പ്രതിരോധ രംഗത്ത് നിർണ്ണായക നേട്ടം കൈവരിച്ചുകൊണ്ട് തദ്ദേശീയമായി വികസിപ്പിച്ച ദീർഘദൂര ക്രൂയിസ് മിസൈലിന്റെ (LRLACM) ആദ്യ പരീക്ഷണം ഇന്ത്യ വിജയകരമായി പൂർത്തിയാക്കി. ഒഡീഷ തീരത്ത് നടന്ന പരീക്ഷണത്തിൽ മിസൈൽ അതിന്റെ എല്ലാ സാങ്കേതിക ലക്ഷ്യങ്ങളും കൈവരിച്ചതായി പ്രതിരോധ മന്ത്രാലയം അറിയിച്ചു. അമേരിക്കയുടെ വിഖ്യാതമായ ടോമാഹോക്ക് മിസൈലിന് തുല്യമായ കരുത്തുള്ള ഈ മിസൈൽ ഡിആർഡിഒ (DRDO) ആണ് വികസിപ്പിച്ചെടുത്തത്.
1,000 മുതൽ 1,500 കിലോമീറ്റർ വരെ പ്രഹരപരിധിയുള്ള ഈ മിസൈൽ ഇന്ത്യയുടെ അതിർത്തികളിൽ നിന്ന് ശത്രുരാജ്യങ്ങളുടെ തന്ത്രപ്രധാനമായ കേന്ദ്രങ്ങളെ തകർക്കാൻ ശേഷിയുള്ളതാണ്. പാകിസ്താനിലെ ഇസ്ലാമാബാദ്, റാവൽപിണ്ടി, ലാഹോർ, കറാച്ചി തുടങ്ങിയ പ്രധാന നഗരങ്ങളും ചൈനയിലെ ലാസ, ചെങ്ഡു തുടങ്ങിയ സൈനിക കേന്ദ്രങ്ങളും ഈ മിസൈലിന്റെ പ്രഹരപരിധിയിൽ വരും. ശത്രുക്കളുടെ റഡാറുകൾക്കും വ്യോമപ്രതിരോധ സംവിധാനങ്ങൾക്കും കണ്ടെത്താൻ കഴിയാത്ത വിധം വളരെ താഴ്ന്നു പറക്കാൻ (Stealth capability) ഇതിന് സാധിക്കും.
ഈ മിസൈലിന്റെ വൈവിധ്യമാർന്ന വിക്ഷേപണ രീതികൾ ശത്രുക്കളെ കൂടുതൽ പ്രതിരോധത്തിലാക്കും. കരയിൽ നിന്നുള്ള മൊബൈൽ ലോഞ്ചറുകൾക്ക് പുറമെ യുദ്ധക്കപ്പലുകൾ, അന്തർവാഹിനികൾ എന്നിവയിൽ നിന്നും ഈ മിസൈൽ വിക്ഷേപിക്കാൻ സാധിക്കും. സാധാരണ പോർമുനകൾക്ക് പുറമെ ആണവ പോർമുനകൾ വഹിക്കാനും ഇതിന് ശേഷിയുണ്ട്. ബെംഗളൂരു ആസ്ഥാനമായുള്ള എയറോനോട്ടിക്കൽ ഡെവലപ്മെന്റ് എസ്റ്റാബ്ലിഷ്മെന്റ് (ADE) ആണ് ഈ മിസൈൽ രൂപകൽപ്പന ചെയ്തത്.
നേരത്തെ ചില തിരിച്ചടികൾ നേരിട്ട ‘നിർഭയ്’ മിസൈൽ പദ്ധതിയുടെ പരിഷ്കരിച്ച രൂപമായാണ് പുതിയ ദീർഘദൂര ക്രൂയിസ് മിസൈലിനെ കണക്കാക്കുന്നത്. വരും വർഷങ്ങളിൽ കൂടുതൽ പരീക്ഷണങ്ങൾ പൂർത്തിയാക്കി ഏകദേശം രണ്ട് വർഷത്തിനുള്ളിൽ ഈ മിസൈൽ ഇന്ത്യൻ സൈന്യത്തിന്റെ ഭാഗമാകുമെന്ന് അധികൃതർ വ്യക്തമാക്കി. ഇന്ത്യയുടെ പ്രതിരോധ മേഖലയിലെ സ്വയംപര്യാപ്തതയ്ക്ക് ഈ പരീക്ഷണം വലിയ ഊർജ്ജമാണ് നൽകുന്നത്.
1991-ലെ ഗൾഫ് യുദ്ധം മുതൽ അടുത്തിടെ നടന്ന ഇറാൻ യുദ്ധത്തിൽ വരെ അമേരിക്ക നിർണ്ണായകമായി ഉപയോഗിച്ച ടോമാഹോക്ക് മിസൈലുകൾക്ക് സമാനമായ കരുത്താണ് പുതിയ മിസൈലിലൂടെ ഇന്ത്യയും സ്വന്തമാക്കിയിരിക്കുന്നത്. എങ്കിലും അമേരിക്കൻ ടോമാഹോക്ക് മിസൈലുകൾക്ക് 1,250 മുതൽ 2,500 കിലോമീറ്റർ വരെ കൂടുതൽ ദൂരപരിധിയുണ്ട്. ഈ അന്താരാഷ്ട്ര നിലവാരത്തിലേക്കും കരുത്തിലേക്കും ഇന്ത്യൻ മിസൈൽ സാങ്കേതികവിദ്യ ഉയർന്നു എന്നത് ശ്രദ്ധേയമാണ്.
അമേരിക്കയുടെ ടോമാഹോക്ക് ബ്ലോക്ക്-4 പോലുള്ള ഏറ്റവും പുതിയ പതിപ്പുകൾക്ക് പറക്കുന്നതിനിടയിൽ ലക്ഷ്യസ്ഥാനം മാറ്റാനും മണിക്കൂറുകളോളം ആകാശത്ത് ചുറ്റിക്കറങ്ങാനും സാധിക്കും. ഇന്ത്യയുടെ മിസൈൽ ഇത്തരത്തിലുള്ള അത്യാധുനിക ഘട്ടങ്ങളിലേക്ക് ഇനിയും വികസിപ്പിക്കേണ്ടതുണ്ട്. പരീക്ഷണങ്ങൾക്ക് ശേഷം സൈന്യത്തിന്റെ ഭാഗമാക്കുന്നതിനോടൊപ്പം തന്നെ പുതിയ മിസൈലിന്റെ പരിഷ്കരിച്ച പതിപ്പുകൾക്കായുള്ള ഗവേഷണങ്ങളും തുടരുമെന്നാണ് റിപ്പോർട്ടുകൾ.