ലോക രാജ്യങ്ങൾക്കിടയിൽ വൻ ശക്തികൾ തമ്മിലുള്ള പോരാട്ടം മുറുകുകയാണ്. ഒരുവശത്ത് അമേരിക്കയും മറുവശത്ത് ചൈനയും ഇറാനും അണിനിരക്കുന്ന ഒരു പുതിയ പടയൊരുക്കത്തിനാണ് പശ്ചിമേഷ്യ ഇപ്പോൾ സാക്ഷ്യം വഹിക്കുന്നത്. ചൈനയിൽ നിന്ന് അതിമാരകമായ സൂപ്പർസോണിക് മിസൈലുകൾ വാങ്ങാൻ ഇറാൻ ഒരുങ്ങുന്നു എന്ന വാർത്തയാണ് ഇപ്പോൾ ലോകത്തെ ഞെട്ടിച്ചിരിക്കുന്നത്.
കടലിലെ കപ്പലുകളെ നിഷ്പ്രയാസം തകർക്കാൻ ശേഷിയുള്ള ഈ ചൈനീസ് മിസൈലുകൾ ഇറാൻ്റെ കൈവശം എത്തുന്നത് തങ്ങൾക്ക് ഭീഷണിയാണെന്ന് അമേരിക്ക കരുതുന്നു. ഇതിനെ തുടർന്ന് ഇറാന് സമീപമുള്ള കടൽ മേഖലയിലേക്ക് അമേരിക്ക തങ്ങളുടെ വൻ നാവികസേനയെ അയച്ചിരിക്കുകയാണ്. ഈ നീക്കങ്ങൾ ഒരു വലിയ യുദ്ധത്തിലേക്ക് വഴിമാറുമോ എന്ന ആശങ്കയിലാണ് ലോകം.
മിസൈൽ കരാർ
ചൈന നിർമ്മിച്ച CM-302 എന്ന അത്യാധുനിക മിസൈലുകൾ വാങ്ങാനാണ് ഇറാൻ്റെ നീക്കം. ശബ്ദത്തേക്കാൾ വേഗത്തിൽ സഞ്ചരിക്കുന്ന ഈ മിസൈലുകൾക്ക് കടലിലെ കപ്പലുകളെ കൃത്യമായി തകർക്കാൻ ശേഷിയുണ്ട്. കടലിലെ വലിയ യുദ്ധക്കപ്പലുകളെ പോലും തകർക്കാൻ ശേഷിയുള്ള, അതിവേഗത്തിൽ സഞ്ചരിക്കുന്ന ഒരു ‘പറക്കുന്ന ബോംബ്’ ആണിത്. അതായത്, ശത്രു കപ്പലുകൾക്ക് ഈ മിസൈൽ വരുന്നത് തിരിച്ചറിയാനോ തടയാനോ ഉള്ള സമയം പോലും ലഭിക്കില്ല.
എത്ര ദൂരെയുള്ള ലക്ഷ്യത്തെയും വളരെ കൃത്യമായി പോയി ആക്രമിക്കാൻ ഇതിന് സാധിക്കും. ഏകദേശം 290 കിലോമീറ്റർ ദൂരെയുള്ള ലക്ഷ്യങ്ങളെ തകർക്കാൻ ഇതിന് കഴിയും. ഒരു വലിയ യുദ്ധക്കപ്പലിനെ ഒറ്റയടിക്ക് മുക്കിക്കളയാൻ ഇതിലെ സ്ഫോടക വസ്തുക്കൾക്ക് ശേഷിയുണ്ട്. കപ്പലുകളിലുള്ള മിസൈൽ പ്രതിരോധ സംവിധാനങ്ങളെ വെട്ടിച്ച് മുന്നേറാൻ ഇതിന് പ്രത്യേക കഴിവുണ്ട്.
അമേരിക്കയുടെ നീക്കം
ഇറാൻ ഈ മിസൈലുകൾ സ്വന്തമാക്കുന്നത് തങ്ങളുടെ കപ്പലുകൾക്ക് ഭീഷണിയാണെന്ന് അമേരിക്ക കരുതുന്നു. ഇതിനെത്തുടർന്ന് അമേരിക്ക തങ്ങളുടെ നാവികസേനയെ ഇറാന് സമീപമുള്ള കടൽ മേഖലയിലേക്ക് കൂടുതൽ കരുത്തോടെ അയച്ചിരിക്കുകയാണ്. ഒരു വശത്ത് ചൈനയുടെ സഹായത്തോടെ ഇറാൻ കരുത്താർജ്ജിക്കുന്നു. മറുവശത്ത് അമേരിക്ക സൈന്യത്തെ അണിനിരത്തുന്നു. ഇത് ആ മേഖലയിൽ ഒരു യുദ്ധസാധ്യതയെ കുറിച്ചുള്ള ഭീതി വർദ്ധിപ്പിക്കുന്നു.
