ഇന്ത്യയിൽ പ്രവാസിയായ ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീന ഒരു പ്രധാന പ്രസ്താവന ഇറക്കി. ‘തൻ്റെ മൗനത്തെ ബലഹീനതയായി കണക്കാക്കരുതെന്ന്’ പറഞ്ഞു. വളരെ വേഗം ബംഗ്ലാദേശിലേക്ക് മടങ്ങുമെന്ന് അവർ വ്യക്തമാക്കി. രാജ്യത്ത് ശാരീരികമായി ഇല്ലാതിരിക്കുന്നത് താൻ വെറുതെ ഇരിക്കുകയാണെന്നല്ലെന്ന് ഒരു ഇമെയിൽ അഭിമുഖത്തിൽ സംസാരിച്ച ഹസീന പറഞ്ഞു.
‘തൻ്റെ രാജ്യത്തിൻ്റെ താൽപ്പര്യങ്ങൾക്കായി നിരന്തരം പോരാടുന്നുണ്ടെന്നും അന്താരാഷ്ട്ര തലത്തിൽ പൂർണമായും സജീവമാണെന്നും’ അവർ അവകാശപ്പെട്ടു. 2024 -ലെ വിദ്യാർത്ഥി പ്രതിഷേധത്തെ തുടർന്ന് അധികാരം വിട്ടതിനുശേഷം ഷെയ്ഖ് ഹസീന ഇന്ത്യയിൽ താമസിക്കുന്നു.
സ്വന്തം നാട്ടിലേക്ക് മടങ്ങുന്നതിനെ കുറിച്ച് ഷെയ്ഖ് ഹസീന പറഞ്ഞത്, തൻ്റെ തിരിച്ചുവരവ് ഒരു പ്രത്യേക തീയതിയെ ആശ്രയിച്ചല്ല എന്നാണ്. തിരിച്ചുവരവിന് മുമ്പ് ബംഗ്ലാദേശിൽ ഒരു ജനാധിപത്യ അന്തരീക്ഷം സ്ഥാപിക്കണമെന്ന് അവർ ഊന്നിപ്പറഞ്ഞു. അഭിപ്രായ സ്വാതന്ത്ര്യം, രാഷ്ട്രീയ അവകാശങ്ങൾ, നിയമവാഴ്ച എന്നിവയുടെ പുനഃസ്ഥാപനമാണ് പ്രഥമ പരിഗണന നൽകേണ്ടതെന്ന് ഹസീന പറഞ്ഞു.
തൻ്റെ വ്യക്തിപരമായ തിരിച്ചുവരവിന് മാത്രമല്ല, ബംഗ്ലാദേശിൻ്റെ സ്വാതന്ത്ര്യത്തിനും അവിടുത്തെ ജനങ്ങളുടെ വിശാലമായ താൽപ്പര്യങ്ങൾക്കും ഇത് അത്യാവശ്യമാണെന്ന് അവർ വാദിച്ചു. രാജ്യത്ത് സാധാരണ രാഷ്ട്രീയ സാഹചര്യങ്ങൾ പുനഃസ്ഥാപിക്കപ്പെടുന്നതുവരെ, ജനാധിപത്യത്തിൻ്റെ അടിത്തറ ദുർബലമായി തുടരും.
അവാമി ലീഗിൻ്റെ നിരോധന വിഷയത്തിൽ ഷെയ്ഖ് ഹസീന ഉറച്ച നിലപാട് സ്വീകരിച്ചു. അവാമി ലീഗ് ജനങ്ങളുടെ പാർട്ടിയാണെന്നും ഏതെങ്കിലും കടലാസു ഉത്തരവിലൂടെയോ നിരോധനത്തിലൂടെയോ അത് ഇല്ലാതാക്കുക അസാധ്യമാണെന്നും അവർ പറഞ്ഞു. തൻ്റെ ജീവിതത്തിലെ പോരാട്ടങ്ങളെ അനുസ്മരിച്ചു കൊണ്ട്, ജീവൻ അപകടപ്പെടുത്തുന്ന 19 ആക്രമണങ്ങളെ താൻ നേരിട്ടിട്ടുണ്ടെന്നും എന്നാൽ ഈ ആക്രമണങ്ങൾ ഒരിക്കലും തന്നെ നിർത്താൻ നിർബന്ധിച്ചില്ലെന്നും അവർ പറഞ്ഞു.
