നിതീഷിനെയും നായിഡുവിനെയും കൂടെച്ചേർക്കാൻ കോൺഗ്രസ് ശ്രമിക്കേണ്ടത് തിരഞ്ഞെടുപ്പിനു മുമ്പായിരുന്നു

| എസ് സുധീപ്

എൻഡിഎ സഖ്യത്തെ വീണ്ടും അധികാരത്തിലെത്തിച്ച കോൺഗ്രസിന് അഭിനന്ദനങ്ങൾ! നിതീഷ് കുമാറിൻ്റെ പതിമൂന്നും ചന്ദ്രബാബു നായിഡുവിൻ്റെ പതിനാറും സീറ്റുകളാണ് എൻഡിഎ സഖ്യത്തെ രക്ഷപ്പെടുത്തിയത്. നിതീഷ് കുമാറിനെ ഇന്ത്യാ സഖ്യത്തോടു ചേർത്തു നിർത്താൻ കോൺഗ്രസ് നേരത്തേ ശ്രമിച്ചിരുന്നെങ്കിലോ? നായിഡുവിനെ ബിജെപിയുമായി അടുപ്പത്തിലാക്കാതിരിക്കാൻ അങ്ങേയറ്റം ശ്രദ്ധിച്ചിരുന്നെങ്കിൽ? എങ്കിൽ ഇന്ത്യാ സഖ്യം അധികാരത്തിൽ എത്തുമായിരുന്നു.

എന്നാൽ നിതാന്ത ശത്രുക്കളായ നിതീഷിനെയും നായിഡുവിനെയും എല്ലാ വൈരവും തൽക്കാലത്തേക്കെങ്കിലും മറന്ന് ഇരുകൈയും നീട്ടി ബിജെപി കൂടെക്കൂട്ടി. അതാണ് പ്രായോഗിക രാഷ്ട്രീയം. അതുകൊണ്ടു മാത്രം എൻഡിഎ സഖ്യം കേവല ഭൂരിപക്ഷം നേടി. ഇല്ലെങ്കിൽ എൻഡിഎ 265-ൽ ഒതുങ്ങുമായിരുന്നു. എൻഡിഎ വിജയിച്ചു. കോൺഗ്രസ് സഖ്യം തോറ്റു. എൻഡിഎയ്ക്കും മോദിക്കും ഭൂരിപക്ഷം കുറഞ്ഞത് ഭരണത്തിലും ഭരണത്തുടർച്ചയിലും ഒരു മാറ്റവും വരുത്തുന്നില്ല. പിന്നെന്തിനാണു കോൺഗ്രസ് പടക്കം പൊട്ടിക്കുന്നത്?

മഹാരാഷ്ട്ര ഒരു മഹത്തായ പാഠമാണ്. അസാദ്ധ്യമായി ഒന്നുമില്ല എന്ന പാഠം. കോൺഗ്രസും താക്കറെ, പവാർ കക്ഷികളും അടങ്ങിയ മഹാ വികാസ് അഘാഡി ഈ തിരഞ്ഞെടുപ്പിനു തൊട്ടുമുമ്പു നിലവിൽ വന്ന ഒരു തട്ടിക്കൂട്ടു മുന്നണിയല്ല. കഴിഞ്ഞ നിയമസഭാ തിരഞ്ഞെടുപ്പിനു ശേഷം ഒരു തട്ടിക്കൂട്ടു മുന്നണി പോലെ രൂപം കൊണ്ടതെങ്കിലും, എല്ലാ പിളർപ്പുകൾക്കും വിട്ടു പോകലുകൾക്കും അഭിപ്രായ ഭിന്നതകൾക്കുമിടയിലും മൂന്നു കക്ഷികളും അന്നും ഇന്നും ഒരുമിച്ചു നിന്നു.

ആ ഒരുമയുടെ ഫലമാണ് ഇന്ന് മഹാവികാസ് അഘാഡി മഹാരാഷ്ട്രയിൽ നേടിയ വ്യക്തമായ ഭൂരിപക്ഷം. അതിൻ്റെ നേരെ മറുപുറമാണ് ദൽഹി. ദൽഹിയിൽ അവസാന നിമിഷം ഉണ്ടാക്കിയ വഴിപാടു മുന്നണിയാണ് കോൺഗ്രസ്-ആം ആദ്മി സഖ്യം. ബിജെപി ദൽഹി തൂത്തുവാരി. കെട്ടുറപ്പുള്ള തിരഞ്ഞെടുപ്പു പൂർവ സഖ്യങ്ങളോട് ജനത ആഭിമുഖ്യം കാണിക്കും. അഡ്ജസ്റ്റ്മെൻ്റ് മുന്നണികളെ ചവറ്റുകൊട്ടയിലെറിയും. ഇന്ത്യാ സഖ്യം കെട്ടുറപ്പുള്ള ഒരു സഖ്യമായിരുന്നോ എന്നു സ്വയം ചോദിക്കുക.

കോൺഗ്രസിന് നൂറു സീറ്റുകളാണെങ്കിൽ ബിജെപിക്കു തനിച്ച് 240 സീറ്റാണ്. ഇന്ത്യാ സഖ്യത്തെക്കാൾ കൂടുതൽ സീറ്റുകൾ ബിജെപി തനിച്ചു നേടി എന്നറിയുക. കോൺഗ്രസ് മുന്നണി തോറ്റ മുന്നണിയാണ്. കേവല ഭൂരിപക്ഷത്തിന് ഏറെ താഴെ നിൽക്കുന്ന മുന്നണി. എൻഡിഎ സഖ്യം കേവല ഭൂരിപക്ഷത്തിനും 22 സീറ്റുകൾ മുകളിലാണ്.

ജയിച്ച സഖ്യത്തെ അട്ടിമറിച്ച് സർക്കാരുണ്ടാക്കാൻ ആരു ശ്രമിച്ചാലും അത് ജനാധിപത്യ വിരുദ്ധമാണ്. തിരഞ്ഞെടുപ്പിൽ കേവല ഭൂരിപക്ഷം കിട്ടിയില്ലെങ്കിൽ മാന്യമായി പ്രതിപക്ഷത്തിരിക്കാൻ തയ്യാറാവണം. നിതീഷിനെയും നായിഡുവിനെയും കൂടെച്ചേർക്കാൻ കോൺഗ്രസ് ശ്രമിക്കേണ്ടത് തിരഞ്ഞെടുപ്പിനു മുമ്പായിരുന്നു.

പാഥസാം നിചയം വാർന്നൊഴിഞ്ഞളവു
സേതുബന്ധനോദ്യോഗമെന്തെടോ…?
വെള്ളം മുഴുവൻ ഒഴുകിപ്പോയ ശേഷം ചിറ കെട്ടിയിട്ടെന്തു ഫലം…