‘ഹോർമുസ്’ ഇറാൻ്റെ വജ്രായുധം
ലോകത്തെ എണ്ണക്കപ്പലുകൾ കടന്നുപോകുന്ന പ്രധാന പാതയായ ‘ഹോർമുസ് ഇടുക്ക്’ ഇറാൻ്റെ നിയന്ത്രണത്തിലാണ്. ഈ മിസൈലുകൾ അവിടെ വിന്യസിച്ചാൽ ഏത് കപ്പലിനെയും തടയാൻ ഇറാന് സാധിക്കും. അമേരിക്കയുടെ വലിയ വിമാനവാഹിനി കപ്പലുകൾക്ക് ഈ മിസൈൽ വലിയൊരു ഭീഷണിയാണ്.
ചെറിയ രാജ്യമാണെങ്കിൽ പോലും ഇത്തരം ആധുനിക മിസൈലുകൾ കൈവശമുണ്ടാകുന്നത് വലിയ സൈനിക ശക്തികൾക്കെതിരെ പോരാടാൻ ഇറാനെ സഹായിക്കും. ഒരു സാധാരണ മിസൈൽ ഒരു കാർ ഓടിക്കുന്ന വേഗതയിലാണെങ്കിൽ, CM-302 ഒരു റേസിംഗ് കാറിനേക്കാൾ പല മടങ്ങ് വേഗത്തിൽ ലക്ഷ്യസ്ഥാനത്ത് എത്തും. വരുന്നത് തിരിച്ചറിയുമ്പോഴേക്കും അപകടം സംഭവിച്ചിട്ടുണ്ടാകും
ചൈന ഇറാനെ സഹായിക്കും
അമേരിക്കയുമായി അത്ര നല്ല ബന്ധത്തിലല്ലാത്ത രണ്ട് രാജ്യങ്ങളാണ് ചൈനയും ഇറാനും. ശത്രുവിൻ്റെ ശത്രു മിത്രം എന്ന നയമാണ് ഇവിടെ പ്രവർത്തിക്കുന്നത്.ഇതിലൂടെ ഇറാനിൽ നിന്ന് കുറഞ്ഞ നിരക്കിൽ എണ്ണ വാങ്ങാൻ ചൈനക്ക് സാധിക്കും. പകരം അവർ ഇറാന് സാങ്കേതിക വിദ്യയും ആയുധങ്ങളും നൽകുന്നു. ഏഷ്യയിലും മിഡിൽ ഈസ്റ്റിലും അമേരിക്കയുടെ സ്വാധീനം കുറച്ച്, സ്വന്തം കരുത്ത് തെളിയിക്കാൻ ചൈന ഈ ബന്ധത്തെ ഉപയോഗിക്കുകയാണ്.
സാധാരണക്കാരൻ്റെ പോക്കറ്റ് ചോരും
ഈ രണ്ട് രാജ്യങ്ങൾ തമ്മിലുള്ള തർക്കം മുറുകിയാൽ അത് ലോകത്തെ മുഴുവൻ ബാധിക്കാം. ലോകത്തെ പ്രധാന എണ്ണക്കടത്ത് പാതയായ ഹോർമുസ് ഇടുക്കിന് സമീപമാണ് ഈ സംഘർഷം നടക്കുന്നത്. ഒരു യുദ്ധമുണ്ടായാൽ ആഗോളതലത്തിൽ പെട്രോൾ, ഡീസൽ വില കുത്തനെ കൂടും. ഇന്ത്യയെപ്പോലെ അസംസ്കൃത എണ്ണ വൻതോതിൽ ഇറക്കുമതി ചെയ്യുന്ന ഒരു രാജ്യത്തെയും ഇവിടത്തെ സാധാരണക്കാരെയും ഈ തീരുമാനം വലയ്ക്കും.
എണ്ണ വില കൂടിയാൽ, ആഗോള വിപണിയിൽ അസ്ഥിരത ഉണ്ടാകാൻ ഇത് കാരണമാകും. ചുരുക്കത്തിൽ ചൈന നൽകുന്ന ആയുധങ്ങൾ ഇറാനെ കൂടുതൽ ശക്തരാക്കുമ്പോൾ, അത് തടയാൻ അമേരിക്ക നടത്തുന്ന നീക്കങ്ങൾ ലോകത്തെ മറ്റൊരു യുദ്ധത്തിൻ്റെ വക്കിലെത്തിക്കുമോ എന്നാണ് എല്ലാവരും ഉറ്റുനോക്കുന്നത്.
Credit: suma sunny, reporter malayalam