അവാമി ലീഗിനെ നിരോധിക്കാനും ഇല്ലാതാക്കാനും കഴിയുമെങ്കിൽ ബംഗ്ലാദേശ് ജനിക്കുമായിരുന്നില്ലെന്ന് ഹസീന പറഞ്ഞു. ഇന്നും ബംഗ്ലാദേശിലുടനീളമുള്ള ദശലക്ഷക്കണക്കിന് പിന്തുണക്കാരും ആയിരക്കണക്കിന് നേതാക്കളും പാർട്ടിക്കൊപ്പം ഉറച്ചുനിൽക്കുന്നുണ്ടെന്ന് അവർ അവകാശപ്പെട്ടു. അവരുടെ അഭിപ്രായത്തിൽ, നിലവിലെ സർക്കാർ അവാമി ലീഗിൻ്റെ ജനപ്രീതിയെ ഭയപ്പെടുന്നു. അതുകൊണ്ടാണ് അത് നിരോധിച്ചിരിക്കുന്നത്.
ഇടക്കാല സർക്കാർ തലവൻ മുഹമ്മദ് യൂനുസിനെതിരെ ഷെയ്ഖ് ഹസീന വളരെ ഗുരുതരവും കഠിനവുമായ ആരോപണങ്ങൾ ഉന്നയിച്ചിട്ടുണ്ട്. യൂനുസ് സർക്കാരിൻ്റെ നടപടികളെ അവാമി ലീഗ് നേതാക്കൾക്കും പിന്തുണക്കാർക്കും എതിരായ രാഷ്ട്രീയ വംശഹത്യയെന്നാണ് അവർ വിശേഷിപ്പിച്ചത്. ഹസീന നൽകിയ കണക്കുകൾ പ്രകാരം ഇതുവരെ ഏകദേശം 600 നേതാക്കളും പ്രവർത്തകരും കൊല്ലപ്പെട്ടിട്ടുണ്ട്. കൂടാതെ, 150,000-ത്തിലധികം ആളുകളെ അറസ്റ്റ് ചെയ്ത് വ്യാജവും കെട്ടിച്ചമച്ചതുമായ കേസുകളിൽ കുടുക്കിയിട്ടുണ്ടെന്നും അവർ അവകാശപ്പെട്ടു.
അടിച്ചമർത്തൽ നയങ്ങൾ കാരണം നിരവധി പേർ ജീവൻ രക്ഷിക്കാൻ രാജ്യം വിട്ട് പലായനം ചെയ്യാൻ നിർബന്ധിതർ ആയിട്ടുണ്ടെന്ന് അവർ പറഞ്ഞു. രാജ്യത്ത് ജനാധിപത്യം തിരിച്ചെത്തിയാലുടൻ ഈ നേതാക്കളും പ്രവർത്തകരും തിരിച്ചുവരുമെന്ന് ഹസീന വിശ്വസിക്കുന്നു.
രാജ്യത്തിൻ്റെ സാമ്പത്തിക സ്ഥിതിയിൽ ആശങ്ക പ്രകടിപ്പിച്ച ഷെയ്ഖ് ഹസീന, തൻ്റെ ഭരണകാലത്ത് ബംഗ്ലാദേശ് വികസനത്തിൻ്റെ പുതിയ ഉയരങ്ങൾ താണ്ടുകയായിരുന്നുവെന്നും പത്മ പാലം, രൂപൂർ ആണവ പദ്ധതി, മാതരബാരി തുറമുഖം തുടങ്ങിയ വൻ പദ്ധതികൾ തൻ്റെ ഭരണകാലത്തെ പ്രധാന നേട്ടങ്ങളായി ചൂണ്ടിക്കാട്ടി. നിലവിലെ സർക്കാരിൻ്റെ തെറ്റായ നയങ്ങൾ രാജ്യത്തിൻ്റെ സമ്പദ്വ്യവസ്ഥയെ ആഴത്തിലുള്ള പ്രതിസന്ധിയിലേക്ക് തള്ളിവിട്ടിരിക്കുകയാണെന്ന് അവർ ആരോപിച്ചു.
പാർട്ടിയുടെ ഭാവിയെ കുറിച്ച് സംസാരിക്കുമ്പോൾ, അവാമി ലീഗ് ഒരു ജനാധിപത്യ സംഘടനയാണെന്നും ഏതെങ്കിലും നേതാവിനെതിരെ കുറ്റം ചുമത്തിയാൽ പാർട്ടി തന്നെ അവർക്കെതിരെ നടപടിയെടുക്കുമെന്നും അവർ പറഞ്ഞു. പ്രതിപക്ഷത്തിൻ്റെ ഗൂഢാലോചനക്കോ സമ്മർദ്ദത്തിനോ പാർട്ടി ഒരിക്കലും വഴങ്ങില്ലെന്നും അതിൻ്റെ തത്വങ്ങളിൽ ഉറച്ചുനിൽക്കുമെന്നും അവർ വ്യക്തമാക്കി.
