മഹാരാഷ്ട്രയിൽ വിരമിച്ച 82 വയസ്സുള്ള ഒരു ഉദ്യോഗസ്ഥന് തൻ്റെ മുഴുവൻ സമ്പാദ്യം 1.19 കോടി രൂപ ‘ഡിജിറ്റൽ അറസ്റ്റ്’ തട്ടിപ്പിലൂടെ നഷ്‌ടപ്പെട്ടു, താമസിയാതെ അദ്ദേഹം മരിച്ചു.
അംബാലയിൽ സമാനമായ ഒരു തട്ടിപ്പ് നടന്നതിൽ സുപ്രീം കോടതി സ്വമേധയാ കേസെടുത്തു. അവിടെ നിയമപാലകരെന്ന വ്യാജേന സൈബർ കുറ്റവാളികൾ മുതിർന്ന പൗരന്മാരായ ദമ്പതികളിൽ നിന്ന് 1.05 കോടി രൂപ തട്ടിയെടുത്തു.
ഭയം, സാങ്കേതിക വിദ്യ, ആൾമാറാട്ടം എന്നിവ ഉപയോഗിച്ച് സാധാരണ പൗരന്മാരെ കബളിപ്പിക്കുന്ന ഡിജിറ്റൽ അറസ്റ്റ് തട്ടിപ്പുകളുടെ ദ്രുതഗതിയിലുള്ള വളർച്ചയാണ് ഈ സംഭവങ്ങൾ എടുത്തുകാണിക്കുന്നത്.
കൂടുതൽ ജീവനുകളും സമ്പാദ്യവും നഷ്ടപ്പെടുന്നതിന് മുമ്പ് അവബോധം വളർത്തുക എന്നതാണ് ഇപ്പോൾ മുന്നിലുള്ള വെല്ലുവിളി.
എന്താണ് ഡിജിറ്റൽ അറസ്റ്റ്?
ഡിജിറ്റൽ അറസ്റ്റ് എന്നത് ഒരു സൈബർ തട്ടിപ്പാണ്. അവിടെ തട്ടിപ്പുകാർ നിയമപാലകരായോ സർക്കാർ ഉദ്യോഗസ്ഥരായോ വേഷമിടുന്നു. അറസ്റ്റ്, അക്കൗണ്ട് മരവിപ്പിക്കൽ അല്ലെങ്കിൽ പാസ്‌പോർട്ട് റദ്ദാക്കൽ പോലുള്ള നിയമ നടപടികൾ ഉണ്ടാകുമെന്ന് ഭയപ്പെടുത്തുകയും ഇരകളെ പണം കൈമാറാനോ സെൻസിറ്റീവ് ഡാറ്റ പങ്കിടാനോ നിർബന്ധിക്കുകയും ചെയ്യുന്നു.
സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ, എൻഫോഴ്‌സ്‌മെന്റ് ഡയറക്ടറേറ്റ്, കസ്റ്റംസ് തുടങ്ങിയ ഏജൻസികളുടെ വ്യാജ ഐഡികളും വ്യാജ നമ്പറുകളും ഉപയോഗിച്ച്, വ്യാജ വാറണ്ടുകളോ കോടതി ഉത്തരവുകളോ ഉപയോഗിച്ച് അവർ ഭീഷണി വർദ്ധിപ്പിക്കുന്നു.
“തട്ടിപ്പുകൾ ഇരകളെ ക്യാമറക്ക് മുന്നിൽ ‘കസ്റ്റഡിയിൽ’ തുടരാൻ സമ്മർദ്ദം ചെലുത്തുകയും ‘വെരിഫിക്കേഷൻ’, ‘ജാമ്യം’ അല്ലെങ്കിൽ ‘സുരക്ഷ’ എന്നിവക്കായി പണം ആവശ്യപ്പെടുകയും ചെയ്യുന്നു,” -ബിഎംആർ ലീഗലിൻ്റെ പങ്കാളിയായ ശങ്കി അഗർവാൾ കൂട്ടിച്ചേർക്കുന്നു.
മുതിർന്ന പൗരന്മാർ പ്രധാന ലക്ഷ്യങ്ങൾ?
ഉയർന്ന സമ്പാദ്യം, അധികാരികളിലുള്ള വിശ്വാസം, ഓൺലൈൻ തട്ടിപ്പുകളെ കുറിച്ചുള്ള പരിമിതമായ പരിചയം എന്നിവ കാരണം മുതിർന്ന പൗരന്മാർ പ്രത്യേകിച്ച് ദുർബലരാണ്.
