതി മാധ്യമ പ്രവർത്തകരെ കാണിച്ചു.
റഹിം യാർ ഖാൻ വ്യോമതാവളത്തിൻ്റെ റൺവേക്ക് ഉണ്ടായ വ്യാപകമായ നാശനഷ്‌ടങ്ങളുടെ വീഡിയോയും അദ്ദേഹം ഒരു പത്രസമ്മേളനത്തിൽ പ്രദർശിപ്പിച്ചു.
ഇന്ത്യൻ സായുധ സേനയുടെ പോരാട്ടം തീവ്രവാദികൾക്ക് എതിരെയായിരുന്നുവെന്നും എന്നാൽ പാകിസ്ഥാൻ സൈന്യം തീവ്രവാദികളെ “പിന്തുണക്കാൻ” തീരുമാനിച്ചുവെന്നും സംഘർഷം “വർദ്ധിപ്പിച്ചു” എന്നും അദ്ദേഹം പറഞ്ഞു.
ഓപ്പറേഷൻ സിന്ദൂർ
ഏപ്രിൽ 22ന് ഒരു നേപ്പാളി പൗരൻ ഉൾപ്പെടെ 26 പേർ കൊല്ലപ്പെട്ട പഹൽഗാം ഭീകരാക്രമണത്തിന് പ്രതികാരമായി ഇന്ത്യ മെയ് ഏഴിന് ഓപ്പറേഷൻ സിന്ദൂർ ആരംഭിക്കുകയും പാകിസ്ഥാനിലെയും പാകിസ്ഥാൻ അധിനിവേശ കാശ്‌മീരിലെയും (പിഒകെ) ഒമ്പത് ഭീകര കേന്ദ്രങ്ങൾ ആക്രമിക്കുകയും ചെയ്തു.
ഇന്ത്യൻ സായുധ സേന ലഷ്‌കർ- ഇ- തൊയ്ബ (എൽഇടി), ജെയ്ഷ് -ഇ- മുഹമ്മദ് (ജെഎം), ഹിസ്ബുൾ മുജാഹിദീൻ തുടങ്ങിയ ഭീകര സംഘടനകളുടെ നിരവധി ക്യാമ്പുകൾ നശിപ്പിക്കുകയും നൂറിലധികം തീവ്രവാദികളെ വധിക്കുകയും ചെയ്തു.
ഇന്ത്യൻ സായുധ സേനയുടെ രാത്രികാല ഓപ്പറേഷനുകൾക്ക് ശേഷം പാകിസ്ഥാൻ സൈന്യം ഇന്ത്യയുടെ പടിഞ്ഞാറൻ ഭാഗങ്ങളിൽ ഡ്രോണുകളും മിസൈലുകളും വിക്ഷേപിച്ചു. അവ വിജയകരമായി തടഞ്ഞു. തുടർന്ന് ഇന്ത്യ പാകിസ്ഥാൻ പ്രദേശത്തിനുള്ളിലെ തിരഞ്ഞെടുത്ത സൈനിക ലക്ഷ്യങ്ങളിൽ ആക്രമണം നടത്തി.
നാല് ദിവസത്തെ തീവ്രമായ അതിർത്തി കടന്നുള്ള ഡ്രോൺ, മിസൈൽ ആക്രമണങ്ങൾക്ക് ശേഷം, കഴിഞ്ഞ ശനിയാഴ്‌ച ഇരുരാജ്യങ്ങളും സൈനിക നടപടികൾ ഉടനടി നിർത്തി വെക്കുന്നതിനായി വെടിനിർത്തൽ കരാറിൽ എത്തി.
