യാത്രക്കാർ വിമാന യാത്രക്കിടെ മോശമായി പെരുമാറിയാൽ കർശനമായ നടപടികൾ സ്വീകരിക്കാൻ സിവിൽ ഏവിയേഷൻ ഡയറക്ടറേറ്റ് ജനറൽ (DGCA) പുതിയ മാർഗ നിർദ്ദേശങ്ങൾ പുറത്തിറക്കി. വിമാനത്തിനകത്തെ സുരക്ഷയും അച്ചടക്കവും ഉറപ്പാക്കുന്നതിനായി ‘സീറോ ടോളറൻസ് പോളിസി’ (Zero Tolerance Policy) നടപ്പിലാക്കാനാണ് അധികൃതർ ലക്ഷ്യമിടുന്നത്.
പുതിയ പരിഷ്കാരങ്ങൾ അനുസരിച്ച്, വിമാനത്തിന് ഉള്ളിൽ അച്ചടക്ക ലംഘനം നടത്തുന്നവർക്ക് രണ്ട് വർഷം വരെ അല്ലെങ്കിൽ അതിൽ കൂടുതൽ കാലത്തേക്ക് യാത്രാ വിലക്ക് ഏർപ്പെടുത്താൻ ശുപാർശയുണ്ട്.
കുറ്റകൃത്യത്തിൻ്റെ തീവ്രതയനുസരിച്ച് ശിക്ഷാ കാലാവധി നാല് തലങ്ങളിലായാണ് തരം തിരിച്ചിരിക്കുന്നത്:
ലെവൽ 1: മോശം ആംഗ്യങ്ങൾ കാണിക്കുക, വാക്കുകൾ കൊണ്ടുള്ള അധിക്ഷേപം, അമിതമായി മദ്യപിച്ചു പ്രശ്നങ്ങൾ ഉണ്ടാക്കുക തുടങ്ങിയവയ്ക്ക് 3 മാസം വരെ യാത്രാ വിലക്ക് ലഭിക്കാം.
ലെവൽ 2: ശാരീരികമായി ഉപദ്രവിക്കുക (തള്ളുക, അടിക്കുക, ചവിട്ടുക), ലൈംഗികാതിക്രമം അല്ലെങ്കിൽ തെറ്റായ രീതിയിലുള്ള സ്പർശനം തുടങ്ങിയവക്ക് 6 മാസം വരെ വിലക്ക് ലഭിക്കാം.
ലെവൽ 3 & 4: വിമാനത്തിൻ്റെ പ്രവർത്തനങ്ങളെ ബാധിക്കുന്ന തരത്തിലുള്ള ആക്രമണങ്ങൾ, ജീവന് ഭീഷണിയാകുന്ന രീതിയിലുള്ള ശാരീരിക ഉപദ്രവങ്ങൾ, വിമാനത്തിൻ്റെ കോക്പിറ്റിലേക്ക് (Flight crew compartment) അതിക്രമിച്ചു കയറാൻ ശ്രമിക്കുക എന്നിവക്ക് കുറഞ്ഞത് 2 വർഷമോ അതിൽ കൂടുതലോ കാലത്തേക്ക് വിലക്ക് ഏർപ്പെടുത്താം.
വിമാനത്തിനുള്ളിൽ പുകവലിക്കുക, ആഭ്യന്തര വിമാന സർവീസുകളിൽ മദ്യപിക്കുക, എമർജൻസി എക്സിറ്റുകൾ തെറ്റായി കൈകാര്യം ചെയ്യുക, ജീവൻ രക്ഷാ ഉപകരണങ്ങൾ ദുരുപയോഗം ചെയ്യുക തുടങ്ങിയ സന്ദർഭങ്ങളിൽ വിമാന കമ്പനികൾക്ക് അന്വേഷണ കമ്മിറ്റിയുടെ അനുമതിക്കായി കാത്തുനിൽക്കാതെ തന്നെ 30 ദിവസം വരെ യാത്രാ വിലക്ക് നേരിട്ട് ഏർപ്പെടുത്താൻ പുതിയ നിയമം അധികാരം നൽകുന്നു. നിലവിലെ നിയമമനുസരിച്ച് സ്വതന്ത്ര സമിതിയുടെ തീരുമാനം വരുന്നത് വരെ 45 ദിവസം വരെ വിലക്ക് ഏർപ്പെടുത്തുമായിരുന്നു.
ദേശീയ സുരക്ഷക്ക് ഭീഷണിയാകുന്ന വ്യക്തികളെയും വിമാന യാത്രയിൽ നിന്ന് വിലക്കുന്നതാണ്. ഈ നിർദ്ദേശങ്ങളെ കുറിച്ചുള്ള സ്റ്റേക്ക്ഹോൾഡർമാരുടെ അഭിപ്രായങ്ങൾ അറിയിക്കാൻ മാർച്ച് 16 വരെ സമയം അനുവദിച്ചിട്ടുണ്ട്