വിദ്യാസമ്പന്നരായ മുതിർന്ന പൗരന്മാർ പോലും ഡിജിറ്റൽ അറസ്റ്റ് തട്ടിപ്പുകളിൽ വീഴുന്നത് ഭയം യുക്തിയെ മറികടക്കുന്നതിനാൽ ആണ്. “അറസ്റ്റ് അല്ലെങ്കിൽ സാമ്പത്തിക നഷ്‌ടം ഉണ്ടാകുമെന്ന ഭീഷണികളോടെ തട്ടിപ്പുകാർ പരിഭ്രാന്തി സൃഷ്‌ടിക്കുന്നു.
യഥാർത്ഥ അന്വേഷണവും വഞ്ചനയും തമ്മിലുള്ള വ്യത്യാസം
ഇത്തരം തട്ടിപ്പുകൾക്കെതിരായ ആദ്യ പ്രതിരോധം അവബോധമാണ്. ഒരു യഥാർത്ഥ ഉദ്യോഗസ്ഥനും ഫോണിലൂടെ പണമോ ബാങ്കിംഗ് വിവരങ്ങളോ അന്വേഷിക്കുകയോ ഇരകൾ കുടുംബാംഗങ്ങളെയോ അഭിഭാഷകരെയോ സമീപിക്കുന്നത് തടയുകയോ ചെയ്യുന്നില്ല.
യഥാർത്ഥ അന്വേഷണങ്ങളിൽ, രേഖാമൂലമുള്ള അറിയിപ്പുകൾ നൽകുകയും നിയമപരമായ കൂടിയാലോചന അനുവദിക്കുകയും ചെയ്യുന്നു. അജ്ഞാത കോളുകൾ, അറസ്റ്റ് ഭീഷണികൾ, രഹസ്യ ആവശ്യങ്ങൾ, അല്ലെങ്കിൽ ഓൺലൈനിൽ തുടരാനുള്ള നിർദ്ദേശങ്ങൾ എന്നിവയെ കുറിച്ച് ജാഗ്രത പാലിക്കുക.
എങ്ങനെ പ്രതികരിക്കണം
സംശയാസ്‌പദമായി തോന്നിയാൽ മുതിർന്ന പൗരന്മാർ കോൾ അവസാനിപ്പിക്കണം. ശാന്തത പാലിക്കുക, പേയ്‌മെന്റുകൾ നടത്തുന്നത് ഒഴിവാക്കുക, വ്യക്തിഗതമോ സാമ്പത്തികമോ ആയ വിവരങ്ങൾ പങ്കിടുന്നത് ഒഴിവാക്കുക, വഞ്ചന തടയാൻ വേഗത്തിൽ റിപ്പോർട്ട് ചെയ്യുക. സെൻസിറ്റീവ് വിവരങ്ങളിൽ ഒടിപികൾ, പിൻ നമ്പറുകൾ, ബാങ്കിംഗ് പാസ്‌വേഡുകൾ എന്നിവ കൈമാറരുത്.
വിളിക്കുന്നയാളുടെ വിശദാംശങ്ങൾ ശ്രദ്ധിക്കുകയും സ്ക്രീൻ ഷോട്ടുകൾ അല്ലെങ്കിൽ സന്ദേശങ്ങൾ പോലുള്ള തെളിവുകൾ സൂക്ഷിക്കുകയും ചെയ്യുക. ഔദ്യോഗിക കോൺടാക്റ്റുകൾ ഉപയോഗിച്ച് സ്വതന്ത്രമായി പരിശോധിക്കുക, കുടുംബാംഗങ്ങളെയോ നിയമ ഉപദേഷ്‌ടാവിനെയോ അറിയിക്കുക, നാഷണൽ സൈബർ ക്രൈം റിപ്പോർട്ടിംഗ് പോർട്ടലിലോ (cybercrime.gov.in) ലോക്കൽ പോലീസിലോ റിപ്പോർട്ട് ചെയ്യുക.
സംശയാസ്‌പദമായ കോളുകൾ ലഭിച്ചാൽ 1930 എന്ന സൈബർ ക്രൈം ഹെൽപ്പ് ലൈനിലും അറിയിക്കാം.
