ചണ്ഡീഗഡ്: ആം ആദ്മി പാർട്ടി ദേശീയ കൺവീനറും ഡൽഹി മുൻ മുഖ്യമന്ത്രിയുമായ അരവിന്ദ് കെജ്‌രിവാളിനും മകൾക്കും വധഭീഷണി ലഭിച്ചതായി പരാതി. ഏഴ് കോടി രൂപ നൽകിയില്ലെങ്കിൽ ഇരുവരെയും കൊലപ്പെടുത്തുമെന്നായിരുന്നു ഭീഷണി. സംഭവത്തിൽ പഞ്ചാബ് പൊലീസ് കേസെടുത്ത് അന്വേഷണം ആരംഭിച്ചു.
ഡൽഹിയിലെ തിലക് നഗർ മണ്ഡലത്തിലെ എഎപി എംഎൽഎ ജർണൈൽ സിങ്ങാണ് മൊഹാലി പൊലീസിൽ പരാതി നൽകിയത്. ലോറൻസ് ബിഷ്‌ണോയി സംഘത്തിലെ അംഗമാണെന്ന് അവകാശപ്പെട്ട ഒരാളിൽനിന്ന് ഭീഷണി സന്ദേശം ലഭിച്ചതായാണ് പരാതിയിൽ പറയുന്നത്.
നവംബർ ആറിന് ഫോണിലും വാട്സ്ആപ്പിലും ഭീഷണി
നവംബർ ആറിന് തനിക്ക് ഒരു ഫോൺ കോളും വാട്സ്ആപ്പ് സന്ദേശവും ലഭിച്ചതായി ജർണൈൽ സിങ് പരാതിയിൽ വ്യക്തമാക്കി. ലോറൻസ് ബിഷ്‌ണോയി സംഘവുമായി ബന്ധമുണ്ടെന്ന് അവകാശപ്പെട്ട വ്യക്തിയാണ് സന്ദേശം അയച്ചതെന്നാണ് ആരോപണം.
ഏഴ് കോടി രൂപ നൽകണമെന്നായിരുന്നു ആവശ്യം. പണം നൽകിയില്ലെങ്കിൽ അരവിന്ദ് കെജ്‌രിവാളിനെയും മകളെയും കൊലപ്പെടുത്തുമെന്ന് ഇയാൾ ഭീഷണിപ്പെടുത്തിയതായും പരാതിയിൽ പറയുന്നു.
കൊള്ളയടിക്കലിനും വധഭീഷണിക്കും കേസ്
പരാതിയുടെ അടിസ്ഥാനത്തിൽ മൊഹാലി പൊലീസ് ഭാരതീയ ന്യായ സംഹിതയിലെ 308(4) (കൊള്ളയടിക്കൽ), 351(2) (ക്രിമിനൽ ഭീഷണിപ്പെടുത്തൽ) എന്നീ വകുപ്പുകൾ പ്രകാരം കേസെടുത്തു. ഇൻഫർമേഷൻ ടെക്നോളജി ആക്ടിലെ പ്രസക്തമായ വകുപ്പുകളും ചുമത്തിയിട്ടുണ്ട്.
ഭീഷണി സന്ദേശത്തിന് പിന്നിൽ ആരാണെന്നും ലോറൻസ് ബിഷ്‌ണോയി സംഘവുമായി യഥാർഥത്തിൽ ബന്ധമുണ്ടോയെന്നും പൊലീസ് പരിശോധിച്ചുവരികയാണ്. സംഭവത്തിൽ കൂടുതൽ അന്വേഷണം പുരോഗമിക്കുകയാണെന്ന് പൊലീസ് അറിയിച്ചു.
