നിങ്ങളുടെ ബാങ്ക് അക്കൗണ്ടിലേക്ക് നാളെ രാവിലെ 46,000 രൂപ അപ്രതീക്ഷിതമായി കേന്ദ്ര സർക്കാർ നിക്ഷേപിക്കുമെന്ന് കേട്ടാൽ ആർക്കാണ് സന്തോഷം തോന്നാത്തത്? എന്നാൽ ഇത്തരം വാഗ്ദാനങ്ങൾ കേട്ട് ആവേശം കയറി ലിങ്കുകളിൽ ക്ലിക്ക് ചെയ്യുന്നവർക്ക് കാത്തിരിക്കുന്നത് വലിയൊരു ചതിക്കുഴിയാണ്. സോഷ്യൽ മീഡിയ വഴി വ്യാപകമായി പ്രചരിക്കുന്ന ഒരു വ്യാജ സന്ദേശത്തിനെതിരെ ഇപ്പോൾ കേന്ദ്ര സർക്കാർ തന്നെ നേരിട്ട് രംഗത്തെത്തിയിരിക്കുകയാണ്.
രാജ്യത്തെ സാമ്പത്തിക പ്രതിസന്ധി ലഘൂകരിക്കുന്നതിന്റെ ഭാഗമായി കേന്ദ്ര ധനമന്ത്രാലയം എല്ലാ പൗരന്മാരുടെയും അക്കൗണ്ടിലേക്ക് 46,715 രൂപ വീതം ഉടൻ നിക്ഷേപിക്കുമെന്നാണ് വൈറലാകുന്ന സന്ദേശത്തിന്റെ ഉള്ളടക്കം. വാട്സാപ്പ്, ഫേസ്ബുക്ക് തുടങ്ങിയ പ്ലാറ്റ്ഫോമുകൾ വഴിയാണ് ഈ സന്ദേശം കാട്ടുതീ പോലെ പടരുന്നത്. എന്നാൽ ഇത്തരമൊരു പദ്ധതി സർക്കാർ പ്രഖ്യാപിച്ചിട്ടില്ലെന്നും ഒരു രൂപ പോലും ആർക്കും കൈമാറുന്നില്ലെന്നും പ്രസ് ഇൻഫർമേഷൻ ബ്യൂറോ (PIB) ഫാക്ട് ചെക്ക് വഴി വ്യക്തമാക്കിയിട്ടുണ്ട്.
അശോകസ്തംഭം കാട്ടി ചതിക്കുന്നു
വിശ്വാസ്യത ഉറപ്പാക്കാനായി സർക്കാർ രേഖകളിലേത് പോലെ അശോകസ്തംഭം ഉൾപ്പെടുത്തിയുള്ള പേജുകളാണ് തട്ടിപ്പുകാർ ഇതിനായി ഉപയോഗിക്കുന്നത്. സന്ദേശത്തിന് താഴെ ‘രജിസ്റ്റർ ആൻഡ് സപ്പോർട്ട്’ (Register and Support) എന്നൊരു ലിങ്ക് ബട്ടണും നൽകിയിട്ടുണ്ടാകും. ഈ ലിങ്കിൽ ക്ലിക്ക് ചെയ്താൽ നിങ്ങളുടെ പേര്, ഫോൺ നമ്പർ തുടങ്ങിയ വ്യക്തിവിവരങ്ങൾ ആവശ്യപ്പെടുന്നു. നിങ്ങളുടെ ബാങ്ക് അക്കൗണ്ട് വിവരങ്ങൾ ചോദിക്കുന്നു. ഇത്തരത്തിൽ ശേഖരിക്കുന്ന വിവരങ്ങൾ ഉപയോഗിച്ച് നിങ്ങളുടെ അക്കൗണ്ടിലെ പണം തട്ടിയെടുക്കുന്ന ‘ഫിഷിങ്’ (Phishing) രീതിയാണിത്.
സർക്കാർ പദ്ധതികൾ ഒരിക്കലും സോഷ്യൽ മീഡിയയിലെ ലിങ്കുകൾ വഴി വ്യക്തിവിവരങ്ങൾ ചോദിച്ചുകൊണ്ട് പ്രചരിപ്പിക്കാറില്ലെന്ന് പിഐബി ഓർമ്മിപ്പിക്കുന്നു. അതുകൊണ്ടുതന്നെ അജ്ഞാതരായ ആളുകൾ അയക്കുന്ന ലിങ്കുകളിൽ കയറി ആരും അക്കൗണ്ട് വിവരങ്ങൾ പങ്കുവെക്കരുത്. ഇത്തരം സന്ദേശങ്ങൾ മറ്റുള്ളവരിലേക്ക് ഷെയർ ചെയ്യുന്നത് വഴി നമ്മളും ആ തട്ടിപ്പിന്റെ ഭാഗമായി മാറുകയാണ് ചെയ്യുന്നത്.