ഉപകരണങ്ങൾ നിയന്ത്രിക്കാൻ തട്ടിപ്പുകാർ ഉപയോഗിക്കുന്ന AnyDesk അല്ലെങ്കിൽ TeamViewer പോലുള്ള റിമോട്ട്- ആക്‌സസ് ആപ്പുകൾ മുതിർന്ന പൗരന്മാർ ഒഴിവാക്കണം. സെൻസിറ്റീവ് വിവരങ്ങൾ പങ്കുവെച്ചിട്ടുണ്ടെങ്കിൽ, ഇടപാടുകൾ തടയാൻ ഉടൻ ബാങ്കുമായി ബന്ധപ്പെടുക.
പോലീസിന് പരാതി നൽകാനും കൂടുതൽ തട്ടിപ്പുകൾ തടയാനും കോൾ ലോഗുകൾ, സ്ക്രീൻ ഷോട്ടുകൾ, സന്ദേശങ്ങൾ എന്നിവ സൂക്ഷിക്കുക.
പണം കൈമാറ്റം ചെയ്യപ്പെട്ടാൽ
പണമോ തന്ത്രപ്രധാനമായ വിവരങ്ങളോ പങ്കുവെച്ചിട്ടുണ്ടെങ്കിൽ ഇരകൾ അക്കാര്യം കുടുംബത്തെ അറിയിക്കുകയും ഒരു അഭിഭാഷകനെ ബന്ധപ്പെടുകയും പോലീസിൽ പരാതി നൽകുകയും വേണം.
ഇടപാട് മരവിപ്പിക്കാനോ തിരിച്ചെടുക്കാനോ ഉടൻ തന്നെ ബാങ്കിനെയോ ധനകാര്യ സ്ഥാപനത്തെയോ അറിയിക്കുക.
ഇത്തരം സന്ദർഭങ്ങളിൽ സമയം നിർണായകമാണ്, കാരണം തട്ടിപ്പുകാർ മോഷ്‌ടിച്ച ഫണ്ടുകൾ ഒന്നിലധികം അക്കൗണ്ടുകളിലൂടെ വേഗത്തിൽ മാറ്റുകയും തിരിച്ചെടുക്കൽ ഒഴിവാക്കാൻ അവ പിൻവലിക്കുകയും ചെയ്യുന്നു. കരഞ്ജവാല & കമ്പനിയുടെ പ്രിൻസിപ്പൽ അസോസിയേറ്റായ നിഹാരിക കരഞ്ജവാല പറയുന്നു.
കുടുംബത്തിൻ്റെ പങ്ക്
പതിവായി ആശയ വിനിമയം നടത്തുന്നത് അപകട സാധ്യത ഗണ്യമായി കുറക്കും. വേർപിരിഞ്ഞ് താമസിക്കുന്ന കുടുംബങ്ങൾ പതിവായി പരിശോധന നടത്തുകയും ഭീഷണിയുടെ ആദ്യ സൂചനയിൽ തന്നെ മാതാപിതാക്കളെ ബന്ധപ്പെടാൻ പ്രോത്സാഹിപ്പിക്കുകയും വേണം. സൈബർ കുറ്റകൃത്യ സാധ്യതകളെയും മുന്നറിയിപ്പ് സൂചനകളെയും കുറിച്ചുള്ള പതിവ് ചർച്ചകൾ അവബോധം വളരെയധികം വർദ്ധിപ്പിക്കും.
ഒരു യഥാർത്ഥ ഉദ്യോഗസ്ഥനും പണം ആവശ്യപ്പെടുകയോ ഫോണിലൂടെ അറസ്റ്റ് ഭീഷണിപ്പെടുത്തുകയോ ചെയ്യില്ലെന്ന് നിങ്ങളുടെ മാതാപിതാക്കളെയും മുത്തശ്ശിമാരെയും ഓർമ്മിപ്പിക്കുക. ബാങ്കിംഗ് അലേർട്ടുകൾ സജീവമാണെന്ന് ഉറപ്പാക്കുക, സംശയാസ്‌പദമായ നമ്പറുകൾ തടയുക, മാതാപിതാക്കളുടെ ഉപകരണങ്ങളുടെ സുരക്ഷാ ക്രമീകരണങ്ങൾ പതിവായി അവലോകനം ചെയ്യുക.
വാർത്തകൾക്ക് വാട്‌സ്ആപ്പ് ഗ്രൂപ്പിൽ ചേരാം
